Qıtayğa tartılğan mwnay qwbırları. Foto: azattyq.org

Bügin Ükimet üyinde QR Prem'er-Ministri Baqıtjan Sağıntaev Qıtay Halıq Respublikasınıñ (QHR) Memlekettik keñesi Prem'eriniñ birinşi orınbasarı Çjan Gaolimen kezdesti. Bwl turalı Prem'er-ministrdiñ resmi saytında habarlandı.

Kezdesu barısında eki eldiñ sauda-ekonomikalıq, ğılımi-tehnikalıq, qarjı, energetika, mädeni-gumanitarlıq salalardağı özara is-qimıl mäseleleri, birlesken iri jobalardı josparlau men wzaqmerzimdi bağdarlamalardı äzirleudi qosa alğanda, tranzittik-kölik jäne infraqwrılımdıq özara is-äreket salalarındağı mäseleleri talqılandı.

Qazirgi tañda Qazaqstan men Qıtay arasında qazaqstandıq «Nwrlı jol» wlttıq ekonomikalıq bağdarlaması men qıtaydıñ «Jibek jolınıñ ekonomikalıq beldeui» bastamasın tüyindestiru boyınşa Intımaqtastıq josparın iske asıru jwmıstarı belsendi türde jürgizilude. Josparğa QR Prezidenti N. Nazarbaevtıñ QHR Törağası Şi Jinpiñmen (Si Czin'pin) kelissöz jürgizuiniñ qorıtındısı boyınşa 2016 jılğı 2 qırküyekte Hançjouda qol qoyılğan bolatın.

Kezdesu barısında auıl şaruaşılığı salasındağı, qazaqstandıq şarualardıñ önimderin qıtay narıqtarına eksporttaudı ilgeriletudegi ıntımaqtastıq keleşegine basa nazar audarıldı. Sonımen qatar su qatınastarı, transşekaralıq özenderdi paydalanu men qorğau mäseleleri qaraldı.

Anıqtama:

QR men QHR arasındağı 2016 jıldağı sauda aynalımı 7,9 mlrd dollardı, Qazaqstannan Qıtayğa 2016 jıldağı eksport 4,2 mlrd dollardı, import – 3,7 mlrd dollardı qwradı.

Qazaqstannan Qıtayğa şığarılatın eksporttıñ zattay körinisi mwnay men urandı esepke almağanda 20,4%-ğa östi.

Qıtay Qazaqstannıñ bastı investiciyalıq seriktesteriniñ biri bolıp tabıladı. 2005 jıldan bastap 2017 jılğı 1 aqpanğa deyingi aralıqta QHR-dan Qazaqstan Respublikasınıñ ekonomikasına tüsken tikeley investiciyalar ağını 13,9 mlrd AQŞ dolların qwrağan. Osı kezeñdegi Qazaqstannan Qıtayğa jiberilgen investiciyalar kölemi 519,7 mln AQŞ dolların qwrağan.

2017 jılğı 1 aqpandağı jağday boyınşa Qazaqstanda qıtay kapitalı qoldanılğan 2783 käsiporın tirkelgen.

QHR Astanada ötetin EKSPO-2017-ge qatısatının rastağan alğaşqı elderdiñ biri jäne qıtay pavil'onı körmedegi eñ iri pavil'ondardıñ biri boladı. Bwdan özge, 2017 jıl «Qazaqstandağı Qıtay turizminiñ jılı» retinde mälimdelgen, soğan oray elimiz Qıtaydan turisterdiñ ülken ağının kütedi.

The Qazaq Times