فوتو: جاس وركەن

قازاق جۋرناليستيكاسىنىڭ تارلانبوزى، «قازاق گازەتتەرى» جشس-نىڭ باس ديرەكتورى – رەداكتورلار كەڭەسىنىڭ توراعاسى، قازاقستان رەسپۋبليكاسى پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىعىنىڭ لاۋرەاتى، قازاقستان جۋرناليستەر وداعى سىيلىعىنىڭ لاۋرەاتى، قازاقستان جۋرناليستەر اكادەمياسىنىڭ اكادەميگى، «قۇرمەت» وردەنىنىڭ يەگەرى جۇمابەك ومارۇلى كەنجاليننىڭ كەنەتتەن قايتىس بولعانى تۋرالى حابار بۇكىل ەل جۋرناليستەرىنىڭ قابىرعاسىن قايىستىرىپ كەتتى. قازاقتا «توزباستى ۇستا سوقپايدى، ولمەستى قۇداي جاراتپايدى» دەمەكشى، تابيعاتتىڭ بۇلجىمايتىن قاتال زاڭىنا ەش پەندە قارسى تۇرا الماسى انىق. اتادان تۋعان جانعا ءولىم راس. اللانىڭ جازۋى سولاي بولسا، امال بار ما؟! 
جۇمابەك ومارۇلى كەنجالين قازاق جۋرناليستيكاسىنا ەرەكشە ەڭبەك ءسىڭىردى. قاراپايىم تىلشىدەن ءىرى حولدينگتىڭ باس ديرەكتورلىعىنا دەيىنگى ابىرويلى جولدان ءوتتى. 1981 جىلى «ەگەمەن قازاقستان» («سوتسياليستىك قازاقستان») گازەتىندە اۋەلى ءتىلشى، كەيىن ءبولىم مەڭگەرۋشىسى، 1986-1988 جىلدارى «زەردە» («ءبىلىم جانە ەڭبەك») جۋرنالىندا جاۋاپتى حاتشى، باس رەداكتوردىڭ مىندەتىن اتقارۋشى، 1994 جىلدان «حالىق كەڭەسى» گازەتىنىڭ باس رەداكتورى بولدى. 1996 جىلدان «اقيقات» جۋرنالىنىڭ باس رەداكتورى، 1997-1999 جىلدار ارالىعىندا «قازاق ادەبيەتى» گازەتىنىڭ باس رەداكتورى قىزمەتىن اتقاردى. 1999 جىلدان 2007 جىلعا دەيىن «قازاق گازەتتەرى» جاق-نىڭ پرەزيدەنتى، باس ديرەكتورى، «انا ءتىلى» ۇلتتىق اپتالىعىنىڭ، «اقيقات» ۇلتتىق قوعامدىق-ساياسي جۋرنالىنىڭ باس رەداكتورى قىزمەتتەرىندە بولدى. 2004 جىلى «بۇقارالىق اقپارات قۇرالدارىنىڭ قازاقستاندىق ءپاتريوتيزمدى قالىپتاستىرۋداعى ءرولى» دەگەن تاقىرىپتا ساياسات عىلىمدارىنىڭ كانديداتى اتاعىن الۋ ءۇشىن ديسسەرتاتسيا قورعادى. بىرقاتار دۇنيەجۇزىلىك جاستار مەن ستۋدەنتتەردىڭ فورۋمدارىنا قاتىستى. 1978 جىلى حالىق دەپۋتاتتارى الماتى قالالىق سوۆەتىنىڭ دەپۋتاتتىعىنا سايلاندى. ءحVىى شاقىرىلعان حالىق دەپۋتاتتارى الماتى قالالىق كەڭەسىنىڭ دەپۋتاتى بولدى.
جۇمابەك كەنجالين «جەلكىلدەپ وسكەن قۇراقتاي» (1988ج.), «شىندىقتى شىراق ەتىپ ۇستاڭىز» (1998ج.), «ۇلت رۋحىن ۇلىقتاعان ۇرپاقپىز» (2005ج.), «ساياسي مەنەدجمەنت جانە ءباسپاسوزدىڭ جۇرتشىلىقپەن بايلانىس ماسەلەلەرى» (2010ج.), «ەر جاۋكە مىنبەگەنمەن التىن تاققا» (2011ج.) دەپ اتالاتىن كىتاپتاردىڭ اۆتورى.
اۋىر قايعىنى ەر كوتەرەدى، اۋىر قازانى جەر كوتەرەدى. جاراتۋشى اللا مارقۇمنىڭ ارتىنداعى بالالارىن ءۇبىرلى-ءشۇبىرلى ەتىپ، ۇرپاعىنا ۇزاق عۇمىر بەرسىن! جاتقان جەرى جايلى بولسىن! يمانى جولداسى بولسىن!
جۇمابەك ومارۇلىنىڭ وتباسىنا، تۋعان-تۋىستارىنا جانە قازاقستاننىڭ بارشا جۋرناليستەر قاۋىمىنا قايعىرىپ كوڭىل ايتامىز.تاس تۇسكەن جەرىنە اۋىر.

قازاقستان جۋرناليستەر 
وداعىنىڭ باسقارماسى.

“The Qazaq Times”