Tarazdağı «Äruaqtar sotında» prokurorlar qañtarşılardı ayıptadı. Sud'yanıñ şekteui

Tarazdağı qañtarşılarğa qatıstı el arasında «Äruaqtar sotı» atanıp ketken «4+5 sotı» jalğasıp jatır. Barlığı 9 adamnıñ beseui marqwm bolğan, tağı törteuiniñ üşeui bwltartpau şarasımen izolyatorda qamauda, al bireui qolhatpen qatısıp jür. Jarıssöz bastalğan boyda sot törağası jurnalister qızmetine aralasıp, kedergi keltirdi.

Bıltır 23 qaraşada bastalğan sot procesinde büginge deyin 57-otırısta sot tergeu-talqılau kezeñi ötti.

26 qañtarda Taraz qalalıq N2 sotında jarıssöz kezeñi bastaldı.

Sud'yanıñ jurnalister qızmetin şekteui

Sud'ya Bağdat Törebekwlı jurnalisterdi sot zalınan şığarıp jiberdi.

«BAQ ökilderin körip otırmız. Beyne jazba qwraldarına tüsirudi bastap otırsızdar, bwl sot zalındağı tärtipti bwzu. Eskertemin olay bolmaydı. Tek qana sottıñ rwqsatımen tüsiruge boladı. Sizder üşin qarama-qarsı zal dayındalğan. Sol zaldan sot otırısın barısın köre alasız. Sonda ötuiñizdi swraymız. Sot şeşimi osı», – dedi sud'ya.

Sud'ya Bağdat Törekbekwlı. Foto: QT / Kültegin Aspanwlı

Sot kabineti arqılı ötiniş bergen jurnalister operatorlardıñ sot zalında qaluın swrağanda sud'ya rwqsat etpedi. Alayda marqwm jäne qamaudağı sottaluşılar men olardıñ zañdı ökilderi, qorğauşıları özin beynejazbağa tüsiruge kelisken.

Jarıssözdiñ tüsten keyingi otırısında sud'ya kijinep, jurnalisterdi sot zalına mülde kirgizbeu turalı şeşim şığardı.

– Jurnalister sot otırısı zalına kiruşi bolmasın. Olarğa arnayı bölingen zal bar. Barlıq tehnikalıq qwraldarmen jabdıqtalğan. Sol zalğa ötui kerek. Bwdan bılay bwl zalğa kiruşi bolmasın, – dedi sud'ya Bağdat Törebekwlı.

Osığan deyin 18 qañtarda da sud'ya jurnalister barğan aşıq sot otırısın konvoy bolmadı degen sebeppen keyinge qaldırğan.

Sot procesinen tıs uaqıtta tilşilerge zalda özin tüsiruge rwqsat bergen twlğalardan pikir aluğa, jağday jaylı taspalap, aqparat taratuğa köpe-körneu kedergi keltirdi. Aşıq sot otırısı aşıq dep jariyalanğanğa deyin sot zalınan aqparat taratu, kelisim bergen ökilderden pikir alu – jurnalistiñ käsibi qwqığı.

Qwqıq qorğau sarapşıları sud'yanıñ bwl şeşimin Konstituciya tıyım salğan cenzurağa jol beru, Qazaqstan Respublikasınıñ 1999 jılğı 23 şildede qabıldanğan N451«BAQ turalı zañnıñ» 14-babın jäne Joğarğı cot 2002 jılğı 6 jeltoqsanda şığarğan N25  «Qılmıstıq ister boyınşa sot isin jürgizu jariyalılığı principin sottardıñ saqtauı turalı» normativtik qaulısın öreskel bwzu dep esepteydi.

Prokurorlar qañtarşılardıñ öli-tirisi de ayıptı dep esepteydi

Eki prokuror kezektesip bir jarım sağattan asa uaqıt jarıssöz alğısözin oqıdı. Söz soñında sotqa sottaluşılarğa jaza swradı:

• Marat Bekbauovqa – 4 jılğa bas bostandığınan ayırudı, alkogolizmnen küştep emdeudi;
• Ashat Täşekeevke – 4 jıl bas bostandığınan ayırıp, qauipsizdgi ortaşa kolloniyada öteudi jäne alkogolizmnen küştep emdeudi;
• Nwrbol Erejepov – 3 jılğa şarttı jaza, raqımşılıqpen 9 ayğa qısqartıp, sot zalınan bosatudı;
• Ğani Kerimbaevqa – 3 jıl ayıru, raqımşılıqpen 9 ayğa qısqartıp, sot zalınan bosatudı swradı.

Al özge bes birdey marqwm: Rays Rısbekov, Nwrswltan Quatbaev,  Erjan Bayjanov, Toqtar Oşaqbaev, Isatay Donbaevtardı ayıptı dep tanudı jäne qılmıstıq jazadan bosatudı swradı.

Taraz qalasındağı qañtarşılardı ayıptap otırğan prokurorlar - Ädilet Üsembaev jäne Ğani Qwrmanov. Foto: QT / Kültegin Aspanwlı

Prokurorlar - Ädilet Üsembaev jäne Ğani Qwrmanov dürbeleñ kezinde qala infraqwrılımına kelgen şığın memleket esebinen ötelsin dedi.

Memlekettik ayıptauşılardıñ bwl wsınısı jöninde jäbirlenuşi retinde tanılğan äkimdik, memlekettik kirister departamenti men Halıq bank ökilderi sot qarauına qaldırdı.

Marqwmdardıñ jaqındarı men zañdı ökilderi prokuror taqqan ayıppen kelispeytinin ayttı. Olar tergeude jalğan kuäler tartılğanın, däleldemelersiz «bes äruaqtan» qılmısker jasap jatqanına narazı. Sonday-aq, sot procesi barısında tergeu organı tarabınan köptegen zañbwzuşılıqtarğa jol berilgeni egjey-tegjeyli söz boldı. Advokattardıñ biri «sayasi astarı» bar is dep bağaladı. Qañtarşılardıñ qorğau jağı sottan marqwmdardıñ isin qısqartıp, aqtaudı swradı.

Jazıqsız ayıptalğanın aytqan azamattar: Marat Bekbauov, Ashat Täşekeev, Ğani Kerimbaev. Foto: QT / Kültegin Aspanwlı

Sot jarıssözi ayaqtalğan soñ ükim oqıluğa tiis.

Osı aptada eldiñ türli öñirinen qañtarşılardıñ jaqındarı Astanağa Bas prokuraturağa barğan. Tarazda öltirilgen bes marqwmnıñ tuıstarı WQK men prokuratura organdarınıñ jergilikti qızmetkerleri elordağa attanuına kedergi jasağanın aytadı.

Tarazda köz jwmğan jäne qamalğan qañtarşılardıñ tuıstarı men zañdı ökilderi. Foto: QT / Kültegin Aspanwlı

The Qazaq Times