بۇگىن ۇكىمەت ۇيىندە قر پرەمەر-ءمينيسترى باقىتجان ساعىنتاەۆ قىتاي حالىق رەسپۋبليكاسىنىڭ (قحر) مەملەكەتتىك كەڭەسى پرەمەرىنىڭ ءبىرىنشى ورىنباسارى چجان گاوليمەن كەزدەستى. بۇل تۋرالى پرەمەر-ءمينيستردىڭ رەسمي سايتىندا حابارلاندى.
كەزدەسۋ بارىسىندا ەكى ەلدىڭ ساۋدا-ەكونوميكالىق، عىلىمي-تەحنيكالىق، قارجى، ەنەرگەتيكا، مادەني-گۋمانيتارلىق سالالارداعى ءوزارا ءىس-قيمىل ماسەلەلەرى، بىرلەسكەن ءىرى جوبالاردى جوسپارلاۋ مەن ۇزاقمەرزىمدى باعدارلامالاردى ازىرلەۋدى قوسا العاندا، ترانزيتتىك-كولىك جانە ينفراقۇرىلىمدىق ءوزارا ءىس-ارەكەت سالالارىنداعى ماسەلەلەرى تالقىلاندى.
قازىرگى تاڭدا قازاقستان مەن قىتاي اراسىندا قازاقستاندىق «نۇرلى جول» ۇلتتىق ەكونوميكالىق باعدارلاماسى مەن قىتايدىڭ «جىبەك جولىنىڭ ەكونوميكالىق بەلدەۋى» باستاماسىن تۇيىندەستىرۋ بويىنشا ىنتىماقتاستىق جوسپارىن ىسكە اسىرۋ جۇمىستارى بەلسەندى تۇردە جۇرگىزىلۋدە. جوسپارعا قر پرەزيدەنتى ن. نازارباەۆتىڭ قحر توراعاسى شي جينپيڭمەن (سي تسزينپين) كەلىسسوز جۇرگىزۋىنىڭ قورىتىندىسى بويىنشا 2016 جىلعى 2 قىركۇيەكتە حانچجوۋدا قول قويىلعان بولاتىن.
كەزدەسۋ بارىسىندا اۋىل شارۋاشىلىعى سالاسىنداعى، قازاقستاندىق شارۋالاردىڭ ونىمدەرىن قىتاي نارىقتارىنا ەكسپورتتاۋدى ىلگەرىلەتۋدەگى ىنتىماقتاستىق كەلەشەگىنە باسا نازار اۋدارىلدى. سونىمەن قاتار سۋ قاتىناستارى، ترانسشەكارالىق وزەندەردى پايدالانۋ مەن قورعاۋ ماسەلەلەرى قارالدى.
انىقتاما:
قر مەن قحر اراسىنداعى 2016 جىلداعى ساۋدا اينالىمى 7,9 ملرد دوللاردى، قازاقستاننان قىتايعا 2016 جىلداعى ەكسپورت 4,2 ملرد دوللاردى، يمپورت – 3,7 ملرد دوللاردى قۇرادى.
قازاقستاننان قىتايعا شىعارىلاتىن ەكسپورتتىڭ زاتتاي كورىنىسى مۇناي مەن ۋراندى ەسەپكە الماعاندا 20,4%-عا ءوستى.
قىتاي قازاقستاننىڭ باستى ينۆەستيتسيالىق سەرىكتەستەرىنىڭ ءبىرى بولىپ تابىلادى. 2005 جىلدان باستاپ 2017 جىلعى 1 اقپانعا دەيىنگى ارالىقتا قحر-دان قازاقستان رەسپۋبليكاسىنىڭ ەكونوميكاسىنا تۇسكەن تىكەلەي ينۆەستيتسيالار اعىنى 13,9 ملرد اقش دوللارىن قۇراعان. وسى كەزەڭدەگى قازاقستاننان قىتايعا جىبەرىلگەن ينۆەستيتسيالار كولەمى 519,7 ملن اقش دوللارىن قۇراعان.
2017 جىلعى 1 اقپانداعى جاعداي بويىنشا قازاقستاندا قىتاي كاپيتالى قولدانىلعان 2783 كاسىپورىن تىركەلگەن.
قحر استانادا وتەتىن ەكسپو-2017-گە قاتىساتىنىن راستاعان العاشقى ەلدەردىڭ ءبىرى جانە قىتاي پاۆيلونى كورمەدەگى ەڭ ءىرى پاۆيلونداردىڭ ءبىرى بولادى. بۇدان وزگە، 2017 جىل «قازاقستانداعى قىتاي ءتۋريزمىنىڭ جىلى» رەتىندە مالىمدەلگەن، سوعان وراي ەلىمىز قىتايدان تۋريستەردىڭ ۇلكەن اعىنىن كۇتەدى.
The Qazaq Times
استانادا قالعان جاڭاوزەندىك جۇمىسسىزدار "قازمۇنايگاز" كەلىسسوزدى توقتاتىپ تاستادى دەيدى
فبر پەنتاگوننىڭ قۇپيا قۇجاتتارىنىڭ جاريالانۋىنا قاتىسى بار كۇدىكتىنى قامادى
بىشكەكتە كاسىپكەرلەر جاڭا سالىق ەرەجەلەرىنە قارسى اكتسيا وتكىزدى
نازارباەۆ "قۇرمەتتى سەناتور" اتاعىنان ايىرىلدى
موڭعوليا استاناسىندا جاپپاي نارازىلىق شەرۋلەرى ءوتتى
ەكىباستۇزدا جىلۋ جەلىسىندەگى اقاۋعا "ستانتسيا قىزمەتكەرىنىڭ قاتەلىگى" سەبەپ بولعانى ايتىلدى