پروكۋراتۋرا-تەرگەۋ ورگاندارى مۋحورياپوۆتىڭ ءىسىن توقتاتقانىن قوعامنان ءۇش اي جاسىرعان

بيىل قاڭتار ايىنىڭ باسىندا QT رەداكتسياسى باس پروكۋراتۋراعا ءتىل تۋرالى داۋلى مالىمدەمە جاساپ، قوعامدا قاتتى قارسىلىققا ۇشىراعان كاسىپكەر راميليا مۋحورياپوۆقا قارسى قوزعالعان قىلمىستىق ءىستىڭ ءمان-جايى جونىندە سۇراۋ جولداعان. بيلىكتىڭ ەرتە جابىلعان ءىستى كەش جاريالاۋىنا نە سەبەپ؟

باس پروكۋراتۋرا قاراماعىنداعى ارنايى پروكۋرورلار قىزمەتىنىڭ باسشىسى ريزابەك وجاروۆ رەسمي جاۋابىندا قىلمىستىق ءىس سايلاۋ قارساڭىندا، 19 قازاندا ينتەرنەت تارماقتارى مەن الەۋمەتتىك جەلىلەرگە جاريالانعاننان كەيىن ءبىر اپتانىڭ ىشىندە جابىلعانىن حابارلادى.

«راميل مۋحورياپوۆقا قاتىستى قىلمىستىق ءىس بويىنشا انىقتالعانى، سوت ساراپتاما ينستيتۋتىنىڭ تۇسىندىرمەسىنە سايكەس، تولىق جازباسىز ايتىلعان سوزدەردىڭ باعىتى مەن ماعىناسىن انىقتاۋ مۇمكىن بولماۋىنا بايلانىستى 2022 جىلدىڭ 27 قازانىندا ر.مۋحورياپوۆتىڭ ءىس-ارەكەتىندە قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى ءىس توقتاتىلدى. پروكۋراتۋرا ورگاندارى قابىلدانعان شەشىممەن كەلىستى»، – دەلىنگەن بپ قىزمەتى باسشىلارىنىڭ ءبىرى ريزابەك وجاروۆتىڭ جاۋاپ حاتىندا.

باس پروكۋراتۋرانىڭ وسى جولعى ءىستىڭ توقتاۋ مەرزىمى وسىعان دەيىنگى ايتىلعان رەسمي اقپاراتتارعا قايشى. باس پروكۋراتۋرانىڭ جوعارعى لاۋازىم وكىلدەرى جانە ارىزدانۋشىلارعا پوليتسيادان بەرىلگەن جاۋاپتار سوڭعى دەرەككە ساي ەمەس.

بىلتىر 27 قازاندا باس پروكۋروردىڭ ورىنباسارى اسەت شىڭداليەۆ قوعام نارازىلىعىن تۋدىرعان مۋحورياپوۆتىڭ قازاق ءتىلى تۋرالى ايتقانىن الماتى پوليتسياسى تەكسەرىپ جاتقانىن مالىمدەگەن. «الماتى پوليتسيا دەپارتامەنتى تەكسەرىپ جاتىر. ارنايى ساراپتاما دا تاعايىندالعان. سونىڭ ناتيجەسىندە باعا بەرىلەدى» دەگەن جۋرناليستەرگە.

27 قازانداعى الماتى قالالىق پد-ءنىڭ ارىزدانۋشىلارعا بەرگەن جاۋابى. فوتو: QT

كاسىپكەردىڭ ۇستىنەن ارىز تۇسىرگەن ازاماتتاردىڭ ءبىرى كۇلتەگىن اسپانۇلى الماتى پوليتسيا دەپارتامەنتى تەرگەۋ باسقارماسىنان 27 قازاندا العان جاۋابىندا ساراپتاما جاڭا تاعايىندالعانى كورسەتىلگەن. سونىمەن قوسا، 10 قاراشاداعى حاتىندا اقپارات ءمينيسترى دارحان قىدىرالى «باس پروكۋراتۋراسىنىڭ رەسمي مالىمدەۋىنشە اتالعان ماسەلە ءىىم-ءنىڭ قاتاڭ باقىلاۋىندا جانە ر. مۋحورياپوۆقا قاتىستى ءتيىستى تەكسەرۋ جۇمىسى جۇرگىزىلۋدە» دەپ جاۋاپ بەرگەن. مينيستر «تەرگەۋ ناتيجەسى تۋرالى اقپاراتتى ءىىم ءوز تاراپتارىنان سىزگە قوسىمشا جولدايدى» دەگەنىمەن اسپانۇلىن ەشكىم ءىستىڭ توقتاعانى جايلى حاباردار ەتپەگەن. ودان وزگە، 4 قاراشادا باس پروكۋراتۋرانىڭ قىلمىستىق قۋدالاۋ قىزمەتى باستىعىنىڭ ورىنباسارى ەلدوس قيلىمجانوۆ ارىزدانۋشىعا تەرگەۋ دەرەكتەرى قۇپيا دەپ اقپارات ۇسىنۋدان باس تارتقان.

وجاروۆ 27 قازاندا ءىس توقتاعان دەسە، ءدال سول كۇنى باس پروكۋرور ورىنباسارى اسەت شىڭداليەۆ جانە الماتى قالاسىنىڭ پد ەكترەميزمگە قارسى ءىس-قيمىل باسقارماسى باستىعىنىڭ سول كەزدەگى مىندەتىن اتقارۋشى، قازىرگى ورىنباسارى دارحان ابيكۋلوۆ قىلمىستىق كودەكستىڭ 174-بابىنىڭ («الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ») 1-بولىگىمەن ءىس تىركەلىپ، ساراپتاما باستالعانىن حابارلاعان.

مۋحورياپوۆتىڭ ۇستىنەن ارىز تۇسىرگەندەر №227500031000954 سوتقا دەيىنگى تەرگەۋ ءىسى تۋرالى اقپارات بىلە الماعان، سوت-فيلولوگيالىق cاراپتامانىڭ تاعايىندالۋ قاۋلىسى، تەرگەۋشىنىڭ اتى-ءجونى، ءىس بارىسى تۋرالى مۇلدە اقپارات بەرىلمەگەنىن ايتادى. ءتىپتى جۋرناليست كۇلتەگىن اسپانۇلى الماتى قالاسىنىڭ پوليتسيا دەپارتامەنتىنە بارىپ، ءىىم مەن باس پروكۋراتۋراعا بىرنەشە رەت حات جولداپ ەشقانداي جاۋاپ الا الماعان. ارىزدانۋشىلاردىڭ ايتۋىنشا، تەرگەۋ جانە پروكۋراتۋرا ورگاندارى تۇتقانى كوتەرمەگەن، سۇراقتارعا جاۋاپ بەرمەگەن، كەرى بايلانىسقا شىقپاعان.

پرەزيدەنت جانە سەنات سايلاۋى، قاڭتار قىرعىنىنىڭ جىلدىعى وتكەن سوڭ الماتى پروكۋرورىنىڭ ورىنباسارى نۇرلان اۋعانباەۆ 19 قاڭتاردا اقپارات قۇرالدارىنا مۋحورياپوۆتىڭ ءىسى «قىلمىس قۇرامى بولماعاندىقتان» توقتاعانىن مالىمدەگەن. وجاروۆتىڭ دەرەگىنە سۇيەنسەك، بيلىك ءىس جابىلعاننان 85 كۇن وتكەننەن كەيىن جاريالاعان. 27 قازاندا توقتاعان ءىس تۋرالى نەلىكتەن تەك 19 قاڭتاردا حابارلاۋىنىڭ، قوعامنان جاسىرۋىنىڭ سەبەبى بەلگىسىز.

بىلتىر كۇزدە Chocofamily Holding نەگىزىن قالاۋشى كاسىپكەر راميل مۋحورياپوۆ الماتىداعى رەسەي ازاماتتارىنىڭ الدىندا قازاقستاندا ورىس ءتىلىن بىلە تۇرا قازاق تىلىندە سويلەيتىندەردىڭ ارەكەتىن «ۇلتشىلدىق پەن مادەنيەتسىزدىكتىڭ بەلگىسى» دەگەن. ۇلتارازدىق تۋدىرا جازداعان بۇل مالىمدەمەسىنەن كەيىن قوعامدا نارازىلىق ۇدەپ، ونىڭ بيزنەسىنە جاپپاي بويكوت جاريالاعان. جەلىدەگى اۋقىمدى سىننان سوڭ كەشىرىم سۇراعان ۆيدەو جۇكتەپ، سەرۆيستەرىن تۇگەل قازاقشالاۋعا ۋادە ەتكەن. بىراق قۇقىق قورعاۋ ورگاندارىنىڭ كىناسىز دەگەن باعاسىنان كەيىن كەشىرىم سۇراعان ۆيدەوسىن الەۋمەتتىك جەلىدەگى پاراقتارىنان الىپ تاستاعان.

The Qazaq Times