Varşavadağı narazılıq şarasına 100 mıñnan astam adam qatıstı. Foto: Nokta.md

Ötken beysenbide Pol'şa Kostituciyalıq sotı «işki zañ EO zañdarınan joğarı twradı» degen şeşim şığardı. Bwl eldegi Europa birligin qalaytın pol'şalıqtar men qatar Europalıq Odaq ökilderin de alañdattı. Sebebi, olar Pol'şa Joğarı sotınıñ şeşimi EO blogına «ıdırau qaupin töndiredi» dep sanaydı. Apta soñında Pol'şanıñ EO müşeligin qoldauşı azamattardıñ narazılıq şaraları bükil el köleminde ötti.

Jeksenbi küni Varşavada ötken Pol'şanıñ EO müşeligin qoldauşılardıñ narazılıq şarasına şamamen 100 mıñ adam qatıstı. Tipti, narazılıq şarasında eldiñ jäne EO-nıñ bwrınğı lauazımdı twlğaları da boldı. Olar qazirgi Pol'şa biligi eldi Europa Odağınan alıstatuğa äreket etip jatır dep sındadı.

EO ökilderi Euroodaq zañdarınıñ qwqıqtıq basımdığı – europalıq integraciyanıñ negizgi tiregi dep sanaydı. Aytalıq, Çehiyanıñ EO-dağı komissarı Vera Jurova düysenbidegi (11 qazan) mälimdemesinde: «Eger biz bükil Europada birdey qwrmetteletin «EO-da teñdik» principin saqtamasaq, bükil Europa ıdıray bastaydı», – degen oyın aytqan.

EO Ädilet komissiyasınıñ müşeleri aqparat qwraldarına bergen jauabında, Europalıq sot tarabınan Pol'şanıñ bwl äreketine qarsı jauap beriletini aytılğan. Onda tipti kündelikti qarjılıq sankciyalar da salınuı mümkin eken, aytalıq Pol'şa tarabı EO-nıñ qwqıqtıq basımdığın moyındağanğa deyin künine 1 mln AQŞ dolları kölemindegi sankciya salınuı mümkin.

Pol'şa prem'er-ministri Mateuş Moraveckiy bwl taqırıptı Pol'şa Joğarı sotınıñ qarauına naurız ayında bergen bolatın. Şildede Moraveckiy EO sotınıñ eki şeşimin orındaudan bas tarttı. Europalıq sot bolsa Pol'şa ükimetin sot töreligine aralastı dep ayıptğan bolatın. Prem'er-ministr Moravecskiy bwnı joqqa şığarıp, Pol'şanıñ odaqtan şığuğa wmtılmaytının aytqan edi.

Pol'şa Joğarı sotınıñ şeşimin qoldauşılar da narazılıq şaraların ötkizip, Pol'şanıñ EO şeşimine qarsı şığuğa qwqığı bar dep wrandattı. Olar öz eline EO tarabınan qwqıqtıq aralasudı ayıptaydı.

Varşavadağı Europalıq sırtqı qatınastar jönindegi keñestiñ sarapşısı Piotr Buras «Amerika dauısınıñ» jurnalisine bergen pikirinde: «Bryussel'de bolsın nemese Europadağı köptegen elderde EO-nıñ Pol'şağa qarsı qısımı onı odaqtan bas tartuğa itermeley me degen alañdauşılıq bar. Meniñ oyımşa bwl – twzaq. Şın mänisinde «Polyak Breksitiniñ» qaupi asıra körsetilgen. Pol'şanıñ 80 payızdan astam halqı Euroodaqqa müşe boludı qoldauşılar. Pol'şa işki narıqqa, sonday-aq EO qarajatına, onıñ işinde qalpına keltiru (COVID-19 pandemiyasınan) qorlarına süyenedi», – degen. YAğni, onıñ aytuınşa Pol'şa bwl äreket arqılı EO-dan qol üzudi qalamaydı.

Europa Odağınıñ COVID-19 pandemiyasınan qalpına keltiru qorınıñ qarajatı 66 milliard dollardı qwraydı. Europalıq Odaq Pol'şa sot jüyesine özgeris engizbese, osı qordı wstaymız dep qorqıttı. Jalpı EO men onıñ qwramındağı keybir elder arasında zañ üstemdigi, baspasöz bostandığı jäne azşılıqtıñ qwqıqtarı boyınşa mwnday qayşılıq bolıp twradı. Aytalıq, Pol'şa, Vengriya siyaqtı birqatar elderdiñ odaqqa ökpeli bolğna kezderi köp.

«Negizinde, qazirgi kezde bizdiñ küresimizdiñ bastı bağıtı basqa, – deydi  Piotr Buras: – YAğni, populistik nemese avtoritarlıq ükimet Europalıq Odaqtıñ irgetasın şayqauğa äkeletin europalıq standarttar men europalıq zañdardı elemeuge mümkindik beretin äreketterge bardı. Endigi mäsele EO bwğan jol bere me, joq pa degende».

Şınında, Pol'şa biligi EO irgesin şayqaltatın qadam jasağanı ras. Biraq, EO tarabınan jasalatın qısım da eskerilui kerek. Aldağı uaqıtta Pol'şa biligi odaqtıq ortaq princpterine bağınğısı kelmese auır jazaları da joq emes, Europalıq Komissiya onı eskertip te qoydı. Degenmen, Pol'şa ükimeti öziniñ «qateligin» tüzeuge nietti ekenin de bayqatıp jatır.

The Qazaq Times