Interpol izdeude jürgen azamattar tiziminen BTA banktiñ bwrınğı basşısı, oppoziciyalıq sayasatker Mwhtar Äbilazovtı alıp tastadı.

Äbilazovtıñ qorğauşısı Piter Salastıñ aytuınşa, Interpoldıñ Äbilazovtıñ üstinen «qızıl habarlama» belgisin alıp tastap, izdeude jürgen azamattar tiziminen şığaruı, onıñ erkin jürip-twruına mümkindik beredi.

Interpoldıñ «qızıl habarlama» belgisi Interpolğa müşe elderdiñ qwqıq qorğau organdarına izdeude jürgen azamattı twtqındap, izdeu saluşı elge ekstradiciyadaudı mindetteydi.

Esteriñizge salayıq, Mwhtar Äbilazov 2005 -2009 jıldarı aralığında BTA bankten 6 milliard  dollar köleminde qarjı jımqırdı dep ayıptalğan bolatın. Äbilazov 2013 jılı Franciyada wstalıp, 2014 jıldıñ qañtar ayında Franciyanıñ tömengi instanciyadağı sotı onı  Reseyge ekstradiciyalauğa şeşim şığarğan. Biraq säuir ayında Franciyanıñ Kassaciyalıq sotı bwl şeşimniñ küşin joyğan.

Keyinnen Lion qalasınıñ Apellyaciyalıq sotı Äbilazovtı Reseyge ekstradiciyalaudı qoldap jäne bir şeşim şığarğan edi. Biraq bwl şeşimdi de 2016 jıldıñ 9 jeltoqsanında Franciya memlekettik keñesi joqqa şığarıp, Äbilazovtı Reseyge bermey qoyğan bolatın.

Franciya sotınıñ şaması jetpegen oppoziciyalıq sayasatker Mwhtar Äbilazovtı Almatı qalasınıñ sotı şildeniñ 7-si küni sırttay 20 jılğa sottağan.

“The Qazaq Times”