بۇگىن، بەيسەنبىدە توقاەۆ قازاقستان حالقى اسسامبلەياسى وتىرىسى كەزىندە «زاڭسىز شەرۋگە قاتىسقاندار زاڭمەن جاۋاپقا تارتىلاتىنىن» مالىمدەدى. بۇل جونىندە ازاتتىق راديوسى حابارلادى.

– كىم نە دەسە دە، ءبىز قابىلداعان «بەيبىت شەرۋلەر تۋرالى زاڭ» دەموكراتياعا ماڭىزدى قادام. بەيبىت شەرۋگە، دەمونستراتسياعا ەشكىم قارسى ەمەس. رەسمي رۇقسات الۋدىڭ دا قاجەتى جوق. جينالۋ ءۇشىن تەك ەسكەرتۋ قاجەت. بىراق كەي ازاماتتار وسى تالاپتى دا ورىندامايدى. مەن مۇنداي زاڭعا قايشى ارەكەتكە بارعاندارعا قۇقىقتىق باعا بەرىلەتىنىن ەسكەرتەمىن. باس پروكۋراتۋرانىڭ مىندەتى، ازاماتتارعا زاڭدى ءتۇسىندىرۋ جانە قۇزىرلى ورگاندار زاڭعا سايكەس، قوعام قاۋىپسىزدىگىن قامتاماسىز ەتۋى كەرەك، – دەدى توقاەۆ.

توقاەۆتىڭ «زاڭسىز شەرۋلەر جايلى ەسكەرتۋى» ەلدە 23 قازانعا بەلگىلەنگەن قۋعىنداعى بۇرىنعى بانكير «مۇحتار ءابليازوۆتىڭ ميتينگىسى» قارساڭىندا ايتىلدى.

توقاەۆتىڭ ەمەۋىرىنىڭ ءبىر تۇسى ەلدەگى ازاماتتىق قوعامعا دا قاتىستى. سانكتسيالانباعان ميتينگ ساناتىنا جاتاتىن جيىندار بيلىكتىڭ رۇقسات ەتۋ-ەتپەۋىنە ەمەس، جەرگىلىكتى اتقارۋشى بيلىككە زاڭدا كوزدەلگەن مەرزىمدە ەسكەرتپە مانىندەگى اقپاراتتىڭ نورماعا ساي جولدانباۋىنا بايلانىستى. پرەزيدەنت اكىمدىكتەن رۇقسات سۇراۋدىڭ قاجەتى جوق، كۇنى بۇرىن قۇلاقتاندىرسا جەتكىلىكتى دەگەنىمەن، الدىن الا بىرنەشە رەت حات جولدانسا دا ماقۇلدانا قويۋى ەكىتالاي. ادەتتە، شەنەۋنىكتەر ولارعا نارازىلىق اكتسياسىنا رۇقسات بەرىلمەگەنىن ايتىپ ەسكەرتۋ جاسايدى. كەيدە شەرۋگە جينالعاندار دەرەۋ تارقاماعان جاعدايدا پوليتسيا كۇشتەپ ۇستايدى.

قازاقستاندا بىلتىر «بەيبىت جيىن وتكىزۋ تۋرالى» زاڭ قابىلدانعان. الايدا قۇقىق قورعاۋشىلار مەن ساراپشىلاردىڭ پىكىرىنشە، جاڭا زاڭ قابىلدانسا دا ءىس جۇزىندە ەلەۋلى وزگەرىس بولعان جوق. ەلدە ازاماتتاردىڭ كونستيتۋتسيالىق بەيبىت جيىن وتكىزۋ قۇقىعى بۇرىنعىداي بۇزىلىپ جاتىر. جەرگىلىكتى بيلىكتە ميتينگ وتكىزۋ تۋرالى ءوتىنىشتى قاناعاتتاندىرماۋعا مۇمكىندىك بەرەتىن بارلىق تەتىكتەر ساقتالعان. اكىمدىكتىڭ رۇقساتىنسىز نارازىلىق وتكىزگەن ازاماتتار اكىمشىلىك قاماۋعا الىنىپ، ءىرى ايىپپۇلدار سالىنادى. ساياسي رەفورمالار ءجۇرىپ جاتقانىنا سەنەتىن جانە سوعان ۇگىتتەيتىن بيلىكشىل ساراپشىلار ءبارى بىردەن وزگەرمەسە دە اقىرىنداپ جاقسارىپ كەلەدى دەيدى.

The Qazaq Times0