«ەلگە قايتارۋ ماسەلەسىن قاراستىرىپ جاتىرمىز». توقاەۆ اۋعانستانداعى قازاقتار تۋرالى ايتتى

قازاقستان اۋعانستانداعى قازاق دياسپوراسىن ەلگە قايتارۋ ماسەلەسىن قاراستىرىپ جاتىر. بۇل تۋرالى 8 قىركۇيەكتە ەل پرەزيدەنتى قاسىم-جومارت توقاەۆ ايتتى.

"اۋعانستانداعى شيەلەنىسكەن ماسەلەلەردى رەتتەۋ ءۇشىن قازاقستان شەتەلدىك سەرىكتەستەرىمەن تىزە قوسىپ جۇمىس ىستەپ كەلەدى. ءبىز، ەڭ الدىمەن، سول جەردەگى وتانداستارىمىزدى ۇيىمداسقان تۇردە ەۆاكۋاتسيالاۋدى قامتاماسىز ەتتىك. ەندى، ءبىز اۋعانستانداعى قازاق دياسپوراسىنىڭ مۇشەلەرىن، ياعني قانداستارىمىزدى ەلگە قايتارۋ ماسەلەسىن قاراستىرىپ جاتىرمىز. گۋمانيتارلىق ۇستانىمدارعا سايكەس اۋعانستاندىق 57 ستۋدەنتتىڭ ءبىلىم بەرۋ ۆيزالارىن ۇزارتتىق. سونىمەن قاتار بورتىندا شەتەل ازاماتتارى بار ۇشاقتارعا جانارماي قۇيۋ ءۇشىن ترانزيتتىك اۋە دالىزدەرى مەن قونۋ الاڭدارىن ۇسىندىق. بۇۇ-نىڭ اۋعانستان جونىندەگى اگەنتتىكتەرىنىڭ قاشىقتاعى ۋاقىتشا كەڭسەسى الماتى قالاسىنا ورنالاستىرىلدى" دەدى توقاەۆ جاڭادان تاعايىندالعان توتەنشە جانە وكىلەتتى ەلشىلەردىڭ سەنىم گراموتالارىن تاپسىرۋ ءراسىمى كەزىندە.

اۋعانستاندا "تاليبان" توبى بيلىك ورناتقاننان كەيىن ۇلتى قازاق ەكەنىن ايتىپ، قازاقستان ۇكىمەتىنەن اۋعانستاننان الىپ كەتۋدى سۇراپ، وتىنگەن ازاماتتار كوبەيگەن ەدى. وسى اپتا باسىندا قازاقستاننىڭ كابۋلداعى كونسۋلدىعىنا بارىپ، كومەك سۇراعان، وزدەرىن "اۋعان قازاقتارىمىز" دەپ تانىستىرعان ءبىر توپ ادام قابىلداۋعا كىرە الماي جۇرگەنىنە شاعىمدانعان.

بۇعان دەيىن قازاقستان سىرتقى ىستەر مينيسترلىگى اۋعانستانداعى قازاقتاردى قازاقستانعا قايتارۋ جونىندە ءىس-شارا باستالعانىن، الايدا ونداعى ساياسي-اسكەري احۋالدىڭ ناشارلاۋىنا بايلانىستى قازاقتاردى قايتارۋدىڭ ناقتى مەرزىمى بەلگىلەنبەگەنىن ايتقان.

The Qazaq Times