«Bank RBK» AQ akcioneri Vladimir Kim. Foto: Kazday

«Bank RBK» AQ akcioneri Vladimir Kim qarjı institutınıñ jarğılıq kapitalın toltıru üşin 20 mrld teñge jwmsamaq. Bwl qarjı 2017 jıldıñ soñına deyin audarıladı.  

Bastapqı kapitaldandıru (dokapitalizaciya) banktiñ jay akciyalarınıñ qosımşa emissiyası boyınşa jüzege asadı. Banktiñ jariyalanğan jay akciyalarınıñ sanın arttıru turalı şeşim 2017 jıldıñ 15 tamızında akcionerlerdiñ kezekten tıs jalpı jinalısında qabıldanğan. Bastapqı kapitaldandıru nätijesinde banktiñ normativtik kapitalı şamamen 127 mlrd teñge, balanstıq menşik kapitalı şamamen 117 mlrd teñgeni qwraydı.

«Bank RBK» AQ-nıñ kapitaldandıru turalı şeşimdi qabıldauı Wlttıq Bank äzirlegen bank sektorınıñ qarjılıq twraqtılığın arttıru bağdarlamasına qatısu nietimen baylanıstı.

Ayta keteyik, osı bağdarlama arqılı Wlttıq Bank akcionerlerdiñ jauapkerşiligin qamtamasız ete otırıp kapitaldandıru üşin bankterge wzaq merzimdi qarjılandıru (tölemder, merzimdilik jäne öteu qağidaları boyınşa) beredi. Wlttıq bank bwl bağdarlamanıñ bastalğanı turalı şilde ayında habarlağan.

Wlttıq banktiñ mälimetinşe, bankterge qarjı wsınatın bağdarlamağa kapitalı 45 mlrd teñge şamasında bolatın 15 qarjı institutı qatısa aladı. YAğni Vladimir Kimniñ bankti 20 mlrd teñgege kapitaldandıruına qarağanda «Bank RBK» AQ kapitalı 45 mlrd teñgeden tömen boluı mümkin. Alayda banktiñ mälimetinşe, 2017 jıldıñ 1 tamızındağı esep boyınşa qarjı institutınıñ jeke kapitalı 96,6 mlrd teñge, jarğılıq kapitalı 64,4 mlrd teñge bolğan. Bwdan Bank RBK-nıñ Wlttıq bank bağdarlamasına qatısuı negizsiz ekenin añğaruğa boladı.

Tağı bir eskeretin jayt, banktiñ habarlauınşa, Standard & Poor's halıqaralıq reyting agenttigi atalğan banktiñ kontragentteriniñ wzaq merzimdi jäne qısqa merzimdi kredit reytingin «CCC + / C» deñgeyine, wlttıq şkala boyınşa «kzB» deñgeyine deyin tömendetken. Banktiñ tüsindiruinşe, reytingtiñ tömendeui banktiñ biznes qwrılımındağı özgerispen jäne banktiñ  «Qazaq Banki» AQ-men biriguimen baylanıstı.

Ayta keteyik, mamır ayında Qazaqstandağı «Bank RBK» AQ men «Qazaq Banki» AQ akcionerleri qarjı instituttarın biriktiru turalı kelissöz jürgizip jatqanı habarlanğan bolatın.

“The Qazaq Times”