Belarus'-Pol'şa şekarası – eki kün bwrınğı jağday. Foto: BBC7

Belarus' pen Pol'şa şekarasında bosqındar dağdarısı sayasi dağdarısqa tirelip, jağday barğan sayın şielenisip baradı. Afrika men Orta Şığıstan kelgen mıñdağan bosqın Pol'şa şekarasına (arı qaray Europa Odağı terroritoriyasına) ötip ketuge tırısıp jatır. Qazir şekaradağı bosqındar dağdarısı jäne onıñ EO men Belarus' qatınasına jasaytın ıqpalımen qatar, mıñdağan bosqındardıñ qalay Belarus'qa barıp qalğanı da aqparat qwraldarınıñ jarısa izdep jatqan taqırıbı.

Birqatar iri aqparat qwraldarı Belarus' biligi bosqındardı maqsattı türde Orta Şığıs pen Afrikadan wşaqpen äkelip, Pol'şa şekarasınan ötuge itermelep otır degen mälimetterdi bwğan deyin de taratıp ülgerdi. Osılayşa Minsk «adamdardı biologiyalıq qaru retinde paydalandı» dep EO tarabınan ayıptar da aytılıp jatır. Keybir aqparat közderiniñ derekterine qarağanda bwl ayıptardıñ negizi de joq emes.

Migranttardıñ Belarus'qa qalay barğanın zerttegen BBC bastağan birqatar batıstıq iri agenttikter Flightradar24 saytındağı derekterdi alğa tartadı. Atalğan saytta ötken aptada ğana Minsk qalasına Stambuldan 21, Dubaydan 12, Bağdattan 1 reys qatınağanın köruge boladı. Aqparat qwraldarı atalğan sayttıñ çarterlik reysterdi ünemi esepke ala bermeytin basa aytadı.

Osı derekke qaray otırıp, jii jasalğan osı reysterdegi jolauşılardıñ köbi migranttar boluı ıqtimal degen boljam şığaradı. Osılayşa olar Minskiniñ astırtın qoldauımen Belarus' jerin EO terroritoriyasına ötetin ötkel qatarında paydalanıp otır dep körsetedi BBC.

Belarus' eline bosqındar qalay kelip qaldı?

Eger osı boljammen soñğı bir-eki jıldağı Minsk ükimetiniñ keybir äreketterin salıstıratın bolsaq şındıqqa janasatının köre alamız. Aytalıq, Lukaşenkonıñ biligi EO tarabınan qatañ sındar, ayıptar men sankciyalardıñ qısımına tap bolıp jatqan kezde, Minsk köptegen elderge viza rejimin alıp tastadı, olardıñ qatarında Siriya, Liviya, Irak, tipti Auğanstan sekildi halqı qarulı qaqtığıstardan şarşap, elin tastap şığudıñ qılday mümkindigin qalt jibermey twrğan elder de boldı.

Al, Türkiyadağı, Süriya men Iraktağı turistik kompaniyalar Belarus' jerine saparlaudı soñğı uaqıttarda ünemi jarnamalap kelgen. Olar Belarus' arqılı EO-da jwmıs pen baspana da wsınatının bolğan. Aqparat qwraldarında mälim bolğanınday bosqındarğa meylinşe oñtaylı bwnday wsınıstar WhatsApp  jelisi arqılı jaranamalanğan. Bwdan tıs Belarus' osı jılı Orta Şığısqa qatınaytın wşaqtardıñ sanın köbeytkeni de bar. Odan qala berdi Belarus'tıñ atalğan elderdegi konsuldıqtarı viza berude keñqoltıqtıq tanıtqan eken.

Osınday köptegen jaytter Belarus'tıñ bosqındardı eline maqsattı türde tartqanın ayqındasa kerek. Özine sayasi, ekonomikalıq qısım tüsirip twrğan Europalıq Odaqqa onıñ eñ ülken qorqınışısı sanalatın bosqındar legimen jauap bergisi kelgendey.

Sonımen, osı jıl işinde äsirese qırküyek, qazan aylarında Belarus' jerine süriyalıq kürdter, auğanstandıqtar, iraktıq, liviyalıq azamattar, tipti elinde qarulı qaqtığıs tolastamay jatqan Afrikadağı Kongo men Efiopiya azamattarı da kelip ülgirgen.

Bosqındar dağdarısınıñ artında twrğan sayasi janjal

Lukaşenko biliginiñ qanday maqsatta Batıs Aziya (batısşa Tayau Şığıs) men Afrikadan bosqındardı panalatqanı belgili bolğanday. Biraq, osı ärekettiñ artında ülken sayasi teke-tirestiñ, tipti osı tires keltirip şığaratın qauipti sayasi janjaldıñ wşı twr. Bwl arada Belarus' ğana emes, onıñ atınan Kreml'diñ de köleñkesi körineri sözssiz. Baspana men tınıştıq izdegen mıñdağan bosqındardıñ tağdırınan ese qaytarğısı kelgen Lukaşenkonıñ piğılı tım qoraş körinip qaldı.

Keşe, Euroodaq atınan Germaniyanıñ qızmetten ketken kancleri Angela Merkel' hanım Resey prezidenti Vladimir Putinge habarlasıp, jağdaydı retteuge küş saluın, Belarus' prezidenti Alensandr Lukaşenkoğa ıqpal etuin swrağan.

Birqatar EO resmileri aqparat qwraldarına bergen pikirinde atalmış dağdarısqa Reseydiñ qatısı bar dep körsetti. Tipti, Pol'şa prem'eri Mateuş Moraveckiy «Bwnıñ artında Putin twr» dep aşıq ayttı. Mäskeu ädetinşe bwnday ayıptaulardı joqqa şığarıp, «qıp-qızıl jala» deuden tanbadı.

The Qazaq Times