توقاەۆتىڭ «وتستاۆكا ينستيتۋتى» جونىندەگى باستاماسى ءىرى ويىنشىلارعا كەلگەندە دارمەنسىزدىك تانىتۋى قوعامدا قارسىلىق-سىني كوزقاراستى ۇدەتە ءتۇستى. باعىنىشتى قىزمەتكەرى جەمقورلىقپەن ۇستالعان جاعدايدا باسشىسى دا جاۋاپقا تارتىلادى دەگەنىمەن، بۇل زاڭ شىن كۇشىنە ەنە الماي وتىر. مەملەكەتتىك قىزمەتكەرلەردىڭ جاۋاپكەرشىلىگىن ارتتىرۋ ماقساتىنان تۋعان تالاپ پراكتيكادا «ورىنباساردى وتستاۆكا وتىنان قۇتقارۋ» سيۋجەتىن تۋدىردى. بۇل موتيۆ قازىردىڭ وزىندە جۇيەلەنىپ، تيپتىك كەيىپكە اينالىپ ۇلگەردى: ءبىر ەمەس، بىرنەشە «كورنەكتى مىسالدارى» پايدا بولدى.
اتىراۋ وبلىسىنىڭ اكىمى ءوزىنىڭ ورىنباسارى سەرىك ايداربەكوۆتىڭ قول استىنداعى قىزمەتكەرىنىڭ قىلمىسى سوت ارقىلى دالەلدەنگەننەن كەيىن وتستاۆكاعا تاپسىرعان ءوتىنىمىن قاناعاتتاندىرۋدان باس تارتتى. ايماقتاعى اق-جايىق باسىلىمىنىڭ حابارلاۋىنشا, اتىراۋ ءوڭىرىنىڭ اكىمى ماحامبەت دوسمۇحامبەتوۆ ورىنباسارىنا سوگىس بەرۋمەن شەكتەلگەن.
ساۋىردە سوت وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ بۇرىنعى باسشىسى سەرىك قاميدوللانى قىلمىستىق كودەكستىڭ 361-بابى («قىزمەتتىك وكىلەتتىكتەردى تەرىس پايدالانۋ») بويىنشا كىنالى دەپ تانىسا دا، بىراق «جاساعان ىسىنە وكىنۋىنە بايلانىستى» ونى قىلمىستىق جاۋاپكەرشىلىكتەن بوساتقان ەدى. وسىدان كەيىن باسقا سالالارمەن قاتار جۇمىسپەن قامتۋ جانە الەۋمەتتىك باعدارلامالاردى قاداعالايتىن وبلىس اكىمىنىڭ ءبىرىنشى ورىنباسارى سەرىك ايداربەكوۆ ءوزىن قىزمەتتەن بوساتۋعا ءوتىنىش بەردى. الايدا «اقكوڭىل اكىم» ماحامبەت دوسمۇحامبەتوۆ قاتاڭ سوگىس بەرۋمەن شەكتەلىپ، ارىزىن قابىلدامادى.
«راسىندا دا، «مەملەكەتتىك قىزمەت تۋرالى» زاڭىنا سايكەس، س.ايداربەكوۆ سوت شەشىمىنەن كەيىن 10 كۇن ىشىندە وتستاۆكاعا كەتۋگە ءوتىنىش بەردى، بىراق وبلىس اكىمى قاتاڭ سوگىس تۇرىندە تارتىپتىك جازا قولدانۋمەن شەكتەلدى»، – دەپ راستادى وبلىس اكىمىنىڭ ورىنباسارى باقىتگۇل حامەنوۆا.
باسىلىم بۇل شەشىمنىڭ زاڭعا سىيىمدىلىعىن بەلگىسىز دەپ سانايدى. سەرىك ايداربەكوۆ اتىراۋداعى «اق ءۇيدىڭ» ىشىندەگى ماڭىزدى تۇلعا: تەك قازىرگى قىزمەتىنە بايلانىستى ەمەس، مۇنايلى وڭىردە قىزمەتكە تاعايىندالعانعا دەيىن ول ءۇش جىل بويى ءماجىلىس اپپاراتىن باسقاردى، سوندىقتان ەلوردادا تانىسى كوپ، بايلانىسى جاقسى» دەيدى. ايداربەكوۆ 2010-2012 جىلدارى وبلىس اكىمىنىڭ ورىنباسارى، كەيىن اتىراۋ قالاسىنىڭ اكىمى بولعان.
ءىستى بولعان باسقارما باسشىسىنىڭ ورىنباسارىنا باعىنىستى ەكەنىن العا تارتقان اكىمنىڭ باسىنا «قىزمەتتىك توقىراۋ توندىرەتىن قاتەردىڭ ءبىرى» ورىنباسارى نۇرلان تاۋباەۆتىڭ ءىسى ءالى ءبىر جاعىنا شىققان جوق. پارا الدى دەگەن كۇدىكپەن سوتتالىپ جاتقان تاۋباەۆ بىلتىرعى كۇزدەن بەرى قاماۋدا، ول – دوسمۇحامبەتوۆتىڭ بۇرىنعى ءبىرىنشى ورىنباسارى. ەگەر كۇدىكتى ەكس-شەنەۋنىك ايىپتالۋشى رەتىندە تانىلسا، اكىم دوسمۇحامبەتوۆ زاڭ بويىنشا ورنىنان كەتۋى ءتيىس.
2019 جىلعى 10 جەلتوقساندا قايتا تولىقتىرىلعان «قر مەملەكەتتىك قىزمەتى تۋرالى» زاڭعا سايكەس:
«ورتالىق مەملەكەتتىك ورگان باسشىلارىنىڭ ورىنباسارلارى – ءوزى جەتەكشىلىك ەتەتىن ۆەدومستۆونىڭ، دەربەس قۇرىلىمدىق بولىمشەنىڭ باسشىسى سىبايلاس جەمقورلىق قىلمىس جاساعان كەزدە وتستاۆكاعا بەرۋى كەرەك»
بۇدان بۇرىن دا باعىنىشتى قىزمەتكەرىنىڭ قىلمىسى دالەلدەنگەنىمەن، باسشىسى لاۋازىمىنداعى بىرنەشە شەنەۋنىك وتستاۆكاعا كەتپەگەن. زاڭدا كوزدەلگەن نورمانىڭ ىسكە اسۋىن ءبىرىنشى باسشىلاردىڭ «ءامىرشىل ەركى» كەدەرگى كەلتىرىپ وتىر.
وسىعان دەيىن اقتاۋداعى نۇرمۇحان ءجانتورين اتىنداعى وبلىستىق مۋزىكالىق دراما تەاتردىڭ بۇرىنعى ديرەكتورى نۇرنياز مۇقانوۆ قىزمەتتىك لاۋازىمىن اسىرا پايدالانىپ، جۇمىس ىستەمەيتىن تانىسىنىڭ ەسەپشوتىنا ءبىر جىلدان اسا ۋاقىت بويى زاڭسىز جالاقى اۋدارىپ، بيۋدجەتكە 1,4 ملن تەڭگە شىعىن كەلتىرگەن. ودان ىلگەرى ەلوردادا ورنالاسقان م.گوركي اتىنداعى اكادەميالىق وبلىستىق دراما تەاترىنىڭ ەكس-ديرەكتورى دا جوندەۋ جۇمىسىنا بولىنگەن قاراجاتتى جىمقىردى دەگەن ايىپپەن قىزمەتتەن شەتتەتىلسە، وسىدان ءبىراز بۇرىن استانانىڭ مادەنيەت جانە سپورت باسقارماسىنىڭ ەكس-باسشىسى نۇرلان سىدىقوۆ، م.اۋەزوۆ تەاترىنىڭ بۇرىنعى ديرەكتورى ەرلان ءبىلال دا پارامەن ۇستالىپ، قىلمىستىق جاۋاپكەرشىلىككە تارتىلعان. بىراق وسى جايتتاردىڭ بىردە-بىرىندە جوعارى باسشى وتستاۆكاعا كەتكەن جوق.
اقپان ايىندا ەلوردا اكىمىنىڭ ورىنباسارى باقتيار ماكەن دە وزىنە باعىنىشتى شەنەۋنىكتىڭ پارا العانى سوت ۇكىمىمەن راستالعانىنا قاراماي وتستاۆكاسى قابىلدانباي، سوگىسپەن عانا شەكتەلگەن. سوت مادەنيەت باسقارماسىنىڭ بۇرىنعى جەتەكشىسى نۇرلان سادىقوۆتى ايىپتى دەپ تانىعان، وسىعان بايلانىستى وسى سالاعا جاۋاپتى باقتيار ماكەن وتستاۆكاعا ءوتىنىش بەرگەن. ال استانا اكىمى التاي كولگىنوۆ ورىنباسارىنىڭ وتستاۆكاسىن قابىلداماي، كەرى قايتارعان. قۇقىق قورعاۋشىلار مۇنى «كادرلىق تالعاۋ الىپ كەلەتىن كوزبوياۋشىلىعى باسىم زاڭ شيكىلىگى» دەپ سىنايدى.
«سەنىمنەن كەتتى» دەگەن سوگىسپەن 2019 جىلى شىمكەنت اكىمى قىزمەتىنەن الىنعان عابيدوللا ءابدىراحىموۆ بيىل قاڭتاردا مادەنيەت جانە سپورت ۆيتسە-ءمينيسترى بولىپ تاعايىندالدى. قازاقستاندا جۇمىسىنا قوعام قىرىن قاراپ نە جوعارى باسشىلىققا جاقپاعان كەيىپتە ورنىنان كەتىپ، كەيىننەن ءتىپتى بيىك لاۋازىمعا باراتىن شەنەۋنىكتەر از كەزدەسپەيدى.
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
ارمان الىمبەكوۆ: مەن ول جەردىڭ رەزيدەنتسيا ەكەنىن بىلمەدىم. ەشنارسە بۇلدىرمەدىم.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى
رەزيدەنتسيا ءىسى. ورىنعازى سەرىكبول: بەيبىت شەرۋگە شىقتىم. ال، 269 باپتى مويىندامايمىن
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى