3 قىركۇيەكتە قازاقستان ۇكىمەتى مەن رەسەيلىك «سبەر» كومپانياسى تاراپتارى قول قويعان E-Gov پورتالىن GovTech تسيفرلىق مودەلىنە كوشىرۋ تۋرالى مەموراندۋمنىڭ تولىق ءماتىنى جاريالاندى. ونداعى اقپارات بويىنشا، قازاقستان رەسەيلىك «سبەربانكتىڭ» IT-پلاتفورماسىن 500 ملن دوللارعا ساتىپ الادى. بۇل قارجىنى «سبەر» قازاقستان ۇكىمەتىنە قارىزعا بەرمەك.
قازاقستاننىڭ نورماتيۆتىك-قۇقىقتىق اكتى-قۇجاتتارى جاريالاناتىن «ادىلەت» پورتالىنداعى قۇجاتتا وتاندىق «ۇلتتىق اقپاراتتىق تەحنولوگيالار» اق مەن رەسەيلىك «سبەربانك» جاق اراسىندا قارىز جونىندە كەلىسىم جاساۋدى قاراستىرادى. قۇجاتتا 500 ملن اقش دوللارىنا پارا-پار قاراجات رەسەيلىك رۋبل كۇيىندە رەسەي جاعىنا قاجەتتى قۇجاتتاردىڭ بارلىعى ۋاقىتىندا بەرىلگەن جاعدايدا 2022 جىلدىڭ ءبىرىنشى توقسانىنىڭ سوڭىنا دەيىن بەرىلەدى دەپ كورسەتىلگەن.
E-gov-قا بالاما GovTech جۇيەسى «سبەردىڭ» Platform V پلاتفورماسىنا نەگىزدەلىپ جاسالادى. سونداي-اق مەموراندۋم 31 قازانعا دەيىن كونتسورتسيۋم قۇرۋدى دا قاراستىرادى. قۇجاتتا ERG كومپانيالار توبىنا ەنشىلەس BTS Digital جشس ستراتەگيالىق ارىپتەس رەتىندە كورسەتىلگەن.
مەموراندۋم تسيفرلىق دامۋ، يننوۆاتسيا جانە اەروعارىش ونەركاسىبى ءمينيسترى باعدات ءمۋسيننىڭ egov رەسەيگە بەرىلمەيدى دەگەن تۇجىرىمىنا كۇمان كەلتىرەدى دەپ جازدى قازتاگ اگەنتتىگى.
«اتالعان مەموراندۋم اياسىندا قر ۇكىمەتى: ... GovTech پلاتفورماسىن «ەلەكتروندى ۇكىمەت» اقپاراتتىق-كوممۋنيكاتسيالىق پلاتفورماسىنىڭ نەگىزگى بولىگى رەتىندە بەكىتەدى» دەلىنگەن ۇكىمەت ماقۇلداعان قۇجاتتا.
مەموراندۋم ماتىنىمەن تانىسقان ەكونوميست ولجاس قۇدايبەرگەنوۆ Facebook جەلىسىندەگى پاراقشاسىندا جوباعا كۇمان كوپ دەپ جازدى.
«500 ملن دوللار قارىز، ونىڭ ۇستىنە پلاتفورما جاساۋعا، ونىڭ ۇستىنە سبەردىڭ وزىنەن الۋدىڭ قاجەتى جوق. مۇنداي دۇنيەلەر جاسالسا، كەلىسسوز جاساي الاتىنداي ءوز اقشامىزعا جاسالۋى كەرەك. ايتپەسە نەسيە الۋشىنىڭ ساۋدالاسۋعا شاماسى كەلمەي قالادى. ...مۇنداي كونسترۋكتسيادا جوبا ءاربىر پارامەتر بويىنشا كۇماندى بولىپ شىعادى!» دەپ جازدى ساراپشى.
قىركۇيەك ايىنىڭ باسىندا قازاقستان-رەسەي باسشىلارىنىڭ قاتىسۋىمەن «ەستيتىن ۇكىمەت» رەسەيلىك سبەر كومپانيالار توبىمەن قازاقستاننىڭ تسيفرلىق ۇكىمەتىنە ارنالعان پلاتفورما قۇرۋ جونىندە مەموراندۋمعا قول قويعاننان كەيىن قوعامدا نارازىلىق كوڭىل-كۇي ارتقان. دەسە دە قازىرگى ۇكىمەت قۇرامى ءتۇرلى ادىسپەن «اماناتتاۋ» قادامىنىڭ دۇرىستىعىن جەتكىزۋگە تىرىسىپ، رايىنان قايتپاي وتىر. ءىت مامانداردىڭ ءبىر توبى «جابىق كابينەت جاعدايىندا قابىلدانعان شەشىمدى» سىنادى، ولار پلاتفورما دايىنداۋعا ۇمىتكەرلەردىڭ اشىق تاسىلمەن تاڭدالماۋىنا نارازى.
ەكى اپتا بۇرىن تسيفرلىق دامۋ ءمينيسترى باعدات مۋسين سبەر پلاتفورماسى ەل ءۇشىن «ەڭ قولايلى جۇيە» جانە «ۇقك تالاپتارىنا سايكەس كەلەد» دەپ مالىمدەگەن. ونىڭ ايتۋىنشا، جوباعا شاشامەن جارتى ميلليارد دوللار جۇمسالادى.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟