Körneki suret. Foto: iStock

Londondağı ICE birjasında jeltoqsan ayına arnalğan Brent markalı mwnaydıñ f'yuçers qwnı üş jıldan beri alğaş märte barreline 84,06 dollarğa belgilendi.

Soñğı ret Brent markalı mwnaydıñ bağası 2018 jılğı qazan ayında barreline 84 dollardan asqan edi. Osılayşa, 6 qazanda 83 dollarğa wlğayğan Brent marka bäsi artıp, qazan ayınıñ ekinşi dekadasında 84 dollarğa jetti.

Brent markasınan bölek qaraşa ayına arnalğan WTI markalı mwnaydıñ f'yuçers qwnı da ösip, barreline 81,22 dollardı körsetti.

Sarapşılar gaz bağasınıñ ösui mwnayğa swranıstı arttırğanına senimdi. Europada tabiği gazdıñ f'yuçer qwnı tamız jäne qırküyek aylarında eki esege artıp, al qazannıñ 6-sı tarihi rekord körsetkişinde 1 mıñ kub metri 1925 dollarğa deyin jetken. Qazir Europada gaz bağası tömendep keledi, biraq twtınuşılardıñ köbi odan anağwrlım arzan mwnay önimderin qoldana bastağan.

OPEK+ monitoring komitetine kiretin ministrlerdiñ mwnay öndirudi täuligine 400 mıñ barrel'ge arttıru jönindegi josparın arı qaray jalğastıru jönindegi şeşiminen keyin mwnay bağası öse bastadı.

Osı aydıñ basındağı Energetika ministrliginiñ resmi mälimetinşe, OPEK+ ayasında Qazaqstan belgilengen kvota negizinde qazan ayında täuligine 1,524 mln, qaraşada künine 1,540 mln barrel' öndire aladı.

The Qazaq Times