Tarihşı-inflyunser Nwrqoja Ersayınnıñ Digital Almaty wyımdastıruşısına swraq qoyıp twrğan säti. Foto: jelidegi videodan skrin

Biıl memlekettik qarjılandıru arqılı besinşi märte ötkizilgen Digital Almaty halıqaralıq forumında til dauı tuğan. Ükimet basşısı Smayılovtan bastap moderatorlar men spikerlerdiñ basım böligi memlekettik tilde söylemedi. Byudjet qarjısına wyımdastırılğan şaranıñ jwmıs tili orısşa ötui qoğam qarsılığın örşitti. Forumnıñ jwmbaq byudjeti, ministrlik uädesi turalı QT swrap bildi.

Biıl 2-3 aqpan künderi Almatı qalasında Digital Almaty besinşi halıqaralıq forumı bolıp ötti. Koreya sarapşısı käris tilinde, Resey prem'er-ministri orısşa mälimdeme jasadı, säykesinşe audarma berilip otırdı. Ortalıq Aziyadağı eñ iri Tech-is-şarada üş tilde sinhron audarma jürgizilgenine qaramastan, Qazaqstan prem'er-ministri Älihan Smayılov forum ayasında EAEO-ğa müşe elderdiñ ükimet basşılarınıñ qatısuımen ötken plenarlıq otırısta bayandaması men prezentaciyasın orıs tilinde jasadı.

Qazaqstannıñ atınan qatısa twra qazaqşa bayandama jasamağan prem'er-ministr Älihan Smayılov forumda. Foto: aşıq derekköz

Bwl şeşimdi qabıldauğa ne türtki, qanday qwqıqtıq negiz barı jöninde QT prem'er-ministr apparatına resmi swrau joldağan. Biraq jauap Smayılovtıñ özinen emes, cifrlıq damu vice-ministri Asqar Jambakinniñ atınan keldi.

«Forumnıñ plenarlıq otırısına Armeniya, Belarus', Qazaqstan, Qırğızstan, Resey Federaciyası jäne Özbekstan prem'er-ministrleri qatısqandıqtan, olar orıs tilinde söz söyledi. Forum halıqaralıq sipatqa ie bolğandıqtan jäne is şarağa şetelden köptegen meymandar kelgendikten qatısuşılar ağılşın, käris, türik jäne t.b. tilderde söyledi. Sonday-aq sinhrondıq audarma 3 tilde jürgizildi. Birinşi kezekte melekettik tilge basımdılıq berildi», – dep sipay ötip, naqtı jauap bermegen resmi aqparatta.

Qazaqstan wyımdastırğan aytulı äri iri forumnıñ tügel derligi orıs tilinde ötkenine qarsılığın jetkizgen, orısşa bilmegendikten şarada aytılğan aqparattı tüsine almağanın mälimdegen tarihşı-inflyunser Nwrqoja Ersayınğa äleumettik jelide Digital Almaty wyımdastıruşıları resmi paraqşasında «jwmıs tili – orısşa» bekitilgenin jazıp jauap bergen. Ağartuşılıq bağıtta tarihi-tanımdıq kontent jasaytın Ersayın spikerleri men moderatorı tek orısşa ötip jatqan jiınnıñ birinde qazaq tiline jetkilikti köñil bölmegen wyımdastıruşılarğa narazılığın bildirgen.

«Jaña bolmıstağı cifrlıq äriptestik» taqırıbına arnalğan biılğı forumnıñ jwmıs tili orısşa ötui qoğamda narazılıq tudırdı.

Cifrlıq damu, innovaciyalar jäne aeroğarış önerkäsibi vice-ministri Asqar Jambakin «ministrlik aldağı uaqıtta atalğan is şaralardıñ qazaq tilinde ötuine barınşa män beretin boladı» deydi.

Til dauınıñ kezekti alañına aynalğan forumdı ötkizuge demeuşiler men seriktesterden özge tek memleketten 250 mln teñge bölingen.

Sonımen qosa, ükimet basşısına jolanğan redakciya swrau hatındağı 5 swraqqa jauap berilmedi. Onda biıl alğaş ret bağdarlamağa engen digital Ministry Cup robototehnika çempionatı men ASTANA HUB BATTLE sayısına şetelden kelgen jüzden asa qatısuşınıñ şığını, panel' sessiyalarına qatısqan şeteldik jäne otandıq 150-den asa spikerge tölengen qalamaqı, Digital Almaty Awards premiyasınıñ 7 nominaciyasınıñ jüldeqorı, 2018 jıldan beri ötken tört forumnıñ jalpı byudjetin jıldar bölinisinde naqtı körsetu swralğan.

Spikerler men auditoriyanıñ köpşiligi qazaq tildi bolsa da panel'dik sessiyalar orısşa ötti. Foto: aşıq derekköz

«Forum cifrlıq saladağı jañaşıldıqtar men jetistikterdi körsetuge, IT narıqtı damıtuğa, kompaniyalar men mamandardıñ täjiribe almasuına, üzdik jobalardı investorlardıñ qoldauına jäne Qazaqstannıñ cifrlandıru, memlekettik qızmet körsetu, IT salasındağı äleuetin EAEO müşe memleketter auditoriyasına körsetuge septigin tigizdi», – dep maqtauın qiıstıradı ministrlik.

Şaranı wyımdastıruşı vedomstvonıñ biri jäne bastısı – Cifrlıq damu ministrligi «forumğa 20 mıñ meyman qatısqanın» erekşe atap ötedi. Sonday-aq, memlekettik byudjet qoldauımen öte twra memlekettik til kemşin qalğan şaranıñ wyımdastıruına jauaptı mekemelerdiñ qatarında Almatı qalasınıñ äkimdigi, Tech Garden jäne Astana Hub ökildigi de bar.

The Qazaq Times