Prokuratura aldında til belsendisi Quat Ahmetovtı qudalamaudı talap etip twrğan azamattar. Şımkent, 8 qırküyek 2021 jıl. Foto: Azattyq.org

Bügin, 8 qırküyek küni Şımkent qalalıq prokuraturasınıñ aldına jinalğan on şaqtı azamattıq belsendi "Til Maydani onlayn partiyası" Youtube arnasınıñ avtorı, qazaq tilinde qızmet körsetudi talap etkeni üşin üstinen qılmıstıq is qozğalıp, elden ketken Quat Ahmetovti elge qaytarudı talap etti. Bwl turalı Azattıq radiosı habarladı. 

Basılımnıñ jazuınşa, belsendiler Reseyden Qazaqstannıñ işki isine aralaspauın talap etken.

Qoldarına "Putin qazaq jerinen qolıñdı tart!" degen jazuı bar plakat wstap twrğan belsendiler äueli "Quat Ahmetov elge qaytarılsın!" dep ayqayladı. Onı körgen prokuratura qızmetkeri zañsız miting ötkizuge bolmaytının eskertti.

Sodan keyin belsendiler Qazaqstannıñ bas prokurorı Ğizat Nwrdäuletovtiñ atına hat tapsırdı. Onda hat avtorları özge elge Qazaqstannıñ işki isine aralasuına jol bermeudi, azamattardıñ ana tilinde qızmet alu jönindegi Konstituciyalıq qwqığın qamtamasız etudi, til belsendisi Quat Ahmetovtiñ üstinen qozğalğan qılmıstıq isti qısqartıp, elge qaytarudı talap etken.

- Quat Ahmetovti qudalau toqtatılsın. Qazaqstanda memlekettik til retinde qazaq tiliniñ statusı turalı jeke dara zañ qabıldanuı kerek, - dedi narazı belsendilerdiñ biri Qalmahan Omar.

Belsendilerdi äkimdik qızmetkerleri men policiya sırttan baqılap, küzetip twrdı. Narazılar talaptarı orındalmağan jağdayda jappay mitingige şığatının eskertip taradı.

"Til Maydani onlayn partiyası" Youtube arnasınıñ avtorı, azamattıq belsendi Quat Ahmetovtiñ elden şığıp, Kievke ketkeni turalı 31 tamızda habarlandı. Advokat Abzal Qwspan qorğauındağı Ahmetovtiñ mwnday şeşim qabıldauına Qazaqstan bas prokuraturasınıñ onıñ üstinen Qılmıstıq kodekstiñ 174-babımen ("wlt arazdığın qozdıru") qılmıstıq is qozğağanı sebep bolğanın aytqan.

The Qazaq Times