BWW Bas Assambleyasınıñ dauıs beru otırısı. 7 säuir beysenbi. Foto: VOA

Batıs jartı şardıñ uaqıtımen beysenbi, 7 säuir küni, Birikken Wlttar Wyımı Bas Assambleyasında Reseydi BWW-nıñ Adam qwqıqtarı keñesindegi müşelik ornınan şığarıp tastau boyınşa dauıs berildi. Reseydi keñesten şığaruğa 93 el qosıldı, Qazaqstan men Qıtaydı qamtığan 24 el qarsı dauıs berdi, 58 el dauıs beruden qalıs qaldı. Bwnday qarar Reseydi «adam qwqıqtarın auır äri jüyeli türde bwzğadı» jäne Ukrainada halıqaralıq qwqıqtı öresken bwzdı degen ayıpqa baylanıstı qaralğan edi.

Bas Assambleyadağı mwnday mäselelerde qaulı qabıldau üşin bir tarap jalpı dauıs bergenderdiñ üşten eki böleginen köp boluı tiis. Bwl arada qalıs qalğandar eseptelmeydi. Sonımen, nätijede 24-ke qarsı 93 dauıstıñ basımdığımen Reseydiñ BWW Adam qwqıqtarı keñesindegi müşeligi uaqıtşa toqtatıldı.

Ädette halıqaralıq qauımdastıqtıñ atalmış mañızdı keñesinen bir eldi şığarıp tastau öte sirek jağday. Dauıs beru aldında Ukrainanıñ BWW-dağı ökili Sergey Kislitya: «Resey normadan tıs äreket etti – adam qwqıqtarın bwzıp qana qoymay, halıqaralıq beybitşilik pen qauipsizdiktiñ negizin şayqalttı», – dedi. Soğan qosa Kislitya 7 säuirdiñ Ruandadağı genocid künine tura keletinin eske salıp, älemdegi bwnday jağdaylardıñ wdayı qaytalanuında jahandıq beybitşilik pen qauipsizdikke, adam qwqığına qorğan boludağı jauapkerşiligin jetkilikti deñgeyde orındamay otırğan halıqaralıq qauımdastıqtıñ da jauapkerşiligi bar degen közqarasın ayttı.

Jenevada ornalasqan BWW-nıñ Adam qwqıqtarı jönindegi keñesine müşe 47 memleket bar. Bas Assambleya jasırın dauıs beru arqılı saylaydı. Qazirgi uaqıtta Resey Adam qwqıqtarı jönindegi keñestiñ müşesi, onıñ üş jıldıq merzimi 2023 jıldıñ 31 jeltoqsanında ayaqtaladı. Onıñ müşeligin uaqıtşa toqtatuğa AQŞ köbirek sebep boldı. Onıñ bastamasına 60-tan astam el qol qoydı.

Al, Mäskeu bolsa Resey äskerileri adam qwqıqtarın bwzdı jäne zorlıq-zombılıq jasadı degen ayıptardı birneşe ret joqqa şığardı. Bwnı Mäskeu biligi «jalğan aqparat» jäne Reseydi jamanattı körsetu üşin jasap otırğan Ukrainanıñ äreketi dep sanaydı.

The Qazaq Times