Körneki suret. Foto: aşıq derekköz

Qazaqstanda inflyaciya ösip, jeti aydıñ özinde 8,4%-ğa artqan.

11 tamızda ötken Ükimet otırısında Wlttıq bank törağası Erbolat Dosaev resmi mälimdemesinde inflyaciya ösimi jöninde dabıl qaqtı.

«Elde mausım ayında 7,9%-ğa kürt köterilgen inflyaciya ösimi odan arı jalğastı. Şilde ayında körsetkiş 8,4%-ğa arttı. Bwl 2017 jıldan bergi eñ joğarı män», – dedi Dosaev.

Ol inflyaciyanıñ şarıqtauın azıq-tülik narığındağı twraqsızdıq pen şettelderdegi şikizattıñ qımbattauı jäne Resey siyaqtı iri sauda seriktes eldegi aqşanıñ qwnsızdanuımen baylanıstıradı.

Ädette jaz aylarında qoljetimdi bolatın kökönisterdiñ tosınnan jäne et-swyıq maydıñ qımbattauı saldarınan azıq-tülik inflyaciyası 10,1%-dan 11,0%-ğa wlğaydı. Azıq-tülikke jatpaytın inflyaciya janar-jağarmay men wzaq uaqıt paydalanatın tauarlar bağasınıñ ösuine baylanıstı 6,9%-dan 7,2%-ğa köbeydi. Al kommunaldıq qızmetterge tarifter jäne jekelegen narıqtıq servisterdiñ qımbattağandıqtan, aqılı qızmetterdiñ inflyaciyası 5,6%-dan 6,1%-ğa deyin aspandağan.

Bas bankir jıl soñına qaray inflyaciya 6-7% şamasında boluı mümkin deydi. Tamız-qırküyek aylarında boljam jañarmaq.

Biıl azıq-tülik önimderiniñ narıqtağı şınayı ösimi resmi nwsqadan edäuir joğarı bolğanı dausız. Düken jağalağan jwrttı aşındırğan qımbatşılıqtı mausımda Toqaev moyındap, bağanı wstauğa Ükimetke tapsırma bergen edi. Degenmen «bağa bii» är salada äli jalğasıp jatır. Aq nan bağası bir jıl işinde birden 5,9%-ğa, qara nan 9,2% qımbattadı. Bwqara köp twtınatın makaron önimderiniñ bağası 10,3%-ke köterildi. Köktem-jaz aylarında kökönis, qwrılıs materialdarı bwrın-soñdı bolmağan deñgeyde eselep öskeni belgili. Saldarınan Qazaqstannıñ türli öñirinde kirisi ortayıp, şığını wlğayğan jwmısşılar tabı äleumettik sayasattı oñaltudı, eñbek jağdayın jaqsartıp, jalaqını arttırudı talap etip, ereuildetuge mäjbür boldı.

Osınşama qwldırauğa qaramay jurnalistermen birde-bir märte aşıq brfiing ötkizbegen «Estuşi Ükimettiñ» basşısı, prem'er-ministr Asqar Maminniñ «el ekonomikasında senimdi ösim bayqaladı» deui resmi mälimetke kümändi küşeytti.

"The Qazaq Times"