تاريحشى-ينفليۋنسەر نۇرقوجا ەرسايىننىڭ Digital Almaty ۇيىمداستىرۋشىسىنا سۇراق قويىپ تۇرعان ءساتى. فوتو: جەلىدەگى ۆيدەودان سكرين

بيىل مەملەكەتتىك قارجىلاندىرۋ ارقىلى بەسىنشى مارتە وتكىزىلگەن Digital Almaty حالىقارالىق فورۋمىندا ءتىل داۋى تۋعان. ۇكىمەت باسشىسى سمايىلوۆتان باستاپ مودەراتورلار مەن سپيكەرلەردىڭ باسىم بولىگى مەملەكەتتىك تىلدە سويلەمەدى. بيۋدجەت قارجىسىنا ۇيىمداستىرىلعان شارانىڭ جۇمىس ءتىلى ورىسشا ءوتۋى قوعام قارسىلىعىن ءورشىتتى. فورۋمنىڭ جۇمباق بيۋدجەتى، مينيسترلىك ۋادەسى تۋرالى QT سۇراپ ءبىلدى.

بيىل 2-3 اقپان كۇندەرى الماتى قالاسىندا Digital Almaty بەسىنشى حالىقارالىق فورۋمى بولىپ ءوتتى. كورەيا ساراپشىسى كارىس تىلىندە، رەسەي پرەمەر-ءمينيسترى ورىسشا مالىمدەمە جاسادى، سايكەسىنشە اۋدارما بەرىلىپ وتىردى. ورتالىق ازياداعى ەڭ ءىرى Tech-ءىس-شارادا ءۇش تىلدە سينحرون اۋدارما جۇرگىزىلگەنىنە قاراماستان، قازاقستان پرەمەر-ءمينيسترى ءاليحان سمايىلوۆ فورۋم اياسىندا ەاەو-عا مۇشە ەلدەردىڭ ۇكىمەت باسشىلارىنىڭ قاتىسۋىمەن وتكەن پلەنارلىق وتىرىستا بايانداماسى مەن پرەزەنتاتسياسىن ورىس تىلىندە جاسادى.

قازاقستاننىڭ اتىنان قاتىسا تۇرا قازاقشا بايانداما جاساماعان پرەمەر-مينيستر ءاليحان سمايىلوۆ فورۋمدا. فوتو: اشىق دەرەككوز

بۇل شەشىمدى قابىلداۋعا نە تۇرتكى، قانداي قۇقىقتىق نەگىز بارى جونىندە QT پرەمەر-مينيستر اپپاراتىنا رەسمي سۇراۋ جولداعان. بىراق جاۋاپ سمايىلوۆتىڭ وزىنەن ەمەس، تسيفرلىق دامۋ ۆيتسە-ءمينيسترى اسقار جامباكيننىڭ اتىنان كەلدى.

«فورۋمنىڭ پلەنارلىق وتىرىسىنا ارمەنيا، بەلارۋس، قازاقستان، قىرعىزستان، رەسەي فەدەراتسياسى جانە وزبەكستان پرەمەر-مينيسترلەرى قاتىسقاندىقتان، ولار ورىس تىلىندە ءسوز سويلەدى. فورۋم حالىقارالىق سيپاتقا يە بولعاندىقتان جانە ءىس شاراعا شەتەلدەن كوپتەگەن مەيماندار كەلگەندىكتەن قاتىسۋشىلار اعىلشىن، كارىس، تۇرىك جانە ت.ب. تىلدەردە سويلەدى. سونداي-اق سينحروندىق اۋدارما 3 تىلدە جۇرگىزىلدى. ءبىرىنشى كەزەكتە مەلەكەتتىك تىلگە باسىمدىلىق بەرىلدى»، – دەپ سيپاي ءوتىپ، ناقتى جاۋاپ بەرمەگەن رەسمي اقپاراتتا.

قازاقستان ۇيىمداستىرعان ايتۋلى ءارى ءىرى فورۋمنىڭ تۇگەل دەرلىگى ورىس تىلىندە وتكەنىنە قارسىلىعىن جەتكىزگەن، ورىسشا بىلمەگەندىكتەن شارادا ايتىلعان اقپاراتتى تۇسىنە الماعانىن مالىمدەگەن تاريحشى-ينفليۋنسەر نۇرقوجا ەرسايىنعا الەۋمەتتىك جەلىدە Digital Almaty ۇيىمداستىرۋشىلارى رەسمي پاراقشاسىندا «جۇمىس ءتىلى – ورىسشا» بەكىتىلگەنىن جازىپ جاۋاپ بەرگەن. اعارتۋشىلىق باعىتتا تاريحي-تانىمدىق كونتەنت جاسايتىن ەرسايىن سپيكەرلەرى مەن مودەراتورى تەك ورىسشا ءوتىپ جاتقان جيىننىڭ بىرىندە قازاق تىلىنە جەتكىلىكتى كوڭىل بولمەگەن ۇيىمداستىرۋشىلارعا نارازىلىعىن بىلدىرگەن.

«جاڭا بولمىستاعى تسيفرلىق ارىپتەستىك» تاقىرىبىنا ارنالعان بيىلعى فورۋمنىڭ جۇمىس ءتىلى ورىسشا ءوتۋى قوعامدا نارازىلىق تۋدىردى.

تسيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى اسقار جامباكين «مينيسترلىك الداعى ۋاقىتتا اتالعان ءىس شارالاردىڭ قازاق تىلىندە وتۋىنە بارىنشا ءمان بەرەتىن بولادى» دەيدى.

ءتىل داۋىنىڭ كەزەكتى الاڭىنا اينالعان فورۋمدى وتكىزۋگە دەمەۋشىلەر مەن سەرىكتەستەردەن وزگە تەك مەملەكەتتەن 250 ملن تەڭگە بولىنگەن.

سونىمەن قوسا، ۇكىمەت باسشىسىنا جولانعان رەداكتسيا سۇراۋ حاتىنداعى 5 سۇراققا جاۋاپ بەرىلمەدى. وندا بيىل العاش رەت باعدارلاماعا ەنگەن digital Ministry Cup روبوتوتەحنيكا چەمپيوناتى مەن ASTANA HUB BATTLE سايىسىنا شەتەلدەن كەلگەن جۇزدەن اسا قاتىسۋشىنىڭ شىعىنى، پانەل سەسسيالارىنا قاتىسقان شەتەلدىك جانە وتاندىق 150-دەن اسا سپيكەرگە تولەنگەن قالاماقى، Digital Almaty Awards پرەمياسىنىڭ 7 نوميناتسياسىنىڭ جۇلدەقورى، 2018 جىلدان بەرى وتكەن ءتورت فورۋمنىڭ جالپى بيۋدجەتىن جىلدار بولىنىسىندە ناقتى كورسەتۋ سۇرالعان.

سپيكەرلەر مەن اۋديتوريانىڭ كوپشىلىگى قازاق ءتىلدى بولسا دا پانەلدىك سەسسيالار ورىسشا ءوتتى. فوتو: اشىق دەرەككوز

«فورۋم تسيفرلىق سالاداعى جاڭاشىلدىقتار مەن جەتىستىكتەردى كورسەتۋگە، IT نارىقتى دامىتۋعا، كومپانيالار مەن مامانداردىڭ تاجىريبە الماسۋىنا، ۇزدىك جوبالاردى ينۆەستورلاردىڭ قولداۋىنا جانە قازاقستاننىڭ تسيفرلاندىرۋ، مەملەكەتتىك قىزمەت كورسەتۋ، IT سالاسىنداعى الەۋەتىن ەاەو مۇشە مەملەكەتتەر اۋديتورياسىنا كورسەتۋگە سەپتىگىن تيگىزدى»، – دەپ ماقتاۋىن قيىستىرادى مينيسترلىك.

شارانى ۇيىمداستىرۋشى ۆەدومستۆونىڭ ءبىرى جانە باستىسى – تسيفرلىق دامۋ مينيسترلىگى «فورۋمعا 20 مىڭ مەيمان قاتىسقانىن» ەرەكشە اتاپ وتەدى. سونداي-اق، مەملەكەتتىك بيۋدجەت قولداۋىمەن وتە تۇرا مەملەكەتتىك ءتىل كەمشىن قالعان شارانىڭ ۇيىمداستىرۋىنا جاۋاپتى مەكەمەلەردىڭ قاتارىندا الماتى قالاسىنىڭ اكىمدىگى، Tech Garden جانە Astana Hub وكىلدىگى دە بار.

The Qazaq Times