Qazaq pen qırğız basşıları. Foto: Azattıq Radiosı.

Bügin Azattıq radiosınıñ qırğız qızmeti Qırğızstan biligi Qazaqstanğa nota jiberdi degen aqparat tarattı. Resmi Bişkektiñ Astanağa nota jiberuiniñ bastı sebebi Nwrswltan Nazarbaevtıñ Qırğızstan prezidenttigine ümitker Ömirbek Babanovpen kezdesui bolğan. Osığan baylanıstı biz osı uaqıtqa deyin Qazaqstan men Qırğızstan arasında bolğan osığan wqsas jağdaylarğa qısqaşa toqtalatın bolamız.  

Qırküyektiñ 19 küni QR prezidentiniñ resmi saytı Nwrswltan Nazarbaevtıñ Almatı qalasında Qırğızstan prezidenttigine ümitker, «Respublika – Ata Jwrt» frakciyasınıñ jetekşisi Ömirbek Babanovpen kezdeskendigi jayında aqparat taratqan edi. Resmi Astananıñ bwl isine Bişkek biligi birden jauap berip, bügin qazaq biligine nota jiberdi. Qırğızstan tarapı jibergen notada «Qırğız elimen dostıq qarım-qatınastağı Qazaqstan basşısınıñ Qırğızstannıñ işki isine aralaspaymız degen mälimdemesine qaramastan, onıñ sözderi Qırğızstannıñ bolaşaq prezidentin ayqın qoldaudı bildiredi. Osığan baylanıstı qırğız biligi atalmış sözdi jäne Qazaqstan tarapınıñ bolğan kezdesudi keñinen nasihattauın eldiñ işki isterine aralasu dep bağalaydı» - delingen.

Bwğan deyin qırğız biligi 2016 jıldıñ mamır ayında QR sport jäne mädeniet ministri Arıstanbek Mwhamediwlınıñ Mäskeude därethana juıp jürgen qırğız migranttarı jayında aytqan sözi üşin Qazaqstanğa qarsılıq notasın jibergen bolatın. Ol kezde soñğı uaqıtta basınan dau arılmay jürgen Arıstanbek Mwhamediwlı qırğız halqınan keşirim swrap, osı iske baylanıstı barlıq mäselelerdi jılı jauıp qoyğan edi. Biraq Qırğızstan İİM Mwhamediwlınıñ suretin izdeude jürgen asa qauipti qılmıskerlerdiñ arasına «abaysızda» qosıp jiberip, qazaq-qırğız qoğamında tağı bir dau tuğızğan bolatın. Keyinen qırğız tärtip saqşıları mädenietti ministrden keşirim swrap, Mwhamediwlı bastağan dauğa nükte qoyğan.

Al 2017 jıldıñ aqpan ayında Qazaqstan biligi Qırğızstanğa Almazbek Atambaevtıñ 17 aqpan küni Euronews telearnasına bergen swhbatına baylanıstı qarsılıq notasın jibergen bolatın. Ol kezde Atambaev mırza  Euronews arnasınıñ efirinde 2010 jılı Qırğızstanda bülik bolğan kezde Qazaqstan tarapınıñ şekaranı jauıp tastauına baylanıstı elde adam şığınana deyin bolğandığın, bwl oqiğağa baylanıstı resmi Bişkek osı uaqıtqa deyin eşqanday söz qozğamağandığın aytqan edi. Qazaqstan tarapı jibergen qarsılıq notasınan keyin Qırğızstan SİM Dinara Kemelova Bişkektegi Qazaqstan elşisi Ayımdos Bozjigitovtı qabıldap, Almazbek Atambaevtıñ aytqan sözderine tüsinikteme bere kele, şın mäninde 2010 jılı  Qazaqstan 45 künge şekarasın jauıp tastauı saldarınan Şu özenin zañsız jüzip ötpek bolğan qırğız azamattar köz jwmğandığın aytqan. Biraq Dinara Kemelova hanım Arıstanbek Mwhamediwlınday eşkimnen keşirim swramağan. Bir qızığı osı jolı Nwrswltan Nazarbaevpen kezdesken Ömirbek Babanovtıñ «Respublika – Ata Jwrt» frakciyası 2017 jıldıñ aqpan ayındağı Almazbek Atambaevtıñ Qazaqstan tarapına qarata aytılğan sözderin qatañ sınğa alıp, «bwl tek Atambaevtıñ közqarası bwnı bükil qırğız halqınıñ sözi dep qabıldaudıñ qajeti joq» degen mälimdeme jasağan. Sol kezde «Respublika - Ata Jwrt» frakciyasınıñ bwl mälimdemesin Qırğızstan biliginiñ mañayındağı sayasattanuşılar atalmış sätti wtımdı paydalanıp, sayasi wpay jinau jäne sırttan özin qoldaytın küş izdeu dep boljağan bolatın.

Qorıta kelgende soñğı jıldarı qazaq-qırğız qarım-qatınasındağı jağdaylarğa qarap tarihtıñ qaytalanıp jatqanın köruge boladı. Kezinde patşa imperiyasına qarsı twru üşin qırğızğa odaqtas bolayıq dep barğan Kenesarı han basınan ayırılsa, büginde özbekpen jaqındasıp jatqan qazaq biligine qırğız jwrtı qarsılıq notasın jiberude. San jıldar ötse de Ortalıq Aziyada özgermegen bir dünie ol - qazaq-qırğız qarım-qatınası. Biri bauırlas wlttarmen birigudi oylasa, ekinşisi äli künge deyin Reseyge qarap otır.

“The Qazaq Times”