قازاقستاننىڭ مادەنيەت جانە سپورت ءمينيسترى اقتوتى رايىمقۇلوۆا جانە ونىڭ ءىستى بولىپ، قىزمەتىنەن بوساعان ورىنباسارى ساكەن مۇسايبەكوۆ. فوتو: اشىق دەرەككوز

بيىل اقپان ايىندا جەمقورلىق كۇدىگىنە ىلىككەن مادەنيەت ۆيتسە-ءمينيسترى ساكەن مۇسايبەكوۆ كىنالى دەپ تانىلدى. وسىعان دەيىن مادەنيەت جانە سپورت ءمينيسترى اقتوتى رايىمقۇلوۆا توقاەۆ تۇرلەنتكەن مەملەكەتتىك قىزمەتكەرلەر تۋرالى زاڭعا سايكەس ورىنباسارىنىڭ ايىبى دالەلدەنگەن جاعدايدا وتستاۆكا كەتەتىنىن مالىمدەگەن.

پروكۋراتۋرا مەن تەرگەۋ ورگاندارى 15 مىڭ دوللار كولەمىندە پارا الدى دەگەن ايىپتاۋ اكتىسىن الماتى قالاسىنىڭ تۇركسiب اۋداندىق سوتى راستادى. جاڭا جاريالانعان سوت شەشىمى بويىنشا، بۇرىنعى ۆيتسە-مينيستر ساكەن مۇسايبەكوۆ مەملەكەتكە 62 ميلليون تەڭگە ايىپپۇل تولەۋى ءتيىس. رەسمي مالىمەتكە قاراعاندا، جەمقورلىق ءىسى «مولشەرلەمەلەردى ەسەپكە الۋ ورتالىعى» جوباسىن جۇزەگە اسىرۋ تۋرالى كەلىسىمگە بايلانىستى قوزعالعان.

وسىدان ءۇش اي ىلگەرى، 14 مامىردا وتكەن ورتكوم بريفينگىندە مينيستر رايىمقۇلوۆا ءدۇيىم ەلدىڭ الدىندا ورىنباسارىنا تاعىلعان ايىپ دالەلدەنسە، ورنىمنان كەتەمىن دەگەن.

«كونستيتۋتسياعا سايكەس، كىناسىزدىك پرەزۋمپتسياسى بار جانە كىنا دالەلدەنۋى ءتيىس. ەگەر ونىڭ كىناسى دالەلدەنسە، زاڭعا سايكەس مەن وتستاۆكاعا كەتۋ تۋرالى ءوتىنىش بەرەمىن» دەگەن رايىمقۇلوۆا مامىر ايىنداعى جارتىجىلدىق ەسەپ بەرۋ جيىنىندا.

قاڭتار ايىنىڭ سوڭىندا مادەنيەت جانە سپورت ۆيتسە-ءمينيسترى ساكەن مۇسايبەكوۆتىڭ «ءوز ەركىمەن» قىزمەتىنەن كەتكەنى حابارلانعان. ارتىنشا ونىڭ «جەمقورلىق كۇدىگىنە» ءىلىنىپ ۇستالعانى تۋرالى حابار تاراعان.

قازاقستاندا «مەملەكەتتىك قىزمەت تۋرالى» زاڭعا سايكەس، مەملەكەتتىك قىزمەتكەر جەمقورلىقپەن ۇستالسا، ونىڭ باسشىسى وتستاۆكاعا كەتۋى ءتيىس.

بيىلعى توكيو وليمپياداسىندا ميللياردتاعان قارجى جۇمسالعان ۇلتتىق قۇرامانىڭ كىل قولامەن ولجالانۋىنا بايلانىستى قوعامدا مادەنيەت جانە سپورت مينيسترلىگى مەن ۇلتتىق وليمپيادا كوميتەتىنە قارسى سىن مەن نارازىلىق كوبەيگەن. ءتىپتى كوپشىلىگى ادەۋمەتتىك جەلىدە باسشىلىقتاعى لاۋازىمدى تۇلعالاردىڭ، سونى اراسىندا مينيستر رايىمقۇلوۆا مەن كەي باپكەرلەردىڭ وتستاۆكاسىن تالاپ ەتكەن.

The Qazaq Times