Jambıl oblısındağı jarılıstan qaza tapqan marqwmdardıñ DNQ saraptaması qorıtındısın jariyalar aldındağı qarbalas sätten. Taraz qalasınıñ mäyithanası. 31 tamız 2021 jıl. Foto: QT / Kültegin Aspanwlı

Jambıl oblısı Bayzaq audanındağı äskeri qoymada bolğan jarılıstan qattı jaralanıp, jansaqtau böliminde jatqan tağı bir äskeri qızmetker köz jwmdı.

Bwl jöninde 7 qırküyekte Qorğanıs ministrligi resmi aqparat tarattı.

«7 qırküyekte Taraz qalalıq auruhanasında 26 tamızda Jambıl oblısındağı oq-däriler qoymasında bolğan örtti söndiru kezinde alğan jaraqattarınıñ saldarınan №28349 äskeri böliminiñ äskeri qızmetşisi 1983 jılı tuğan, kapitan Erlan Rısqwlbekwlı Qırğızäliev qaytıs boldı. Ol oq-därilerdi saqtau böliminiñ bastığı lauazımın atqarğan bolatın. Qoymadağı örtti joyuğa kirisken alğaşqılardıñ biri boldı» delingen ministrlik habarlamasında.

Jambıl oblısı Bayzaq audanındağı №28349 äskeri böliminde bolğan joyqın jarılıstan jaraqattanğan jüz şaqtı adamnıñ işinde jağdayı eñ auır küyde qalalıq auruhanağa ornalastırılğan. Osığan deyin bölim bastığı kapitan Erlan Qırğızälievtiñ tuıstarı astana därigerleriniñ kelip kömektesuin swrağan.

Denesin 85%-ın küyik şalğan äri apat saldarınan ekijaqtı pnevmoniyağa şaldıqqan äskeri qızmetker eki aptağa juıq uaqıt reanimaciyada jattı.

Kapitan Erlan Qırğızäliev. Foto: QR QM

Kapitan Erlan Qırğızäliev. Foto: QR QM

38 jasında qaytqan marqwmnıñ artında joldası men tört balası qaldı. Perzentteriniñ aldı 13, kenjesi 2,5 jasta. Bayzaq audanı Sarıkemer eldi mekeninde twrğan. Osığan tayau Qaynar auılınıñ tübindegi äskeri bölimge bıltır ğana qızmetke ornalasqan. Oğan deyin Aqtau qalasında kelisimşart negizinde 5 jıl äskeri qızmette bolğan. Jarılıstan keyin kapitannıñ otbasına eşkim habarlaspağan.

Osılayşa Jambıl oblısındağı jarılıstan qaza bolğandar 16 adamğa jetti. Qazir joğalğan tağı bir qızmetker – 33 jastağı Bauırjan Däuitbaevtı izdeu jalğasıp jatır.

26 tamızda Jambıl oblısı Bayzaq audanındağı äskeri bölimde bolğan joyqın jarılıstan 113 oq-däri qoymasınıñ tek üşeui bütin qalğan. Tek qorğanıs nısanı ğana emes, äskeri bölimniñ tübinde ornalasqan Qaynar auılı men jaqın mañaydağı özge eldi mekenderden 106 twrğın üy, qoğamdıq orın sanalatın 18 ğimarat bülingen. Eki jıldıñ işinde ekinşi märte qaytalanğan apattan jüz şaqtı adam türli deñgeyde jaralanıp, sol küni birneşe mıñ twrğın bosıp, evakuaciyalanuğa mäjbür boldı.

QT redakciyası tötenşe jağdaydan zardap şegip qaytıs bolğandardıñ otbası men jaqındarına qayğırıp köñil aytadı.

The Qazaq Times