فوتو: azattyq.org

قاڭتارداعى وقيعا كەزىندە ءىز-ءتۇزسىز جوعالعان جۋرناليست ماحامبەت ءابجان ءالى تابىلعان جوق. وسى اي باسىندا ەلدە نارازىلىقتار ۋشىعىپ تۇرعان تۇستا – 6 قاڭتارعا قاراعان ءتۇنى ونى پوليتسيا ۇيىنەن ۇستاپ اكەتپەك بولعان.

كەيىننەن ءتىلشى سىرتقا شىعىپ كەتكەن، سول كۇيى ورالماعان. بۇعان دەيىن پوليتسيا ونى ۇستاماعانىن ايتقان.

– ادۆوكات ىشكى ىستەر مينيسترلىگىنە سۇراۋ سالعان. بۇعان دەيىن ولار ونى ۇستاماعانىن ايتقان. بىراق ءبارىبىر رەسمي جازباشا جاۋاپ تۇرىندە العىمىز كەلەدى. قازىر سونى كۇتىپ وتىرمىز. سول جاۋاپقا وراي كەلەسى قادامىمىز دا انىقتالادى. ادۆوكاتپەن اقىلداسامىز، - دەيدى ءجۋرناليستىڭ ايەلى گۇلزيرا دۇيسەمباەۆا 18 قاڭتاردا ازاتتىق تىلشىسىنە.

قازاقستانداعى نارازىلىقتاردان بەلسەنە اقپارات تاراتقان جانە شەنەۋنىكتەرگە وتكىر سۇراقتار قويىپ جۇرگەن تاۋەلسىز جۋرناليست ماحامبەت ابجانمەن بايلانىس تۋىستارىنىڭ ايتۋىنشا، 6 قاڭتارعا قاراعان ءتۇنى ۇزىلگەن. سول كۇنى ونىڭ ۇيىنە پوليتسيا قىزمەتكەرلەرى بارىپ، ەسىكتى اشۋدى تالاپ ەتكەن. ءوزى سول كەزدە پاتەرىنىڭ جارىعى سوندىرىلگەنىن، پوليتسيانىڭ گاز شاشاتىنىن ايتىپ قورقىتقانىن حابارلاعان. ايەلىنىڭ ايتۋىنشا، بۇدان سوڭ ءتىلشى ۇيدەن شىعىپ كەتكەن. سودان ورالماعان. تۋىستارى ونى پوليتسيانىڭ ۇستاعانى-ۇستاماعانىن ناقتى بىلمەيدى.

12 قاڭتاردا استانا پوليتسياسى ءجۋرناليستى ۇستاماعانىن حابارلاعان. ايەلىنىڭ ايتۋىنشا، كۇيەۋى ازىرگە ءىز-ءتۇزسىز جوعالعانداردىڭ رەسمي تىزىمىنە ەنگىزىلمەگەن.

قازاقستاننىڭ كوپتەگەن ءوڭىرىن قامتىعان قاڭتار باسىنداعى نارازىلىقتار مەن "تارتىپسىزدىكتەردەن" كەيىن ەلدە ءىز-ءتۇزسىز جوعالعان تۋىستارىن ىزدەگەن ازاماتتاردىڭ حابارلاماسى الەۋمەتتىك جەلىدە ءجيى جاريالانىپ جاتىر. بىرقاتار بەلسەندىلەر مەن قۇقىق قورعاۋشىلار ولاردفڭ ءتىزىمىن جاساۋعا تىرىسىپ جاتىر. بيلىك جوعالعاندار جونىندە ستاتيستيكا ايتپادى.

بۇعان دەيىن قۇقىق قورعاۋشىلار بيلىكتى وقيعا جايلى بارلىق اقپاراتتى بەرۋگە، ۇستالعانداردىڭ قۇقىقتارىن بۇزباۋعا شاقىرعان.