Prezident Toqaev. Foto: Akorda.kz

Qazaqstan Auğanstandağı qazaq diasporasın elge qaytaru mäselesin qarastırıp jatır. Bwl turalı 8 qırküyekte el prezidenti Qasım-Jomart Toqaev ayttı.

"Auğanstandağı şielenisken mäselelerdi retteu üşin Qazaqstan şeteldik seriktesterimen tize qosıp jwmıs istep keledi. Biz, eñ aldımen, sol jerdegi otandastarımızdı wyımdasqan türde evakuaciyalaudı qamtamasız ettik. Endi, biz Auğanstandağı qazaq diasporasınıñ müşelerin, yağni qandastarımızdı elge qaytaru mäselesin qarastırıp jatırmız. Gumanitarlıq wstanımdarğa säykes auğanstandıq 57 studenttiñ bilim beru vizaların wzarttıq. Sonımen qatar bortında şetel azamattarı bar wşaqtarğa janarmay qwyu üşin tranzittik äue dälizderi men qonu alañdarın wsındıq. BWW-nıñ Auğanstan jönindegi agenttikteriniñ qaşıqtağı uaqıtşa keñsesi Almatı qalasına ornalastırıldı" dedi Toqaev jañadan tağayındalğan tötenşe jäne ökiletti elşilerdiñ senim gramotaların tapsıru räsimi kezinde.

Auğanstanda "Taliban" tobı bilik ornatqannan keyin wltı qazaq ekenin aytıp, Qazaqstan ükimetinen Auğanstannan alıp ketudi swrap, ötingen azamattar köbeygen edi. Osı apta basında Qazaqstannıñ Kabuldağı konsuldığına barıp, kömek swrağan, özderin "auğan qazaqtarımız" dep tanıstırğan bir top adam qabıldauğa kire almay jürgenine şağımdanğan.

Bwğan deyin Qazaqstan sırtqı ister ministrligi Auğanstandağı qazaqtardı Qazaqstanğa qaytaru jöninde is-şara bastalğanın, alayda ondağı sayasi-äskeri ahualdıñ naşarlauına baylanıstı qazaqtardı qaytarudıñ naqtı merzimi belgilenbegenin aytqan.

The Qazaq Times