Foto: Jas Örken

Qazaq jurnalistikasınıñ tarlanbozı, «Qazaq gazetteri» JŞS-nıñ Bas direktorı – redaktorlar keñesiniñ törağası, Qazaqstan Respublikası Prezidentiniñ bwqaralıq aqparat qwraldarı salasındağı sıylığınıñ laureatı, Qazaqstan Jurnalister odağı sıylığınıñ laureatı, Qazaqstan Jurnalister Akademiyasınıñ akademigi, «Qwrmet» ordeniniñ iegeri Jwmabek Omarwlı Kenjalinniñ kenetten qaytıs bolğanı turalı habar bükil el jurnalisteriniñ qabırğasın qayıstırıp ketti. Qazaqta «Tozbastı wsta soqpaydı, ölmesti qwday jaratpaydı» demekşi, tabiğattıñ bwljımaytın qatal zañına eş pende qarsı twra alması anıq. Atadan tuğan janğa ölim ras. Allanıñ jazuı solay bolsa, amal bar ma?! 
Jwmabek Omarwlı Kenjalin qazaq jurnalistikasına erekşe eñbek siñirdi. Qarapayım tilşiden iri holdingtiñ bas direktorlığına deyingi abıroylı joldan ötti. 1981 jılı «Egemen Qazaqstan» («Socialistik Qazaqstan») gazetinde äueli tilşi, keyin bölim meñgeruşisi, 1986-1988 jıldarı «Zerde» («Bilim jäne eñbek») jurnalında jauaptı hatşı, bas redaktordıñ mindetin atqaruşı, 1994 jıldan «Halıq keñesi» gazetiniñ bas redaktorı boldı. 1996 jıldan «Aqiqat» jurnalınıñ bas redaktorı, 1997-1999 jıldar aralığında «Qazaq ädebieti» gazetiniñ bas redaktorı qızmetin atqardı. 1999 jıldan 2007 jılğa deyin «Qazaq gazetteri» JAQ-nıñ prezidenti, bas direktorı, «Ana tili» wlttıq aptalığınıñ, «Aqiqat» wlttıq qoğamdıq-sayasi jurnalınıñ bas redaktorı qızmetterinde boldı. 2004 jılı «Bwqaralıq aqparat qwraldarınıñ qazaqstandıq patriotizmdi qalıptastırudağı röli» degen taqırıpta sayasat ğılımdarınıñ kandidatı atağın alu üşin dissertaciya qorğadı. Birqatar Düniejüzilik jastar men studentterdiñ forumdarına qatıstı. 1978 jılı halıq deputattarı Almatı qalalıq sovetiniñ deputattığına saylandı. HVİİ şaqırılğan halıq deputattarı Almatı qalalıq keñesiniñ deputatı boldı.
Jwmabek Kenjalin «Jelkildep ösken qwraqtay» (1988j.), «Şındıqtı şıraq etip wstañız» (1998j.), «Wlt ruhın wlıqtağan wrpaqpız» (2005j.), «Sayasi menedjment jäne baspasözdiñ jwrtşılıqpen baylanıs mäseleleri» (2010j.), «Er Jäuke minbegenmen altın taqqa» (2011j.) dep atalatın kitaptardıñ avtorı.
Auır qayğını er köteredi, auır qazanı jer köteredi. Jaratuşı Alla marqwmnıñ artındağı balaların übirli-şübirli etip, wrpağına wzaq ğwmır bersin! Jatqan jeri jaylı bolsın! Imanı joldası bolsın!
Jwmabek Omarwlınıñ otbasına, tuğan-tuıstarına jäne Qazaqstannıñ barşa jurnalister qauımına qayğırıp köñil aytamız.Tas tüsken jerine auır.

Qazaqstan Jurnalister 
Odağınıñ basqarması.

“The Qazaq Times”