Joyqın jarılıs bolğan Jambıl oblıs Bayzaq audanı Qaynar auılına baratın jol. 2021 jıldıñ 29 tamızı. Foto: QT / Kültegin Aspanwlı

Jambıl oblısı Bayzaq audanında bolğan joyqın jarılıs saldarınan qaza tapqandardıñ birazı – ört söndiruşiler. Osığan baylanıstı qoğamda "Oq-däri tolıp twrğan qoymadan ört şıqqan soñ joyqın jarılıs bolatını belgili bola twra ne sebepti qauipti aymaqqa ört sönduruşiler jiberildi?" degen swraq qızu talqılanıp jatır. Oqiğa ornına barğan The Qazaq Times tilşisi osı swraqtı Jambıl oblıstıq tötenşe jağdaylar departamenti basşısınıñ orınbasarı Eralı Aqılbekovke qoydı. 

– Ört söndirudiñ özara is-qimıl josparı degen bar. Soğan say, ört bolğan jağdayda olar (äskeri bölimdegiler – red.)  özdereniñ küşterimen örtti söndire bastaydı, biraq birden bizge de habar beredi. Biz ol jerge kömek retinde baramız, – deydi Eralı Aqılbekov.

Tilşi saualın naqtılap "Biraq äskeri qoymanıñ sonşalıqtı qauipti ekeni belgili boldı ğoy. Bwl täuekel şeşimdi kim qabıldadı, älde bwl zañdı algoritm be?" dep swradı.

– Men sizge ayttım ğoy, ört söndirudiñ özara is-qimıl josparı degen bar. Soğan say, habarlama tüsken soñ bizdiñ qızmetkerler sol jaqa baruğa tiis.

Tilşi:  Qauipi qanday joğarı bolğanına qaramastan ba?

– Iä, qanday qauipti bolsa da baradı. Sol jerge barğan soñ arı qaray şeşim qabıldanadı, – deydi Jambıl oblıstıq TJD basşısınıñ orınbasarı.

Jambıl oblıstıq tötenşe jağdaylar departamenti basşısınıñ orınbasarı Eralı Aqılbekov. Foto: QT / Kültegin Aspanwlı

Onıñ aytuına qarağanda, jarılıs bolğan 26 tamız küni oblıstıq TJD qarastı ört söndiru mekemelereniñ 114 qızmetkeri men 17 tehnikası jwmıldırılğan.

– Osı oqiğa barısında 49 qızmetker jarqat aldı. Qazir olardıñ 28-i üyine jiberildi. Qalğandarı äli auruhanada jatır. Büginde qaytıs bolğandar sanı – bes adam. Tört qızmetkerimiz äli tabılmağandar men mäyti tanılmağandar qatarında, –deydi ol.

26 tamız keşke Jambıl oblısı Bayzaq audanındağı №28349 äskeri bölimi aumağında ornalasqan oq-däri saqtalatın qoymada jarılıs boldı. Soñğı resmi derekke say, tötenşe oqiğa saldarınan 13 adam qaza tauıp, 98 adam zardap şekken. Oqiğa bolğan kezde habar-oşarsız ketken üş adamdı äli izdep jatır.

Ondağan adamnıñ ömirin jalmağan joyqın jarılısqa ne sebep bolğanı äli belgisiz. Qorğanıs ministri Nwrlan Ermekbaevtıñ topşılauınşa, jarılısqa qoymada qauipsizdik talaptarınıñ saqtalmauı, ya himiyalıq reakciyamen özdiginen tuuı nemese diversiya sebep boluı mümkin.

The Qazaq Times