بىرنەشە اي بويى شىڭجاڭداعى تۋىستارىنا اراشا سۇراپ، الماتىداعى، استاناداعى قىتاي كونسۋلدىعى الدىندا نارازىلىق اكتسياسىن وتكىزىپ جۇرگەن ءبىر توپ ازامات ەندى پرەزيدەنت قاسىم-جومارت توقاەۆقا قايرىلدى. ولار مەملەكەت باسشىسىنىڭ اتىنا حات جازىپ، قىتايداعى تۋىستارىن قازاقستانعا اكەلۋگە ىقپال ەتۋدى جانە وزىمەن كەزدەسۋگە مۇمكىندىك بەرۋدى سۇرادى. بۇل جايلى 29 قىركۇيەك كۇنى ازاتتىق راديوسى جازدى. 

باسىلىم اقپاراتىنا قاراعاندا، نارازى توپ وكىلى بايبولات كۇنبولاتۇلىنىڭ 29 قىركۇيەكتە حاتتى پرەزيدەنت اكىمشىلىگىنىڭ قىزمەتكەرلەرى قابىلداپ العانىن ايتقان.

"[پرەزيدەنت] مۇمكىندىك بولسا بىزبەن كەزدەسسە ەكەن. حاتتى الماتىدان كەلگەن ون ادام تۇگەل بارىپ تاپسىردىق. وسىعان دەيىن بۇۇ قازاقستانداعى وكىلدىگىنە، سىرتقى ىستەر مينيسترلىگىنە حات تاپسىرعانبىز. ءسىم ءبىزدىڭ شاعىم بويىنشا "قىتاي تاراپىنا نوتا جولدادى" دەيدى. بىراق ناتيجە بولماعانىنا قارنىمىز اشادى" دەدى بايبولات كۇنبولاتۇلى.

شىڭجاڭداعى تۋىستارىن قايتارۋدى تالاپ ەتىپ جۇرگەندەر نارازىلىق اكتسيالارىن الماتى قالاسىندا باستاعان. ولار 224 كۇن بويى الماتىداعى قىتاي كونسۋلدىعىنا بارىپ، بەيجىڭنەن شىڭجاڭداعى تۋىستارىن قازاقستانعا جىبەرۋدى تالاپ ەتكەن. نارازىلار ءۇش اپتا كونسۋلدىق الدىندا تۇنەگەن ەدى. ولاردىڭ ايتۋىنشا، جەتى ايدان استام ۋاقىتقا سوزىلعان اكتسيا بارىسىندا قىتاي كونسۋلدىعىنان بىردە-ءبىر ادام شىعىپ، جاۋاپ بەرمەگەن. ال وزدەرى "زاڭسىز جيىن وتكىزدى" دەگەن ايىپپەن اكىمشىلىك جاۋاپقا تارتىلعان.

بۇۇ ەسەبىنشە، قىتاي شىڭجاڭدا لاگەرلەر اشىپ ميلليونعا جۋىق ۇيعىر، قازاق جانە باسقا دا مۇسىلمانداردى جازىقسىز قاماعان. باتىس ەلدەرى بەيجىڭنىڭ شىڭجاڭداعى ارەكەتىن «گەنوتسيد» دەپ تانىعان. قىتاي بيلىگى بۇل ايىپتاردى جوققا شىعارىپ كەلەدى. قازاقستان بيلىگى قىسىم-قۋدالاۋعا تۇسكەن قانداستاردىڭ جاعدايى تۋرالى تۋىستارىنىڭ (قازاقستان ازاماتى سانالاتىن – QT) جۇزدەگەن ارىزىنا قاراماستان مۇنى «قىتايدىڭ ىشكى شارۋاسى» دەپ سانايدى. تاۋەلسىز ساراپشىلار مۇنى «ەستيتىن ۇكىمەتتىڭ» (قازاقستاننىڭ – QT) ەكونوميكالىق-ينۆەستيتسيالىق مۇددەنى قانداستار ءومىر-قۇقىعىنان جوعارى قويعانىن اڭعارتادى دەپ توپشىلايدى.

The Qazaq Times