Qayrat Qılışev «subbotaj» narazılığında. Foto: Petr Trocenko / Azattıq radiosı

Juırda atışulı «13-tiñ sotı» boyınşa bes jılğa qamau jazasına kesilgen, qwqıq qorğauşılar «sayasi twtqın» dep tanığan azamattıq belsendi Qayrat Qılışevtiñ eki büyregi suıqtap, türmeniñ medicinalıq bölimine jatqızılğanı habarlandı.

Bwl turalı belgili qwqıq qorğauşı Baqıtjan Töreğojina Facebook jelisindegi paraqşasına 20 qazanda jariyalağan jazbasında jazdı.

«SI-18 mekemesi suıq bolğandıqtan bügin (20 qazan) Qayrat Qılışevtiñ eki büyreginen pristup wstap, medicinalıq bölimge jatqızıldı. Densaulıq saqtau ministrligi, Qılışev tiisti em-şarasın alıp jatır ma, aqparat berudi swraymız?» dedi Töreğojina.

Azattıq radiosınıñ jazuınşa, Qayrat Qılışevtiñ äyeli Janar Sarıqwlova qwqıq qorğauşınıñ jazbasınan keyin särsenbi keşke qaray küyeuimen telefon arqılı söylesken.

«Keşe Qayratqa bastıqtıñ kabinetinen habarlasqızıptı. «Bäri jaqsı, uayımdamañdar» dep aytsın dep. «Jaqsı qarap jatır» dedi. Däri-därmekterdiñ atın jazıp aldım. Endi solardı aparamın. Auruı qattı asqınıp ketpegen siyaqtı. Qayrat bwrın büyrek auruına şağımdanğan emes. Birinşi ret osınday auruı jöninde aytıp otır» degen «sayasi twtqınnıñ» joldası Azatttıq tilşisine.

Osığan deyin QDT jaqtası retinde bilik rwqsat etpeytin sayasi mändegi narazılıq jiındarğa qatısıp jürgen Qayrat Qılışev bıltır tamızda qamauğa alınıp, biıl qazan ayınıñ ortasında Qılmıstıq kodekstiñ 405-babınıñ 1 jäne 2 bölimderi boyınşa («Tıyım salınğan wyım isin wyımdastırdı jäne aralastı») ayıptaldı. Özi qatarlı bir künde sottalğan 13 belsendiniñ arasında bes jıl türme jazasın arqalağan tört adamnıñ biri osı – Qılışev. Ol ayıptau aktisimen kelispeydi, azamattıq wstanımı üşin «biliktiñ tıqsıru maqsatında jasağan sayasi astarı bar ükim» dep esepteydi.

«Jüyeniñ qwrbanına aynaldıq» degen tört belsendi (Ashat Jeksebaev, Noyan Rahımjanov, Qayrat Qılışev, Abay Begimbetov) jäne osığan wqsas ayıppen qırküyekte sottalğan Wlasbek Ahmetov 18 qazanda BWW men Europarlamentke aşıq hat joldağan. «Beseudiñ hatı» atalğan bwl oqiğa ötken ğasırdağı kommunistik sayasattıñ ozbırlığın eske tüsirdi.

The Qazaq Times