Oblıs äkimi – äkim orınbasarı – basqarma basşısı triadasındağı «qwtqaru operaciyasına» keyipker bolğan Atırau öñiriniñ äkimi Dosmwhambetov jäne onıñ orınbasarı Aydarbekov, sottalğan bwrınğı basqarma basşısı Taubaev. Fotokollaj: aşıq derekköz

Toqaevtıñ «otstavka institutı» jönindegi bastaması iri oyınşılarğa kelgende därmensizdik tanıtuı qoğamda qarsılıq-sıni közqarastı üdete tüsti. Bağınıştı qızmetkeri jemqorlıqpen wstalğan jağdayda basşısı da jauapqa tartıladı degenimen, bwl zañ şın küşine ene almay otır. Memlekettik qızmetkerlerdiñ jauapkerşiligin arttıru maqsatınan tuğan talap praktikada «orınbasardı otstavka otınan qwtqaru» syujetin tudırdı. Bwl motiv qazirdiñ özinde jüyelenip, tiptik keyipke aynalıp ülgerdi: bir emes, birneşe «körnekti mısaldarı» payda boldı.

Atırau oblısınıñ äkimi öziniñ orınbasarı Serik Aydarbekovtıñ qol astındağı qızmetkeriniñ qılmısı sot arqılı däleldengennen keyin otstavkağa tapsırğan ötinimin qanağattandırudan bas tarttı. Aymaqtağı Aq-Jayıq basılımınıñ habarlauınşa, Atırau öñiriniñ äkimi Mahambet Dosmwhambetov orınbasarına sögis berumen şektelgen.

Säuirde sot oblıstıq Jwmıspen qamtudı üylestiru jäne äleumettik bağdarlamalar basqarmasınıñ bwrınğı basşısı Serik Qamidollanı Qılmıstıq kodekstiñ 361-babı («Qızmettik ökilettikterdi teris paydalanu») boyınşa kinäli dep tanısa da, biraq «jasağan isine ökinuine baylanıstı» onı qılmıstıq jauapkerşilikten bosatqan edi. Osıdan keyin basqa salalarmen qatar jwmıspen qamtu jäne äleumettik bağdarlamalardı qadağalaytın oblıs äkiminiñ birinşi orınbasarı Serik Aydarbekov özin qızmetten bosatuğa ötiniş berdi. Alayda «aqköñil äkim» Mahambet Dosmwhambetov qatañ sögis berumen şektelip, arızın qabıldamadı.

«Rasında da, «Memlekettik qızmet turalı» zañına säykes, S.Aydarbekov sot şeşiminen keyin 10 kün işinde otstavkağa ketuge ötiniş berdi, biraq oblıs äkimi qatañ sögis türinde tärtiptik jaza qoldanumen şekteldi», – dep rastadı oblıs äkiminiñ orınbasarı Baqıtgül Hamenova.

Basılım bwl şeşimniñ zañğa sıyımdılığın belgisiz dep sanaydı. Serik Aydarbekov Atıraudağı «aq üydiñ» işindegi mañızdı twlğa: tek qazirgi qızmetine baylanıstı emes, mwnaylı öñirde qızmetke tağayındalğanğa deyin ol üş jıl boyı Mäjilis apparatın basqardı, sondıqtan elordada tanısı köp, baylanısı jaqsı» deydi. Aydarbekov 2010-2012 jıldarı oblıs äkiminiñ orınbasarı, keyin Atırau qalasınıñ äkimi bolğan.

İsti bolğan basqarma basşısınıñ orınbasarına bağınıstı ekenin alğa tartqan äkimniñ basına «qızmettik toqırau töndiretin qaterdiñ biri» orınbasarı Nwrlan Taubaevtıñ isi äli bir jağına şıqqan joq. Para aldı degen küdikpen sottalıp jatqan Taubaev bıltırğı küzden beri qamauda, ol – Dosmwhambetovtıñ bwrınğı birinşi orınbasarı. Eger küdikti eks-şeneunik ayıptaluşı retinde tanılsa, äkim Dosmwhambetov zañ boyınşa ornınan ketui tiis.

2019 jılğı 10 jeltoqsanda qayta tolıqtırılğan «QR memlekettik qızmeti turalı» zañğa säykes:

«Ortalıq memlekettik organ basşılarınıñ orınbasarları – özi jetekşilik etetin vedomstvonıñ, derbes qwrılımdıq bölimşeniñ basşısı sıbaylas jemqorlıq qılmıs jasağan kezde otstavkağa berui kerek»

Bwdan bwrın da bağınıştı qızmetkeriniñ qılmısı däleldengenimen, basşısı lauazımındağı birneşe şeneunik otstavkağa ketpegen. Zañda közdelgen normanıñ iske asuın birinşi basşılardıñ «ämirşil erki» kedergi keltirip otır.

Osığan deyin Aqtaudağı Nwrmwhan Jantörin atındağı oblıstıq muzıkalıq drama teatrdıñ bwrınğı direktorı Nwrniyaz Mwqanov qızmettik lauazımın asıra paydalanıp, jwmıs istemeytin tanısınıñ esepşotına bir jıldan asa uaqıt boyı zañsız jalaqı audarıp, byudjetke 1,4 mln teñge şığın keltirgen. Odan ilgeri elordada ornalasqan M.Gor'kiy atındağı akademiyalıq oblıstıq drama teatrınıñ eks-direktorı da jöndeu jwmısına bölingen qarajattı jımqırdı degen ayıppen qızmetten şettetilse, osıdan biraz bwrın astananıñ Mädeniet jäne sport basqarmasınıñ eks-basşısı Nwrlan Sıdıqov, M.Äuezov teatrınıñ bwrınğı direktorı Erlan Biläl da paramen wstalıp, qılmıstıq jauapkerşilikke tartılğan. Biraq osı jayttardıñ birde-birinde joğarı basşı otstavkağa ketken joq.

Aqpan ayında elorda äkiminiñ orınbasarı Baqtiyar Mäken de özine bağınıştı şeneuniktiñ para alğanı sot ükimimen rastalğanına qaramay otstavkası qabıldanbay, sögispen ğana şektelgen. Sot mädeniet basqarmasınıñ bwrınğı jetekşisi Nwrlan Sadıqovtı ayıptı dep tanığan, osığan baylanıstı osı salağa jauaptı Baqtiyar Mäken otstavkağa ötiniş bergen. Al astana äkimi Altay Kölginov orınbasarınıñ otstavkasın qabıldamay, keri qaytarğan. Qwqıq qorğauşılar mwnı «kadrlıq talğau alıp keletin közboyauşılığı basım zañ şikiligi» dep sınaydı.

«Senimnen ketti» degen sögispen 2019 jılı Şımkent äkimi qızmetinen alınğan Ğabidolla Äbdirahımov biıl qañtarda mädeniet jäne sport vice-ministri bolıp tağayındaldı. Qazaqstanda jwmısına qoğam qırın qarap ne joğarı basşılıqqa jaqpağan keyipte ornınan ketip, keyinnen tipti biik lauazımğa baratın şeneunikter az kezdespeydi.

"The Qazaq Times"