Bayden Japoniyanıñ qwrmet qarauılı aldında. Foto: Firstpost

Bügin AQŞ prezidenti Jo Bayden Aziyadağı birqatar iri elderdiñ basşılarımen mañızdı kezdesu ötkizedi. «Törttik dialog» kezdesuine  AQŞ, Japon, Ündistan jäne Australiya jetekşileri qatısadı.

Bayden Qwrama Ştattarğa prezident bolğannan bergi alğaşqı memlekettik saparımen Aziyağa jol tarttı, qazir onıñ saparı Tokioda jalğasıp jatır. Japoniyadan bwrın AQŞ prezidenti Oñtüstik Koreyada eki kündik saparın ötkerip, koreyalıq äriptesterimen qauipsizdik mäselesin talqılap qayttı.

Bwl sapardıñ bastı maqsatı AQŞ-tıñ osı aymaqtağı odaqtastarı jäne serikterimen mämileni şıñday tüsu ekeni belgili. Bügin Ündi-Tınıq mwhitı ekonomikalıq ıntımaqtastıq jaña sauda kelisimderi jariyalanbaq.

Eñ mañızdısı, Japoniyada saparı kezindegi baspasözge arnalğan jiın kezinde Bayden aymaqtağı Qıtaydıñ keñeyu qorqınışı turalı aşıq söz etip, söz arasında: «Tayuanğa (Tayvan') qol salu bolatın bolsa qarumen bolsa da araldı qorğaymız», – degen.

«Amerika Qwrama Ştattarı özine mindetter jüktegen. Biz «Bir Qıtay» sayasatın qoldaymız. Biz bwğan deyin jasalğan isterdiñ barlığın qoldaymız. Biraq, bwl Qıtaydıñ Tayuanğa kirip küş qoldanuğa qwqığı bar degendi bildirmeydi. Sondıqtan biz Japoniya jäne özge eldermen jaqın mämilede twramız. Bwğan jol bermeuimiz kerek», – degen prezident Bayden.

AQŞ prezidenti Japoniya bas uäzirimen (prem'er-ministr) kezdesude  qauipsizdigin qamtamasız etu boyınşa Japoniyanıñ jasap jatqan şaraların tolıqtay qoldaytının da mälimdedi. Bwl qazirgi bilikke kelgen konservanttar üşin asa mañızdı mälimdeme qatarında bağalanıp jatır.

Al, bügin AQŞ-tıñ Ündi-Tınıq mwhittağı eñ mañızdı strategiyası sanalatın «Törttik dialog» elderi kezdesu ötkizedi. Onda aymaqtıñ qauipsizdikke qosa, Ukraina taqırıbı, sonımen birge Qıtaydıñ aymaqtağı qateri jäne Tayuanğa qarata sayasatı talqınıñ bastı taqırıbı boladı.

Bwl künde Qıtay älemdegi eñ iri armiyağa ie eldiñ biri.  Bwl quattı äskeri küşinen paydalanıp Qıtay Tayuanğa şabuıl jasauı mümkin degen boljamdar jii talqığa tüsedi. Qazir, Qıtay qaupin alğa tarta otırıp Japoniya özi Ekinşi düniejüzilik soğıstan keyingi şekteulerden şığıp, öziniñ qorğanıs quatın damıtuğa küş salıp jatır. Osıdan-aq öñirdegi jağdaynıñ kürdeli qayşılıqqa bet alıp bara jatqanın boljauğa boladı.

The Qazaq Times