Qazaqstannıñ mädeniet jäne sport ministri Aqtotı Rayımqwlova jäne onıñ isti bolıp, qızmetinen bosağan orınbasarı Säken Mwsaybekov. Foto: aşıq derekköz

Biıl aqpan ayında jemqorlıq küdigine ilikken mädeniet vice-ministri Säken Mwsaybekov kinäli dep tanıldı. Osığan deyin mädeniet jäne sport ministri Aqtotı Rayımqwlova Toqaev türlentken memlekettik qızmetkerler turalı zañğa säykes orınbasarınıñ ayıbı däleldengen jağdayda otstavka ketetinin mälimdegen.

Prokuratura men tergeu organdarı 15 mıñ dollar köleminde para aldı degen ayıptau aktisin Almatı qalasınıñ Türksib audandıq sotı rastadı. Jaña jariyalanğan sot şeşimi boyınşa, bwrınğı vice-ministr Säken Mwsaybekov memleketke 62 million teñge ayıppwl töleui tiis. Resmi mälimetke qarağanda, jemqorlıq isi «Mölşerlemelerdi esepke alu ortalığı» jobasın jüzege asıru turalı kelisimge baylanıstı qozğalğan.

Osıdan üş ay ilgeri, 14 mamırda ötken OrtKom brifinginde ministr Rayımqwlova düyim eldiñ aldında orınbasarına tağılğan ayıp däleldense, ornımnan ketemin degen.

«Konstituciyağa säykes, kinäsizdik prezumpciyası bar jäne kinä däleldenui tiis. Eger onıñ kinäsi däleldense, zañğa säykes men otstavkağa ketu turalı ötiniş beremin» degen Rayımqwlova mamır ayındağı jartıjıldıq esep beru jiınında.

Qañtar ayınıñ soñında mädeniet jäne sport vice-ministri Säken Mwsaybekovtiñ «öz erkimen» qızmetinen ketkeni habarlanğan. Artınşa onıñ «jemqorlıq küdigine» ilinip wstalğanı turalı habar tarağan.

Qazaqstanda «Memlekettik qızmet turalı» zañğa säykes, memlekettik qızmetker jemqorlıqpen wstalsa, onıñ basşısı otstavkağa ketui tiis.

Biılğı Tokio olimpiadasında milliardtağan qarjı jwmsalğan wlttıq qwramanıñ kil qolamen oljalanuına baylanıstı qoğamda Mädeniet jäne sport ministrligi men Wlttıq olimpiada komitetine qarsı sın men narazılıq köbeygen. Tipti köpşiligi ädeumettik jelide basşılıqtağı lauazımdı twlğalardıñ, sonı arasında ministr Rayımqwlova men key bapkerlerdiñ otstavkasın talap etken.

The Qazaq Times