Qañtardağı oqiğa kezinde iz-tüzsiz joğalğan jurnalist Mahambet Äbjan äli tabılğan joq. Osı ay basında elde narazılıqtar uşığıp twrğan twsta – 6 qañtarğa qarağan tüni onı policiya üyinen wstap äketpek bolğan.

Keyinnen tilşi sırtqa şığıp ketken, sol küyi oralmağan. Bwğan deyin policiya onı wstamağanın aytqan.

– Advokat İşki ister ministrligine swrau salğan. Bwğan deyin olar onı wstamağanın aytqan. Biraq bäribir resmi jazbaşa jauap türinde alğımız keledi. Qazir sonı kütip otırmız. Sol jauapqa oray kelesi qadamımız da anıqtaladı. Advokatpen aqıldasamız, - deydi jurnalistiñ äyeli Gülzira Düysembaeva 18 qañtarda Azattıq tilşisine.

Qazaqstandağı narazılıqtardan belsene aqparat taratqan jäne şeneunikterge ötkir swraqtar qoyıp jürgen täuelsiz jurnalist Mahambet Äbjanmen baylanıs tuıstarınıñ aytuınşa, 6 qañtarğa qarağan tüni üzilgen. Sol küni onıñ üyine policiya qızmetkerleri barıp, esikti aşudı talap etken. Özi sol kezde päteriniñ jarığı söndirilgenin, policiyanıñ gaz şaşatının aytıp qorqıtqanın habarlağan. Äyeliniñ aytuınşa, bwdan soñ tilşi üyden şığıp ketken. Sodan oralmağan. Tuıstarı onı policiyanıñ wstağanı-wstamağanın naqtı bilmeydi.

12 qañtarda astana policiyası jurnalisti wstamağanın habarlağan. Äyeliniñ aytuınşa, küyeui äzirge iz-tüzsiz joğalğandardıñ resmi tizimine engizilmegen.

Qazaqstannıñ köptegen öñirin qamtığan qañtar basındağı narazılıqtar men "tärtipsizdikterden" keyin elde iz-tüzsiz joğalğan tuıstarın izdegen azamattardıñ habarlaması äleumettik jelide jii jariyalanıp jatır. Birqatar belsendiler men qwqıq qorğauşılar olardfñ tizimin jasauğa tırısıp jatır. Bilik joğalğandar jöninde statistika aytpadı.

Bwğan deyin qwqıq qorğauşılar bilikti oqiğa jaylı barlıq aqparattı beruge, wstalğandardıñ qwqıqtarın bwzbauğa şaqırğan.