Foto: https://azattyq-ruhy.kz

Bügin Almatı äkimi Baqıtjan Sağıntaevtıñ qala twrğındarımen eseptik kezdesui ötti.

Sağıntaev sözinde: «Biz «Almatı jastarı 3.0» jaña bağdarlamasın äzirledik. Jaña twrğın üy bağdarlamasınıñ artıqşılığı - onıñ kömegimen jastar 3 jıldan 25 jılğa deyingi merzimge tömen payızdıq mölşerlememen qarız ala aladı. Jıldıq 5 payızdıq jeñildikpen. Alğaşqı jarna 10%. Bwl bağdarlamağa 10 mlrd teñge bölindi. Twrğın üy qwrılıs jinaq banki 3 mlrd teñge böldi», – dedi.

Qala äkiminiñ aytuınşa, qoğamdıq kölikter mäselesi oñtaylı şeşim tapqan. Mäselen, 2019 jılı subsidiya 23,1 mlrd teñgege jetse, onıñ 24,2 mlrd-ı 2020-şı jılğa bölingen. Osı arqılı jolaqı tarifınıñ öspeuin qamtamasız etu közdelmek.

Jiında äuejay mañındağı jerlerdi qala menşigine qaytaru mäselesi söz boldı. Megapolis äkimi: «Bwğan deyin «Kazkommercbank» kepilge bergen 383 gektar jer kürdeli nesieler qorına berilgen edi. Endi bwl jer qala äkimdigine qaytarıladı. Biz bwl turalı elbasına ötiniş jazğan bolatınbız. Ükimet bizdi qoldadı. Al jaña jılğa deyin 383 gektar jer qaytarıldı. Endigi 185 gektar jer qaldı. Bwl äuejay aumağına tiesili. Osı mäsele boyınşa qazir ükimetpen kelissöz jürgizip jatırmız. Talğar audandıq äkimdiginiñ lauazımdı twlğaları 2015-2019 jılı qızmettik ökilettiligin asıra paydalanıp, äuejaydıñ sanitarlıq qorğau aymağındağı jeke qosalqı uçaskeleri, sonıñ işinde twrğın-üy saluğa jer bergeni üşin zañsız şeşimder qabıldağanı anıqtaldı», – dedi. Sonımen qatar qala äkimi Almatı äuejayı mañındağı jer uçaskelerin zañsız beru boyınşa sıbaylas jemqorlıqqa qarsı qızmettiñ sotqa deyingi tergeu jwmıstarın jürgizip jatqanın ayttı.

Ayta keteyik, Baqıtjan Sağıntaev 2016 jılı qırküyekten 2019 jıldıñ aqpanına deyin Qazaqstan ükimetin basqarğan. 20 aqpanda bwrınğı prezident Nazarbaev Sağıntaev basqarğan ükimetti «ekonomikanı damıta almadı» dep sınğa alıp, otstavkağa jibergen bolatın. bıltır mausımda ol Almatı qalasınıñ äkimi bolıp tağayındaldı.

"The Qazaq Times"