Foto: Fergana.Ru

Özbekstannıñ bwrınğı prezidenti Islam Kärimovtıñ jieni Djamşud Kärimov äli künge deyin tölqwjatın ala almay jür.

«2006 jılı men Şveciyağa ketuge baylanıstı qwjattarımdı jinap jürgende bilik meniñ tölqwjatımdı tartıp alıp, özimdi psihiatriyalıq emhanağa jauıp tastağan bolatın. Sol uaqıttan beri men tölqwjatsız jürmin. Qızım prezident Şavkat Mirzieevtıñ virtualdı qabıldauına birneşe ret tölqwjat aluımızğa kömektesulerin swrap hat joldağan. Biraq oğan eşkim jauap bermedi. Qazir men tölqwjatımnıñ joq boluı saldarınan ne jwmısqa twra almaymın, ne tiisti järdemaqımdı ala almaymın. Kärimov biligi 2006 jılı mağan şizofreniya degen jalğan diagnoz qoyıp, eriksiz türde meni psihiatriyalıq emhanağa qamağan bolatın. Sodan beri men Kärimov salğan abaqtıda 10 jıl 5 ay otırdım. Şınımdı aytsam ağamnıñ ölimi men üşin ülken sıylıq boldı. Öytkeni meniñ bostandıqqa şığuımnıñ bastı sebebi sol» - dedi Djamşud Kärimov «Ozodlik» jurnalisterine bergen swhbatında.

Esteriñizge salayıq, Djamşud Kärimov 2006 jılğa deyin halıqaralıq «Ferğana», «Arena», Uznews.net basılımdarında jwmıs istegen. Onı bilikti sınağanı üşin 2006 jılı qırküyek ayında Samarqand qalasınıñ sotı «şizafriniyamen auıradı» dep şeşim şığarıp, psihiatriyalıq emhanağa jibergen bolatın.

“The Qazaq Times”