Qazaqstanda qazan ayında 57 mıñnan asa adam auırıp, mıñnan astamı köz jwmdı

Qazaqstanda koronavirus pen oğan wqsas pnevmoniyağa şaldıqqandar sanı tağı 1,4 mıñğa artıp, jalpı esebi 1 mln 20 mıñnan astı. Qazan ayında 57 mıñ nauqas anıqtalıp, mıñnan asa adam köz jwmğan. Bwl salıstırmalı türde bıltırğıdan aytarlıqtay joğarı. 

Densaulıq saqtau ministrliginiñ resmi mälimetinşe, elde 31 qazanda koronavirus (KVI+) jwqqan 1395 adam, al 30-ı küni  koronavirus pnevmoniyasına (KVI-) şaldıqqan 28 adam tirkeldi. Sonday-aq, senbide 19 qazaqstandıq aurudan qaytıs boldı. Bıltır däl osı uaqıtta resmi statistikada täuligine köp degende 700-ge deyin nauqas jäne 5-6 ölim jağdayı tirkeletin, stacionarlarda jatqan sırqattar sanı 4 mıñ şamasında edi. Qazir bwl körsetkiş eselep ösip otır, büginde elde 46 mıñ adam (KVI+ boyınşa 40 mıñ, KVI- boyınşa 5 mıñ) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi nemese 13%-ı ädettegidey joğarı dinamikada twrğan bir ğana Almatı (206) qalasına, 14%-ı Pavlodar (198) oblısına tiesili. Astana (151), Qarağandı (138), SQO (143), Aqmola (120), Qostanay (115), ŞQO (95), Almatı oblısı (86), BQO (29), Aqtöbe (37), Şımkent (9),  Qızılorda (26), Türkistan (13), Atırau (20), Jambıl (7), Mañğıstau (2) oblıstarınıñ basım böliginde auruşañdıq twraqtanğanı bayqaladı. Jeksenbide aurudan ayıqqan 1730 adam üyine şığarılğan. 30 qazanda jiını 18 adam qaytıs bolğan.

#COVID_pnevmoniyası mehanikalıq ädispen esepke alınatındıqtan, demalıs künderi medstatistika jüyesi tolıq qamtılmaydı. Saldarınan keyster qatarı senbi jäne jeksenbi, mereke künderi ädettegiden aytarlıqtay az tirkeledi. Qazannıñ 30-ı aqparatı bir täulikke keşigip beriletin koronavirus pnevmoniyasına şaldıqqan 28 nauqas esepke alındı. Vedomstvo dereginşe, bwl küni Almatı oblısı (6),  ŞQO (5), Şımkent (3), Türkistanda (3) anıqtalğan. Sonımen qosa, 57 adam ayığıp şıqqan, tağı bir adam köz jwmğan.

#Jalpı  DenMin deregine qarağanda, emdelip jatqan 48 mıñ nauqastıñ 8 mıñı auruhanada, 38 mıñı ambulatorlıq baqılauda. 590 nauqastıñ jağdayı naşar, ondağı 149 adamnıñ häli öte auır. Bwdan özge 94 sırqat ökpeni jasandı jeldetu apparatımen tınıstap jatır.

Epidkartada «jasıl aymaqtağı» Şımkent, Atırau, Türkistan, Mañğıstau, BQO, Almatı, Jambıl oblıstarınan basqa astana, Qarağandı, ŞQO, Qızılorda, Aqtöbe oblıstarı, Almatı qalası «sarı aymaqqa» ötken. Basqa 4 aymaq (Qostanay, Pavlodar, Aqmola, SQO) twtastay «qızıl aymaqta» twr.

DenMinniñ QT redakciyasına bergen mälimetinşe, indet tarağan 2020-2021 jıldarı PTR testi oñ körsetken 1407 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq, ündistandıq jäne nigeriyalıq ştamdarı anıqtalğan.

Biılğı jaz mezgili qazaqstandıqtar üşin qaralı habarğa tolı boldı. Pandemiya bastalğalı 1,5 jıldıñ işinde anıqtalğan barlıq auruşañdıq pen ölim jağdayınıñ jartısı tek ötken jazda, törtinşi tolqında tirkeldi. Jazğı üş ayda bas-ayağı 420 mıñ adam auırsa, 6,6 mıñnan asa adam köz jwmdı. Qırküyek ayınıñ özinde 99 mıñday nauqas esepke alınğan jäne 2117 adam qaytıs bolğan. Al qazan ayında 57 mıñ auru jäne 1053 ölim jağdayı tirkelgen.

Bıltır 13 naurızdan beri COVID-19 infekciyasın jwqtırğandar qatarı 940 mıñnan, 1 tamızdan bergi koronavirus pnevmoniyası 79 mıñnan asqan. DDSW derekqorı men Wlttıq statistikada Qazaqstanda auırğandar sanı 1 mln 20 mıñğa jetti. Degenmen Ükimet koronavirus pen onıñ pnevmoniyasın eki bölek esepteydi.

Pandemiyanıñ bas-ayağı 20 ayında jalpı virus jwqqandardan 20,5 mıñ adam (KVI+ / U07.1 – 12 114, KVI- / U07.2 – 5036, ilespe aurulardan – 3415) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 37-orınğa ornıqtı.

Ükimettiñ soñğı deregine qarağanda, Qazaqstanda 7,5 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 8,3 mln-nan asadı. Densaulıq saqtau ministri Aleksey Coy qaraşa ayınıñ üşinşi onkündiginen bastap vakcina alğanına jartı jıl ötkender üşin revakciyanaciya nauqanı jürgiziletinin mälimdegen.

The Qazaq Times