ۇلتتىق بانك: ينفلياتسيا بەس جىلدا بولماعان دەڭگەيگە ءوستى

قازاقستاندا ينفلياتسيا ءوسىپ، جەتى ايدىڭ وزىندە 8,4%-عا ارتقان.

11 تامىزدا وتكەن ۇكىمەت وتىرىسىندا ۇلتتىق بانك توراعاسى ەربولات دوساەۆ رەسمي مالىمدەمەسىندە ينفلياتسيا ءوسىمى جونىندە دابىل قاقتى.

«ەلدە ماۋسىم ايىندا 7,9%-عا كۇرت كوتەرىلگەن ينفلياتسيا ءوسىمى ودان ارى جالعاستى. شىلدە ايىندا كورسەتكىش 8,4%-عا ارتتى. بۇل 2017 جىلدان بەرگى ەڭ جوعارى ءمان»، – دەدى دوساەۆ.

ول ينفلياتسيانىڭ شارىقتاۋىن ازىق-تۇلىك نارىعىنداعى تۇراقسىزدىق پەن شەتتەلدەردەگى شيكىزاتتىڭ قىمباتتاۋى جانە رەسەي سياقتى ءىرى ساۋدا سەرىكتەس ەلدەگى اقشانىڭ قۇنسىزدانۋىمەن بايلانىستىرادى.

ادەتتە جاز ايلارىندا قولجەتىمدى بولاتىن كوكونىستەردىڭ توسىننان جانە ەت-سۇيىق مايدىڭ قىمباتتاۋى سالدارىنان ازىق-تۇلىك ينفلياتسياسى 10,1%-دان 11,0%-عا ۇلعايدى. ازىق-تۇلىككە جاتپايتىن ينفلياتسيا جانار-جاعارماي مەن ۇزاق ۋاقىت پايدالاناتىن تاۋارلار باعاسىنىڭ وسۋىنە بايلانىستى 6,9%-دان 7,2%-عا كوبەيدى. ال كوممۋنالدىق قىزمەتتەرگە تاريفتەر جانە جەكەلەگەن نارىقتىق سەرۆيستەردىڭ قىمباتتاعاندىقتان، اقىلى قىزمەتتەردىڭ ينفلياتسياسى 5,6%-دان 6,1%-عا دەيىن اسپانداعان.

باس بانكير جىل سوڭىنا قاراي ينفلياتسيا 6-7% شاماسىندا بولۋى مۇمكىن دەيدى. تامىز-قىركۇيەك ايلارىندا بولجام جاڭارماق.

بيىل ازىق-تۇلىك ونىمدەرىنىڭ نارىقتاعى شىنايى ءوسىمى رەسمي نۇسقادان ەداۋىر جوعارى بولعانى داۋسىز. دۇكەن جاعالاعان جۇرتتى اشىندىرعان قىمباتشىلىقتى ماۋسىمدا توقاەۆ مويىنداپ، باعانى ۇستاۋعا ۇكىمەتكە تاپسىرما بەرگەن ەدى. دەگەنمەن «باعا ءبيى» ءار سالادا ءالى جالعاسىپ جاتىر. اق نان باعاسى ءبىر جىل ىشىندە بىردەن 5,9%-عا، قارا نان 9,2% قىمباتتادى. بۇقارا كوپ تۇتىناتىن ماكارون ونىمدەرىنىڭ باعاسى 10,3%-كە كوتەرىلدى. كوكتەم-جاز ايلارىندا كوكونىس، قۇرىلىس ماتەريالدارى بۇرىن-سوڭدى بولماعان دەڭگەيدە ەسەلەپ وسكەنى بەلگىلى. سالدارىنان قازاقستاننىڭ ءتۇرلى وڭىرىندە كىرىسى ورتايىپ، شىعىنى ۇلعايعان جۇمىسشىلار تابى الەۋمەتتىك ساياساتتى وڭالتۋدى، ەڭبەك جاعدايىن جاقسارتىپ، جالاقىنى ارتتىرۋدى تالاپ ەتىپ، ەرەۋىلدەتۋگە ءماجبۇر بولدى.

وسىنشاما قۇلدىراۋعا قاراماي جۋرناليستەرمەن بىردە-ءبىر مارتە اشىق برفينگ وتكىزبەگەن «ەستۋشى ۇكىمەتتىڭ» باسشىسى، پرەمەر-مينيستر اسقار ءماميننىڭ «ەل ەكونوميكاسىندا سەنىمدى ءوسىم بايقالادى» دەۋى رەسمي مالىمەتكە كۇماندى كۇشەيتتى.

"The Qazaq Times"