قۋاڭشىلىقتى بىردەن قولعا الدىق دەيتىن «ەستۋشى ۇكىمەتتىڭ» قاعىلەزدىگى جانە ءماميننىڭ تاپسىرماسى

مامين اراعا بىرنەشە اي وزدىرىپ اۋىل شارۋاشىلىعى مينيسترلىگى مەن اكىمدىكتەرگە ماڭعىستاۋ مەن قىزىلوردا وڭىرىندەگى جاعدايدى نازاردا ۇستاۋدى، كۇزگى جيىن-تەرىمگە قامدانۋدى تاپسىردى.

18 تامىزدا وتكەن ۇكىمەت وتىرىسىندا قۇرعاقشىلىقتىڭ «سالدارىن جويۋ ءۇشىن جەدەل شارالار قابىلداندى» دەگەن ۇكىمەت باسشىسىنىڭ ءسوزىن الەۋمەتتىك جەلى قولدانۋشىلارى «ەڭبەكتى مالدانعىش شەنەۋنىكتەردىڭ ەسكى ادەتى» رەتىندە سىناپ جاتىر. قۋاڭشىلىقتان جانى قىسىلعان جۇرتقا ۇكىمەتتەن بۇرىن باياعىشا جەر-جەردەن ەل ازاماتتارى اسارلاتىپ، جىلۋ جيناپ كومەك ۇيىمداستىرعانى بەلگىلى.

پرەمەر-ءمينيستردىڭ ايتۋىنشا، جەم-ءشوپ ساتىپ الۋ ءۇشىن ۇكىمەت رەزەرۆىنەن ماڭعىستاۋ جانە قىزىلوردا وبلىستارىنا 3,6 ملرد تەڭگە، ال جەم–شوپ دايىنداۋعا قوسىمشا 43,1 مىڭ توننا ارزان ديزەل وتىنى بولىنگەن.

 «قابىلدانعان شارالاردىڭ ارقاسىندا جەم-شوپپەن قامتاماسىز ەتۋ ماسەلەسى جالپى تۇراقتالدى. اۋىل شارۋاشىلىعى مينيسترلىگى مەن اكىمدىكتەر وسى باعىتتاعى جۇمىستى جالعاستىرىپ، جاعدايدى ەرەكشە باقىلاۋدا ۇستاۋى قاجەت. ەگىن جيناۋعا دايىندىق ماسەلەسىندە دە قارجىلاي جانە ماتەريالدىق-تەحنيكالىق قامتاماسىز ەتۋ بويىنشا بارلىق شارۋا قولعا الىندى»، – دەيدى ول.

اسقار ءماميننىڭ بولجاۋىنشا، قازاقستان استىقتان تارىقپايدى، ءوزىن تولىق قامتاماسىز ەتە الادى. ەكسپورتتىق الەۋەت جوعارى دەڭگەيدە، 6,5-7 ملن توننا كولەمىندە قالا بەرمەك.

«سوندىقتان باستى مىندەتىمىز – ەگىن جيناۋدى ۋاقتىلى ءارى ساپالى وتكىزۋ. جالپى مىناداي ماسەلەلەرگە كوڭىل بولگىم كەلەدى. بىرىنشىدەن، اۋىل شارۋاشىلىعى مينيسترلىگى مەن وبلىستاردىڭ اكىمدىكتەرى قىس مەزگىلىنە جەم-ءشوپ قورىن ساپالى دايىنداۋ جانە ونىڭ باعالارىن تۇراقتى بولۋىن قامتاماسىز ەتسىن.ەكىنشىدەن، ەگىندى ساپالى جيناپ قانا قويماي، بيداي ءوىنىمىن دۇرىس ساقتاۋ شارتىن باقىلاسىن.سونداي-اق، ەلەۆاتورلاردىڭ ەگىن قابىلداۋ مەن جيناۋعا ازىرلىگىن قامتاماسىز ەتۋ قاجەت. ۇشىنشىدەن، ەنەرگەتيكا مينيسترلىگىنە ەگىن جيناۋ كەزىندە جانار-جاعار مايمەن ۋاقتىلى قامتاماسىز ەتۋ ماسەلەسىن تۇراقتى باقىلاۋدى تاپسىرامىن»، – دەدى ول.

بيىل، قازاقستان تاۋەلسىزدىگىنىڭ 30 جىلدىعى قارساڭىندا وڭتۇستىك-باتىس ايماقتاردا بۇرىن-سوڭدى بولماعان قۇرعاقشىلىق جايلاپ، جەم-ءشوپ جەتىسپەۋشىلىگىنەن جۇرتتىڭ قولداعى مالى قىناداي قىرىلىپ قالدى. سوعان قاراماستان جاۋاپتى مەكەمەلەر، سونىڭ ىشىندە ەكى وبلىستىڭ اكىمدىگى، تجد جانە قازگيدرومەت جۇت جۋانداعان ايماقتاردا تج جاريالاۋعا نەگىز جوق دەگەن توقتامعا كەلدى. ازاماتتاردىڭ ءبىر بولىگى الاپات جۇتتىڭ بولارىن دەر كەزىندە باعامداپ-قامدانىپ ۇلگەرمەگەن ۇكىمەتتى  ايىپتايدى. بۇل جونىندە وزىنە شاڭ جۋىتپاعان اۋىل شارۋاشىلىعى ءمينيسترى ساپارحان وماروۆ شىلدەدە وتستاۆكاعا كەتتى. وڭىردەگى حالىق ءالى دە قولى كومەككە جەتپەگەنىن ايتادى.

رەسپۋبليكالىق جەدەل شتابتىڭ جۇمىسى ايقىن ەمەس نەمەسە اشىق دەرەككوزدەردە جۇيەلى كورسەتىلمەيدى. جۇتتىڭ زاردابى ەتەك الىپ، قوعام سىنىن كۇشەيتكەن سوڭ جەم-ءشوپتى سىرتقا شىعارۋعا تىيىم سالىندى.

The Qazaq Times