تۇركىستان وبلىسىندا جۇرگىزۋشىلەر جانارمايدىڭ قىمباتتاۋىنا، بالالارعا ۆاكتسينا سالۋعا، اقىلى جولدارعا قارسىلىق ءبىلدىرىپ جاتىر. بۇل اقپاراتتى ازاتتىق راديوسى حابارلادى.

باسىلىم مالىمەتىنشە، 30 قىركۇيەكتە تۇركىستان قالاسىنان قىزىلورداعا قاراي شىعاتىن جولدا قاراشىق اۋىلى ماڭىندا ەلۋ شاقتى جۇرگىزۋشى قارسىلىق بىلدىرۋگە جينالعان، بىراق پوليتسيا ولاردى قايتارۋعا تىرىسىپ جاتىر. ازاتتىق بۇل حاباردى وقيعا ورنىندا جۇرگەن جۇرگىزۋشىلەردىڭ ءبىرى اباي تورەحانوۆ ايتقانىن جازدى.

"قاراپايىم حالىق، باسىم بولىگى شوپىرلار تۇرمىز. جولدىڭ اقىلى بولۋىنا قارسىمىز، بالالارعا ۆاكتسينا سالۋعا، جانارمايدىڭ قىمباتتاۋىنا قارسىمىز. ەشقانداي توبەلەس جوق. بىراق پوليتسيا "قايتىڭدار، ۇيتىڭدەر، بۇيتىڭدەر" دەپ جاتىر" دەدى جۇرگىزۋشى اباي تورەحانوۆ ازاتتىق تىلشىسىنە.

"ونىڭ ازاتتىققا جىبەرگەن ۆيدەوسىندا تراسسا ماڭىندا جۇك كولىكتەردىڭ توقتاپ تۇرعانى، ونداعان ادام مەن بىرنەشە پوليتسيا قىزمەتكەرىنىڭ جۇرگەنى بايقالادى. اقپاراتقا قاراعاندا، پوليتسيا ولارعا فوتو-ۆيدەو تۇسىرۋگە تىيىم سالعان. بەرىك ەردەنوۆ ەسىمدى جۇرگىزۋشىنىڭ ازاتتىققا ايتۋىنشا، "پوليتسيا مازالاي بەرگەن سوڭ جۇرگىزۋشىلەر كولىكتەرىنە كىرىپ الىپ، نارازىلىقتى سوندا جالعاستىرعان". ازىرگە جۇرگىزۋشىلەر تاراماعان. نارازىلار وقيعا ورنىندا بايلانىستىڭ ناشارلاعانىن دا ايتىپ جاتىر" دەپ جازدى ازاتتىق راديوسى.

باسىلىمنىڭ جازۋىنشا، ەلدە كەيىنگى كۇندەرى جۇرگىزۋشىلەردىڭ نارازىلىققا شىعىپ، جانار-جاعار ماي باعاسىن قىمباتتاتپاۋدى تالاپ ەتەتىنى جايلى اقپارات تاراعان. وسى اپتادا شىمكەنتتە جۇرگىزۋشىلەر بەلسەندىسى ۇستالىپ، ولاردى قولداعانداردان پوليتسيا تۇسىنىكتەمە العان.

The Qazaq Times