Mamırdıñ 11-i küni eks-prezident Nwrswltan Nazarbaev Türkistan qalasına issaparmen bardı. Bügin biz bwrınğı memleket basşısın kütip alu şaralarına qanşa qarjı jwmsalğanın aytpaqpız.

NAZARBAEVTIÑ TÜRİKSTANĞA SAPARI

Memlekettik satıp alular portalında jariyalanğan mälimetke süyensek, Türkistan qalası äkimdiginiñ Mädeniet jäne tilderdi damıtu bölimi  Nwrswltan Nazarbaevtıñ issaparına tikeley jäne janama qatısı bar şaralarğa birneşe tender jariyalağan. Atap aytqanda, eks-prezident aşıluına qatısatın ğimarattardı bezendiruge, teatrlandırılğan qoyılım qoyuğa jäne wyımdastıruğa byudjetten 34 651 111 (salıqtı qosqanda 38 809 244 22)  teñge qarjı bölinip, tender ötkizilgen. Onı «SUNNY FIELD COMMUNICATIONS» JŞS kompaniyası wtıp alğan.

Uchet.kz servisindegi derekterge qarağanda, kompaniyanı Jamanqwlova Aynwr Mamırhanqızı basqaradı. «SUNNY FIELD COMMUNICATIONS» JŞS 2007 jılı tirkelgen. Aşıq derekközde «jarnamamen aynalısatın şağın käsiporın» dep körsetilgen kompaniya 2010-2017 jıldarı aralığında eşqanday salıq tölemegen. 2018-2021 jıldarı 34 926 735 teñge salıq tölegen. Bwdan bölek, Jamanqwlova Aynwr Mamırhanqızınıñ atında «RBS KNOWLEDGE» jäne «GR Kompani» JŞS kompaniyaları bar. Bwl eki kompaniyanıñ ekeui de memlekettik satıp alularğa qatıspaydı.

Bwğan qosa, Nwrswltan Nazarbaev qatısqan Türkistan muzıkalıq drama teatrınıñ aşılu räsimine jalpı somması 89 285 714 (salıqtı qosqanda 100 000 000)  teñgelik tender jariyalanğan. Onı «A+A Idea Fabric» JŞS kompaniyası wtqan. Bwl kompaniya 2018 jılı Almatı qalasında tirkelgen. Basşısı Orınbasarov Quanış Batırbaywlı. Öner salasında qızmet körsetetin kompaniya 2018 jıldan beri 545 205 708 teñge salıq tölegen. Eki tenderdiñ ekeui de «tikeley bir közden satıp alu» täsili boyınşa ötken.

 

TÜRKİSTAN SAPARINDA NAZARBAEV QAYDA BARDI?

İssapar barısında Nwrswltan Nazarbaev Muzıkalıq drama teatrdıñ aşıluına qatısıp qana qoymay, su jaña teatrda «Şañıraq» miniatyurasın tamaşaldı. Bwdan bölek, ol twñğış prezident sayabağın abattandıru jwmıstarımen tanısıp, Qazaq handığı memorialdıq keşeniniñ aşılu saltanatına qatısqan jäne «Äziret Swltan» tarihi-mädeni qorığı aumağındağı etnoauılğa barğan. Keruen Saray turistik keşeni men «Altın Samrwq» äuedegi teatrında Qız quu jäne teatrlandırılğan su şouı qoyılımdarın körgen. Nwrswltan Nazarbaevtı kütip  alıp, şaharmen tanıstıru räsimine 124 million 212 mıñ 449 teñge qarjı jwmsalğan.

JARTI MILLIARD TEÑGE JWMSALĞAN SAMMIT

Türkistanda naurız ayında bolğan türki keñesi sammitin wyımdastıru da joğarıda atalğan «SUNNY FIELD COMMUNICATIONS» JŞS jäne «A+A Idea Fabric» JŞS kompaniyaların aynalıp ötpedi. Sammitke baylanıstı jariyalanğan tenderlerdi däl osı eki kompaniya jeñip alğan.

«SUNNY FIELD COMMUNICATIONS» JŞS VIII türki keñesi sammitine baylanıstı ötken eki birdey tenderdi wtıp alğan. Onıñ biri 90 255 952.42 teñge bolsa, ekinşisi 147 726 713.12 teñge. Bwl eki tender de sammit ayasında etnoauıl galereyasın bezendiruge, tehnikalıq jabdıqtauğa, şaranı wyımdastıru men ötkizuge arnalğan.

Al «A+A Idea Fabric» JŞS wtqan 346 100 000.00 teñgelik tender sammit ayasında koncerttik bağdarlama dayındauğa arnalğan. Bwl tenderdiñ qarjısı bastapqıda 500 000 000 teñge bolğan. Biraq türki keñesi sammiti epidemialogiyalıq ahualğa baylanıstı onlayn formatta ötetin bolğandıqtan qısqarğan. Bwl üş tenderdi qosıp alğanda türki keñesi sammitine 584 million 082 mıñ 665 teñge qarjı jwmsalğan.

Sayasattanuşı Äzimbay Ğali qazirgidey qiın-qıtau kezeñde sammit, toyğa qarjı böludi toqtatu kerek dep esepteydi. Onıñ sözinşe, mwnaydıñ aqşasın şaşudı toqtatatın uaqıt jetti.

"Osı uaqıtqa deyin eldiñ imidjin jasau üşin sammit jasadıq. Bağdarlamalarımızdı ayttıq. Endi mal şaşudı toqtatu kerek. Eldiñ barlığına bir-bir sammit ötkizudiñ qajeti joq. Qazir merekelik şaralarğa bölinip jatqan qarjınıñ jartısı wrlanadı. Ötirik bolsa Äzimbaydı qudalasın. Sondıqtan mal şaşpaq el bolmauımız kerek. Qazir biz jer baylığın şaşıp jatırmız. Al eñbek önimdiligi joq. Eñbek önimdiligi joğarı bolıp, demokratiyalıq bilik otırsa baylıqtı şaşuğa rwqsat. Qazir bwnıñ jartısı wrlanatını anıq", - deydi Ğali. 

Nwrswltan Nazarbaevtıñ saparı men türki keñesi sammitine jwmsalğan qarjını qosa eseptegende 708 million 302 mıñ 114 teñge boladı. Halıqtıñ äleumettik jağdayı naşaralap, qımbatşılıq dendep twrğan uaqıtta bwl qarjığa ne isteuge bolar edi? Mısalğa, bwl qarjığa 64 391 balağa 11 mıñ teñgeden bir rettik kömek nemese 16 665  adamğa eñ tömengi jalaqı mölşerinde (42 500 teñgeden) beruge bolar edi. Bwdan bölek, Türkistan qalasınan 47 otbasına qwnı 15  000 000 teñgelik 4-5 bölmeli üy aluğa boladı.

Jalpı, Türkistan oblısı Qazaqstan boyınşa eñ kedey aymaq. Oblısta ärbir 10-şı adam kedeylik şeginde ömir süredi. Balalar kedeyligi boyınşa da Türkistan oblısı köş bastap twr. YUNISEF esebine säykes, Qazaqstanda 1 millionğa juıq bala (916 mıñı) äleumettik jağdayı tömen otbasılarında tärbielenude. Onıñ 13,8 % däl osı Türkistan oblısına tiesili.

Bwl kontent AQŞ damu agenttigi (USAID) arqılı amerika halqınıñ kömegimen "MediaCAMP – Ortalıq Aziya bağdarlaması" ayasında dayındaldı. The Qazaq Times portalı aqparattıñ mazmwnına tikeley jauaptı jəne aqparat USAID-tıñ nemese AQŞ ükimetiniñ, sonımen qatar Internews wstanımına say kelmeui mümkin.

The Qazaq Times