Eñbek täjiribesiniñ tügel derligin Taldıqorğan qalasında ötkergen Säule Arzanbekovanıñ äkim orınbasarı bolıp tağayındalğan säti. 24 qırküyek 2018 jıl. Foto: Taldıqorğan qalası äkiminiñ baspasöz qızmeti

Almatı oblısınıñ Sıbaylas jemqorlıqqa qarsı qızmet departamenti Taldıqorğan qalası äkiminiñ äleumettik salağan jauaptı orınbasarı qaramağındağı qızmetkerleri biraz uaqıt jemqorlıqpen aynalısqanı äşkere bolğan soñ lauazımınan bosağanın habarladı.

Qazir departamenttiñ tergeu basqarması Taldıqorğan qalası äkimdiginiñ käsipkerlik böliminiñ basşısına jäne bas mamanına qatıstı isti tergep jatır. Olar Qılmıstıq kodeksiniñ 366-babı boyınşa para aldı degen küdikke ilingen. Bwl qızmetkerler äkim orınbasarı Säule Arzanbekova qaramağında bolğan.

Tağılğan ayıpqa qarağanda, bölim bastığı özine bağınıştı bas mamanmen sıbaylasıp, karantin şekteui kezinde bwqaralıq is-şaralardı ötkizuge tıyım salınğanına qaramastan, meyramhana ielerinen jäne köşedegi sauda-sattıq nüktelerinen 20 mıñ men 270 mıñ teñge kölemde twraqtı türde para alıp otırğan.

Bwdan özge tağı 5 meyramhananıñ äkimşisi de para bergeni üşin qılmıstıq jauapkerşilikke tartılıp otır.

Osı qılmıstıq is negizinde Almatı oblıstıq Sıbaylas jemqorlıqqa qarsı is-qimıl departamentiniñ basşılığı qala äkiminiñ qatısuımen keñes ötkizdi.

Onıñ nätijesi boyınşa qızmetkerleriniñ barmaq bastı, köz qıstı äreketin baqılay almağanı üşin Taldıqorğan qalası äkiminiñ orınbasarı Säule Arzanbekova jwmıstan bosatıldı.

2019 jılğı 10 jeltoqsanda qayta qaralğan «QR memlekettik qızmeti turalı» zañğa säykes:

«Ortalıq memlekettik organ basşılarınıñ orınbasarları – özi jetekşilik etetin vedomstvonıñ, derbes qwrılımdıq bölimşeniñ basşısı sıbaylas jemqorlıq qılmıs jasağan kezde otstavkağa berui kerek».

Bwl aqparattı Taldıqorğan äkimdiginiñ baspasöz qızmeti rastadı.

«Arzanbekova şınımen memlekettik qızmetten bosatıldı. Ol öz erkimen äkim orınbasarı qızmetinen ketu turalı ötiniş jazdı. Oğan özi jetekşilik etken monitoringtik top müşeleriniñ wstaluı negiz boldı», – dep naqtıladı äkimdiktiñ  baspasöz hatşısı Nwr Qanatwlı.

46 jastağı Säule Arzanbekova 28 jıldıq eñbek ötiliniñ keyingi üş jılın äkim orınbasarı qızmetinde ötkergen. Eñbek jolın Taldıqorğan qalası äkimi apparatınıñ hatşısı bolıp bastağan. Sodan beri äkim apparatınıñ bölim mamanı, işki sayasat böliminiñ jetekşi mamanı, qalalıq işki sayasat böliminiñ bas mamanı, äkim apparatınıñ bas mamanı, Tilderdi damıtu böliminiñ basşısı, osı uaqıtqa deyin Taldıqorğan qalası äkimdiginiñ işki sayasat böliminiñ basşısı bolıp jwmıs istegen.

 «Atalğan jemqorlıq qılmısın tergeu jalğasıp jatır. Basqa mälimetter tergeu müddesine baylanıstı jariyalanbaydı», – delingen departament habarlamasında.

Ötken jwmada, 30 şildede Taldıqorğan qalasınıñ Antikorı karantin şaralarınıñ iske asuın baqılauğa mindetti monitoring tobınıñ müşelerin wstağan. Şeneunikter pandemiya kezinde bir emes, birneşe käsipkerden jüyeli türde para alğan degen küdikpen isti bolıp jatır. Eger sot ayıptı dep tanısa, küdiktilerge qomaqtı kölemde ayıppwl salınuı ne mülki tärkilenip, jeti jıldan on eki jılğa deyin bas bostandığınan ayırıluı mümkin.

"The Qazaq Times"