Karantinde tıyım salınğan merekelik keşterde jürgen belgili twlğalar galereyası. Fotokollaj: QT / aşıq derekterde tarağan suretter boyınşa jasaldı

Qazaq memlekettik akademiyalıq opera jäne balet teatrınıñ direktorı Tayır Qarataev Äliya Nazarbaevanıñ kitabınıñ twsaukeserin teatr ğimaratında ötkizuge rwqsat bergeni üşin jauapqa tartıldı.

Bügin Öñirlik kommunikaciyalar qızmetinde Almatınıñ bas sanitar därigeri Jandarbek Bekşin QT redakciyasınıñ tilşisi swrağına bergen jauabında teatr qabırğasında merekelik jiın ötkizuge jağday jasağan Qarataevqa 670 mıñ teñge köleminde ayıppwl salınğanın mälimdedi. Biraq wyımdastıruşı tarap pen qatısuşı qonaqtar jauapqa tartılmağan. Bekşin bwl swraqtı aynalıp ötuge tırıstı. Äsilinde, ölim sanı jağınan ornı tolmas şığınğa wşıratqan pandemiyanıñ törtinşi tolqını twsında qoğam talqısına tüsken birneşe şaranıñ qatısuşıları men wyımdastıruşıları qatar jazalanıp kelgen. Bwl jolı nelikten tek nısan äkimşiligi swrauğa alınğanı belgisiz.

Osığan deyin Bekşin eks-prezident otbasınıñ müşesi Äliya Nazarbaevanıñ «Küş-qayrat mekeni» («Mesto silı») kitabınıñ twsaukeseri barlıq sanitarlıq şartın saqtay otırıp ötkizilgenin jäne oğan Ashyq jüyesinde «jasıl» märtebesi bar adamdar ğana qatısqanın mälimdegen.

16 qırküyekte Almatıda Äliya Nazarbaevanıñ memuarlıq tolğau kitabınıñ twsaukeseri ötken. Keş Abay atındağı memlekettik opera jäne balet teatrında ötip, ondağan adam jinaldı. Keyingi bir ay işinde redakciya basqa aqparat qwraldarımen birge jiınnıñ zañdılığına bağa berudi swrağan. Departament (SES) basşılığı mäseleniñ qaraluın material joldauğa tiis Almalı audanı äkimdiginiñ monitoring toptarına siltegen.

Bas sanitar-däriger Jandarbek Bekşinniñ 2 qırküyektegi №28 qaulısına säykes, tap sol sätte restorandarğa bir mezette 50 adamğa deyin ğana qabıldauğa rwqsat etilgen edi. Mwnday jağdayda karantindi elemey köp qonaq kütkisi keletin «toy iesine» 50 şaqtı orınmen şekteletin restorannan göri sıyımdılığı äldeqayda ülken teatr zalınıñ 30%-ın jalğa alu tiimdirek ekeni belgili. Toy tärizdi sipatta atalğan keşte Qazaqstanğa belgili twlğalar men şeteldik qonaqtar bolğan. Äleumettik jelilerge tarağan foto-videolardan olardıñ birde-bireui (dayaşılardı qospağanda) betperde taqpağanın köruge boladı.

Belgili atker Doshan Joljaqsınovtıñ 70 jasqa toluına oray ötken mereytoyğa rwqsat bergen Svetlana Modern Cuisine meyramhanasınıñ basşısına 670 910 teñge ayıppwl salındı. Aqorda hatşısı Berik Uäli, sayasattan ketken Imanğali Tasmağambetov, Öskemen qalasınıñ äkimi Jaqsılıq Omar qatısqan jiında da karantin erejesi saqtalmağan.

Sonımen qosa, Bayan Alagözovanıñ joldasınıñ tuğan künin atap ötilgen Le Dome restoranı men qazan ayınıñ ortasında 150-den asa adamnıñ qatısuımen koncert ötken «Arial»  gol'f-klubına ayıppwl salındı. Barlığına ortaq dünie – osığan deyin jiın-toyğa qatısı bar barlıq tarap jauapqa tartılıp keldi de tanımal adamdarğa qatıstı swralğanda tek nısan äkimşiligi jazalandı.

Tamız ayınıñ basında evrey qauımdastığınıñ ökilderi Rixos qonaq üyinde saltanattı jiın ötkizgen. Alğaşında bar jauapkerşilikti monitoring topqa artqan departament (SES – bwrınğı orısşa atauı) qoğam sını köbeygen soñ  karantin şarasın bwzdı degen ayıppen Ortalıq Sinagoga wyımdastıruşılarına, qonaq üydiñ bas direktorı men menedjerlerine ayıppwl salğan. Sol tärizdi qoğam narazılığı men jurnalisterdiñ tolassız saualınan keyin ğana bilik tanımal blogerler, şou-biznes jwldızdarı qatısqan Royal Tulip qonaq üyindegi auqımdı şarağa reakciya bildiruge mäjbür boldı. Jiınğa kelgen 30 adamnıñ 13-ine şekteu şarasın saqtamadı degen ayıppen ayppwl salınğan.

The Qazaq Times