«Antikor azaptau isterin täuelsiz tergemedi» degen pikir qwqıq qorğauşılar men advokattar, jäbirlenuşiler tarabınan jii aytıladı. Bas prokuratura redakciya swrauımen azaptau şağımdarı turalı jaña mälimetterdi wsındı. Vertikal' jüyede agenttik prokuraturanıñ qolbalasına aynaldı degen sın köp aytılıp jür.

«Ädiletsiz statistika»

Bas prokuraturanıñ QT redakciyasına bergen jauabına qarağanda, Qañtar oqiğasına qatıstı azaptau faktisi turalı barlığı 330 şağım kelip tüsken. Är şağım boyınşa sotqa deyingi tergeu jürgizilgen, yağni qılmıstıq is qozğalğan. Biraq «236 qılmıstıq is toqtadı jäne 83-iniñ tergeu merzimi üzildi» deydi resmi aqparatta.

«Tergeudiñ rwqsat etilmegen ädisterin qoldanuı boyınşa 3 is öndiriste: SJQİA-de – 1, arnayı prokurorlarda – 2. Azaptağanı üşin qwqıq qorğau jäne arnayı organdardıñ 34 qızmetkeri küdikti dep tanıldı. Tağı 8 qılmıstıq is boyınşa sotqa deyingi tergep-tekseru ayaqtaldı, onıñ işinde İşki ister ministrligi organdarınıñ 17 qızmetkerine qatıstı 5 qılmıstıq is sotqa jiberildi (qarauda). WQK-niñ 13 qızmetkerine jäne İİM-niñ 2 qızmetkerine qatıstı 3 qılmıstıq istiñ qatısuşıları is materialdarımen tanısıp jatır. 2 policeyge qatıstı sotqa deyingi tergeu jalğasuda», – delingen Bas prokuratura qaramağındağı Qılmıstıq qudalau qızmeti basşısınıñ orınbasarı Eldos Qilımjanov joldağan jauapta.

Antikor törağasınıñ manipulyaciyası

Biıl 5 qañtarda Antikor törağası Oljas Bektenovtiñ mälimdeuinşe, Qañtardağı azaptauğa baylanıstı 432 qılmıstıq isti «sıbaylas jemqorlıqqa qarsı qızmettiñ eñ täjiribeli tergeuşileri» tergese de, nätijesinde 347 is qısqarğan. Agenttik törağası azaptau jöninde «eñ täjiribeli tergeuşilerdiñ» özi «ob'ektivti derekter anıqtalmağanın» aytadı. Orta joldan köp istiñ jabıluı qoğamda küdik tuğızdı. Sebebi sot-medicina saraptaması 239 adamnıñ jaraqattanğanın rastağan. Söyte twra jäbirlenuşi betperde-kaska kigen azaptauşınıñ türin körmegen, beynekameralar jwmıs istemegen degen uäjben iste qılmıstıq qwram joq dep toqtağan. Qwqıq qorğauşılar mwnı biliktiñ küştik qwrılımdardı qorğau, jasıru äreketi ekenin aytadı.

Parlament aldındağı esebinde «azaptaulardı tergeu jöninde Istanbwl hattamasınıñ talaptarı qatañ saqtaldı» degen Antikor törağasınıñ sözi – manipulyaciya. Halıqaralıq qwjat boyınşa azaptau faktisi rastalıp, azaptauşı anıqtalmasa, onda azaptau orın alğan mekemeniñ basşılığı jauapqa tartıluı kerek. Jappay azaptau jürgen abaqtı, departament, izolyator basşıları da, azaptauşı qızmetkerlerdiñ köpşiligi jazalanbadı.

Sıbaylas jemqorlıqqa qarsı is-qimıl agenttiginiñ törağası Oljas Bektenov. Foto: Antikor

Sıbaylas jemqorlıqqa qarsı is-qimıl agenttiginiñ törağası Oljas Bektenov. Foto: Antikor

«Azaptau isteriniñ sotqa jetpeuine – Antikordıñ prokuraturağa täueldi boluı sebep»

Azaptalğan azamattardıñ zañdı müddesin qorğap jürgen advokat Jalğas Saparhanova resmi statistikağa jäne tergeu ädildigine kümänmen qaraydı.

– Qañtarşılarğa qatıstı 7 mıñğa juıq is qozğalsa, onıñ 3-4 mıñdayı azaptauğa wşırağan. Al azaptau faktisi boyınşa 330 ğana şağım tüsti degenmen kelispeymin, sebebi, qañtar-aqpan ayında wstalğan qañtarşılardıñ basım böligi jappay azaptaudan ötti, sol uaqıtta onı estip te jattıq. Onıñ işinde meniñ qorğauımdağı 17 azamattıñ 15-niñ isi zañsız qısqarğan, – deydi advokat tilşige bergen swhbatında.

Advokat Jalğas Saparhanova jäne qorğauındağı qañtarşı Ğalımbek Bisaev sot zalında. Foto: QT / Kültegin Aspanwlı

Advokat Jalğas Saparhanova jäne qorğauındağı qañtarşı Ğalımbek Bisaev sot zalında. Foto: QT / Kültegin Aspanwlı

Atalğan isterdi «Sıbaylas jemqorlıqqa qarsı is-qimıl departamenti zañ şeñberinde tergep-tekseru jürgizbedi jäne Istambwl hattamasın negizge almadı» dep esepteydi. Öytkeni Istambwl hattamasına säykes, aldın ala tergep-tekseru organı (Antikor) azaptalğan azamattardan arız-şağım tüsip, qılmıstıq is qozğalğan sätten bastap, tiis qwjattar – sot medicinalıq, psihologiyalıq-psihiatriyalıq saraptama qorıtındıların alu, jinau kerek bolatın.

– Alayda is jüzinde olay bolmadı, ötiniş hattarımız qanağattandırusız qalıp, birjaqtı qaraldı. Saldarınan 15 azamattıñ isin qısqartıp tastadı. Äli künge deyin qısqartu qaulısın qolğa alğamız joq. Tipti is bitkende tanısatın is materialı, köşirmelerin alu qwqığımızdı da şektep otır, – deydi advokat.

Adam qwqıqtarına mamandanğan Saparhanova Antikor qızmetkerleri azaptau qılmısın täuelsiz tergese, azamattardıñ isteri qısqartılmay sotqa jeter edi dep sanaydı. «Alayda bwl jerde agenttik prokuraturağa täueldi boldı, sebebi olardı qısqartu mäseleleri baqılap-qadağalauşı prokuraturamen kelise otırıp jürgizildi degen oydamın» deydi.

Bwğan dälel – ispen tanısu, qısqartu turalı qaulını alu turalı ötinişpen jügingen advokattarğa Antikor ünemi isterdiñ qala prokuraturasında, qala prokuraturası Bas prokuraturada jatqanın aytıp, joğarığa silteui.

P.S.:
Bas prokuratura Qañtar qırğınında qaza tapqan 238 adamnıñ altauı azaptaudan köz jwmdı degen. Odan bölek jüzdegen adam azaptalğanı qoğamda narazılıqtı üdetken. Alğaşında onı joqqa şığarıp kelgen bilik keyin «azaptau nauqanı» turalı moyındadı.

Beybit narazı retinde sankciyalanbağan jiınğa qatısqan mıñdağan adam küdikti retinde tanılıp, is arqalasa da, jappay azaptağan qwqıq qorğau qızmetkerlerinen tek ondağanı jauapqa tartılıp jatır.

The Qazaq Times