جارىلىس قاۋپى ءتونىپ تۇرعان ايماققا ءورت سوندىرۋشىلەر نەگە جىبەرىلدى؟ وبلىستىق تجد باسشىلىعى جاۋاپ بەردى

جامبىل وبلىسى بايزاق اۋدانىندا بولعان جويقىن جارىلىس سالدارىنان قازا تاپقانداردىڭ ءبىرازى – ءورت سوندىرۋشىلەر. وسىعان بايلانىستى قوعامدا "وق-ءدارى تولىپ تۇرعان قويمادان ءورت شىققان سوڭ جويقىن جارىلىس بولاتىنى بەلگىلى بولا تۇرا نە سەبەپتى قاۋىپتى ايماققا ءورت سوندۋرۋشىلەر جىبەرىلدى؟" دەگەن سۇراق قىزۋ تالقىلانىپ جاتىر. وقيعا ورنىنا بارعان The Qazaq Times ءتىلشىسى وسى سۇراقتى جامبىل وبلىستىق توتەنشە جاعدايلار دەپارتامەنتى باسشىسىنىڭ ورىنباسارى ەرالى اقىلبەكوۆكە قويدى. 

– ءورت ءسوندىرۋدىڭ ءوزارا ءىس-قيمىل جوسپارى دەگەن بار. سوعان ساي، ءورت بولعان جاعدايدا ولار (اسكەري بولىمدەگىلەر – رەد.)  وزدەرەنىڭ كۇشتەرىمەن ءورتتى سوندىرە باستايدى، بىراق بىردەن بىزگە دە حابار بەرەدى. ءبىز ول جەرگە كومەك رەتىندە بارامىز، – دەيدى ەرالى اقىلبەكوۆ.

ءتىلشى ساۋالىن ناقتىلاپ "بىراق اسكەري قويمانىڭ سونشالىقتى قاۋىپتى ەكەنى بەلگىلى بولدى عوي. بۇل تاۋەكەل شەشىمدى كىم قابىلدادى، الدە بۇل زاڭدى الگوريتم بە؟" دەپ سۇرادى.

– مەن سىزگە ايتتىم عوي، ءورت ءسوندىرۋدىڭ ءوزارا ءىس-قيمىل جوسپارى دەگەن بار. سوعان ساي، حابارلاما تۇسكەن سوڭ ءبىزدىڭ قىزمەتكەرلەر سول جاقا بارۋعا ءتيىس.

ءتىلشى:  قاۋىپى قانداي جوعارى بولعانىنا قاراماستان با؟

– ءيا، قانداي قاۋىپتى بولسا دا بارادى. سول جەرگە بارعان سوڭ ارى قاراي شەشىم قابىلدانادى، – دەيدى جامبىل وبلىستىق تجد باسشىسىنىڭ ورىنباسارى.

جامبىل وبلىستىق توتەنشە جاعدايلار دەپارتامەنتى باسشىسىنىڭ ورىنباسارى ەرالى اقىلبەكوۆ. فوتو: QT / كۇلتەگىن اسپانۇلى

ونىڭ ايتۋىنا قاراعاندا، جارىلىس بولعان 26 تامىز كۇنى وبلىستىق تجد قاراستى ءورت ءسوندىرۋ مەكەمەلەرەنىڭ 114 قىزمەتكەرى مەن 17 تەحنيكاسى جۇمىلدىرىلعان.

– وسى وقيعا بارىسىندا 49 قىزمەتكەر جارقات الدى. قازىر ولاردىڭ 28-ءى ۇيىنە جىبەرىلدى. قالعاندارى ءالى اۋرۋحانادا جاتىر. بۇگىندە قايتىس بولعاندار سانى – بەس ادام. ءتورت قىزمەتكەرىمىز ءالى تابىلماعاندار مەن ءمايتى تانىلماعاندار قاتارىندا، –دەيدى ول.

26 تامىز كەشكە جامبىل وبلىسى بايزاق اۋدانىنداعى №28349 اسكەري ءبولىمى اۋماعىندا ورنالاسقان وق-ءدارى ساقتالاتىن قويمادا جارىلىس بولدى. سوڭعى رەسمي دەرەككە ساي، توتەنشە وقيعا سالدارىنان 13 ادام قازا تاۋىپ، 98 ادام زارداپ شەككەن. وقيعا بولعان كەزدە حابار-وشارسىز كەتكەن ءۇش ادامدى ءالى ىزدەپ جاتىر.

ونداعان ادامنىڭ ءومىرىن جالماعان جويقىن جارىلىسقا نە سەبەپ بولعانى ءالى بەلگىسىز. قورعانىس ءمينيسترى نۇرلان ەرمەكباەۆتىڭ توپشىلاۋىنشا، جارىلىسقا قويمادا قاۋىپسىزدىك تالاپتارىنىڭ ساقتالماۋى، يا حيميالىق رەاكتسيامەن وزدىگىنەن تۋى نەمەسە ديۆەرسيا سەبەپ بولۋى مۇمكىن.

The Qazaq Times