تارازدا «ارۋاقتار سوتتالدى»

تارازداعى قاڭتارشىلارعا قاتىستى ەل اراسىندا «ارۋاقتار سوتى» اتالىپ كەتكەن پروتسەستىڭ 60-وتىرىسىندا سۋديا 9 ادامنىڭ بارلىعىن ايىپتى دەپ تانىدى. ونىڭ بەسەۋى مارقۇم بولعان، تاعى تورتەۋىنىڭ ۇشەۋى بۇلتارتپاۋ شاراسىمەن يزولياتوردا قاماۋدا، ال بىرەۋى قولحاتپەن قاتىسىپ كەلگەن. سوتتىڭ سوڭى داۋعا اينالدى.

ءبارىن جازىقتى دەپ تانىعان ۇكىم

جاريالانعان ۇكىمگە سايكەس، زالدا وتىرعان مارات بەكباۋوۆ قىلمىستىق كودەكستىڭ 272-بابىنىڭ 2-بولىگىمەن ايىپتالىپ، ەكى جىلعا باس بوستاندىعىنان ايىرىلدى. بۇلتارتپاۋ شاراسىن ەسەپكە العاندا، جازانىڭ جارتىسى وتەلگەن بولىپ تانىلدى. سوت اسحات تاشەكەەۆتى قك 272-بابىنىڭ 3-بولىگىمەن كىنالى دەپ تانىدى، راقىمشىلىق شەڭبەرىندە جاۋاپكەرشىلىكتەن بوسادى. عاني كەرىمباەۆ وسى باپتىڭ 2-بولىگى نەگىزىندە ايىپتى دەپ تانىلىپ، راقىمشىلىق پەن قاماۋداعى مەرزىمىن ەسكەرە وتىرىپ، ءۇش جىل مەرزىمگە تاعايىندالعان جازا تولىق وتەلدى دەپ شەشىلدى. ءدال وسىعان ۇقساس ايىپپەن نۇربول ەرەجەپوۆ جاپپاي تارتىپسىزدىككە قاتىستى دەگەن ايىپ دالەلىن تاپتى دەگەن قورىتىندىعا كەلدى. راقىمشىلىق زاڭىمەن جانە ۇلگىلى ءتارتىبى ءۇشىن اۋەلدە كوزدەلگەن ءۇش جىلعا باس بوستاندىعىن ايىرۋ جازاسى توعىز ايعا قىسقارىپ، شارتتى تۇرگە اۋىستىرىلدى.

ودان وزگە بەس مارقۇمعا دا ۇكىم وقىلدى. سۋديا الاڭدا اتىلعان ەرجان بايجانوۆ، رايس رىسبەكوۆ، نۇرسۇلتان قۋاتباەۆ، توقتار وشاقباەۆ، يساتاي دونباەۆتاردى قىلمىستىق كودەكستىڭ 272-بابىنىڭ 2-بولىگىمەن ايىپتى دەپ تانىدى. قايتىس بولۋىنا بايلانىستى قىلمىستىق جاۋاپتىلىقتان بوساتىلاتىنىن ايتتى.

مارقۇمداردىڭ تۋىستارى سوتتىڭ ادىلەتسىز ەكەنىن، كەلىسپەيتىنىن مالىمدەدى.

بىلتىر 23 قاراشادا باستالعان سوت پروتسەسىندە بۇگىنگە دەيىن الپىس وتىرىس وتكىزدى. اشىق سوت پروتسەسىندە ونداعان كۋا، مارقۇم جانە كوزى ءتىرى سوتتالۋشىلاردىڭ زاڭدى وكىلدەرى مالىمدەمە جاساعان. قاڭتار وقيعاسى كەزىندە ورتالىق الاڭدا جۇزدەگەن وق اتقان ءىىم قىزمەتكەرلەرى قارۋ قولدانعانىن اشىق مويىنداعان. سوتتالۋشىلاردىڭ قورعاۋ تارابى "تەرگەۋشىمەن بايلانىسى بار كۇماندى كۋاگەرلەردەن" جاۋاپ الا الماعان.

27 قاڭتاردا ءجارىسسوز كەزەڭى اياقتالاردا مارقۇمداردىڭ تۋىستارى پروكۋرورلار – ادىلەت ۇسەمباەۆ جانە عاني قۇرمانوۆ ايىپتاۋ اكتىسىمەن كەلىسپەيتىنىن جانە تەرگەۋدىڭ ادىلەتسىز جۇرگەنىن مالىمدەگەن. سوتتالۋشىلار دا سوڭعى سوزىندە جازىقسىز ءىستى بولعانىن ايتقان.

سۋديا باعدات تورەكبەكۇلى. فوتو: QT / كۇلتەگىن اسپانۇلى

قاڭتار ايىنىڭ اياعىندا مەملەكەتتىك ايىپتاۋشىلار مارقۇمدار – رايس رىسبەكوۆ، نۇرسۇلتان قۋاتباەۆ، ەرجان بايجانوۆ، توقتار وشاقباەۆ، يساتاي دونباەۆتاردى ايىپتى دەپ تانۋدى جانە قىلمىستىق جازادان بوساتۋدى سۇراعان. سونىمەن قوسا، مارات بەكباۋوۆ پەن اسحات تاشەكەەۆكە – 4 جىل باس بوستاندىعىنان ايىرۋدى; نۇربول ەرەجەپوۆ پەن عاني كەرىمباەۆقا – كوزدەلگەن 3 جىل جازانى راقىمشىلىقپەن 9 ايعا قىسقارتىپ، سوت زالىنان بوساتۋدى سۇراعان.

ءىستى قاراعان تاراز قالالىق N2 سوتىنىڭ سۋدياسى باعدات تورەبەكۇلى بىرنەشە رەت جۋرناليستەردىڭ قىزمەتىن شەكتەپ، سوت زالىنان قۋىپ شىققان.

تاراز قالاسىنداعى قاڭتارشىلاردى ايىپتاپ وتىرعان پروكۋرورلار - ادىلەت ۇسەمباەۆ جانە عاني قۇرمانوۆ. فوتو: QT / كۇلتەگىن اسپانۇلى

ادۆوكاتتار مەن قۇقىق قورعاۋشىلار پروتسەستى «ساياسي استارى» بار ءىس دەپ باعالاعان. قاڭتارشىلاردىڭ قورعاۋ تارابى سوتتان بارلىق ءىستى قىسقارتىپ، اقتاۋدى سۇراعان.

وسىعان دەيىن ءىس اشاردا سوتتالۋشىلارعا تەرروريزم ايىبى تاعىلىپ، كەيىن دالەل تاپپاي، نەگىزسىز دەپ تانىلىپ، الىپ تاستالعان ەدى. بىلتىر مارقۇمداردىڭ جاقىندارى استاناعا بىرنەشە مارتە بارىپ، ءىستى توقتاتىپ، اقتاۋدى تالاپ ەتكەن. اتىپ ولتىرىلگەن بەس مارقۇمنىڭ تۋىستارى ۇقك مەن پروكۋراتۋرا ورگاندارىنىڭ جەرگىلىكتى قىزمەتكەرلەرى ەلورداعا اتتانۋىنا ءتۇرلى جولمەن كوپ كەدەرگى جاساعانىن ايتقان.

The Qazaq Times