Zañdı miting formulası qanday? Jergilikti bilik rwqsat kerek dese, Toqaev tek eskertu jetkilikti deydi

Bügin, beysenbide Toqaev Qazaqstan halqı assambleyası otırısı kezinde «zañsız şeruge qatısqandar zañmen jauapqa tartılatının» mälimdedi. Bwl jöninde Azattıq radiosı habarladı.

– Kim ne dese de, biz qabıldağan «Beybit şeruler turalı zañ» demokratiyağa mañızdı qadam. Beybit şeruge, demonstraciyağa eşkim qarsı emes. Resmi rwqsat aludıñ da qajeti joq. Jinalu üşin tek eskertu qajet. Biraq key azamattar osı talaptı da orındamaydı. Men mwnday zañğa qayşı äreketke barğandarğa qwqıqtıq bağa beriletinin eskertemin. Bas prokuraturanıñ mindeti, azamattarğa zañdı tüsindiru jäne qwzırlı organdar zañğa säykes, qoğam qauipsizdigin qamtamasız etui kerek, – dedi Toqaev.

Toqaevtıñ «zañsız şeruler jaylı eskertui» elde 23 qazanğa belgilengen quğındağı bwrınğı bankir «Mwhtar Äblyazovtıñ mitingisi» qarsañında aytıldı.

Toqaevtıñ emeuiriniñ bir twsı eldegi azamattıq qoğamğa da qatıstı. Sankciyalanbağan miting sanatına jatatın jiındar biliktiñ rwqsat etu-etpeuine emes, jergilikti atqaruşı bilikke zañda közdelgen merzimde eskertpe mänindegi aqparattıñ normağa say joldanbauına baylanıstı. Prezident äkimdikten rwqsat swraudıñ qajeti joq, küni bwrın qwlaqtandırsa jetkilikti degenimen, aldın ala birneşe ret hat joldansa da maqwldana qoyuı ekitalay. Ädette, şeneunikter olarğa narazılıq akciyasına rwqsat berilmegenin aytıp eskertu jasaydı. Keyde şeruge jinalğandar dereu tarqamağan jağdayda policiya küştep wstaydı.

Qazaqstanda bıltır «Beybit jiın ötkizu turalı» zañ qabıldanğan. Alayda qwqıq qorğauşılar men sarapşılardıñ pikirinşe, jaña zañ qabıldansa da is jüzinde eleuli özgeris bolğan joq. Elde azamattardıñ konstituciyalıq beybit jiın ötkizu qwqığı bwrınğıday bwzılıp jatır. Jergilikti bilikte miting ötkizu turalı ötinişti qanağattandırmauğa mümkindik beretin barlıq tetikter saqtalğan. Äkimdiktiñ rwqsatınsız narazılıq ötkizgen azamattar äkimşilik qamauğa alınıp, iri ayıppwldar salınadı. Sayasi reformalar jürip jatqanına senetin jäne soğan ügitteytin bilikşil sarapşılar bäri birden özgermese de aqırındap jaqsarıp keledi deydi.

The Qazaq Times0