Almatı qalasında koronavirus jwqqandardı emdeytin birden-bir stacionarlardıñ biri – Ortalıq klinikalıq auruhanasınıñ dälizi. 15 şilde 2021 jıl. Foto: QT / Kültegin Aspanwlı

Qazaqstanda koronavirus pen oğan wqsas pnevmoniyağa şaldıqqandar sanı 8 mıñğa artıp, jalpı esebi 633 mıñnan astı, onıñ 146 mıñı tek şilde ayında tirkelip ülgerdi. Osı aydağı epidahual dinamikasına qarağanda, koronavirustıñ janama äserinen köz jwmğandardı eseptemegende tike kovidten 1,7 mıñnan asa qazaqstandıq (KVI+ 1467, KVI- 259) ömirden ötken. Aydıñ ortasına qaray täuliktik körsetkişi 5 mıñnıñ üstine şıqqan indettiñ törtinşi tolqınında qazir keminde 7 mıñ jağday tirkelip jatır. Beysenbide jüz adam qaytıs bolğan.

Densaulıq saqtau ministrliginiñ resmi mälimetinşe, elde 30 şildede koronavirus (KVI+) jwqqan 7691 adam, al 29-ı koronavirus pnevmoniyasına (KVI-) şaldıqqan 309 adam tirkeldi. Qazir elde 96 mıñ adam (KVI+ boyınşa 93 mıñ, KVI- boyınşa 2,6 mıñnan asa) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı artıp, şilde ayındağı toğızınşı rekordın jañaladı. Olardıñ basım böligi ädettegidey mıñnan joğarı dinamikada twrğan astana (1518) jäne  Almatı (1511) qalalarınan. qatarınan. Bwdan özge Qarağandı (964), Şımkent (477), Atırau (417), Aqtöbe (332), Almatı (300), Pavlodar (280), Qızılorda (257), Aqmola (253), Jambıl (247), Qostanay (245), Mañğıstau (236), ŞQO (216), BQO (159), SQO (155), Türkistan (124) oblıstarında dert üdep twr. Osı seysenbide aurudan ayıqqan 5372 adam üyine şığarılğan. Beysenbide jiını 86 adam qaytıs bolğan.

#COVID_pnevmoniyası 29 şildede aqparatı bir täulikke keşigip beriletin koronavirus pnevmoniyasına şaldıqqan 309 nauqas esepke alındı. Vedomstvo dereginşe, seysenbi küni sırqattar Şımkent (62) qalası jäne Mañğıstau (52), Jambıl (37), Atırau (30) oblıstarı men astanada (26) köptep anıqtalğan. Sonımen qosa, 110 adam ayığıp şıqqan, tağı 14 adam köz jwmğan.

#Jalpı  DenMin deregine qarağanda, emdelip jatqan 96 mıñday nauqastıñ 27 mıñı auruhanada, 69 mıñğa juığı ambulatorlıq baqılauda. 1677 mıñ nauqastıñ jağdayı naşar, ondağı 349 adamnıñ häli öte auır. Bwdan özge 334 sırqat ökpeni jasandı jeldetu apparatımen tınıstap jatır.

Epidkartada keyingi bir apta boyı «sarı aymaqta» jalğız twrğan Türkistan oblısınan basqa barlıq öñir (üş megapolisti qosa alğanda) «qızıl aymaqta» twr.

DenMin habarınşa, 1 şildede PTR skriningi negizinde 414 sınama jürgizilgen. Säykesinşe, barlıq ülginiñ 48,3%-ınan Qazaqstannıñ tügel aymağınan ündistandıq «Del'ta» ştamı anıqtalğan. Ükimet mälimetinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Bıltır 13 naurızdan beri COVID-19 infekciyasın jwqtırğandar qatarı 572,5 mıñnan, 1 tamızdan bılayğı koronavirus pnevmoniyası 60,5 mıñnan astı. DDSW derekqorı men Wlttıq statistikada Qazaqstanda auırğandar sanı 633 mıñğa jetti. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 11,9 mıñnan asa adam (KVI+ / U07.1 – 5866, KVI- / U07.2 – 3711, ilespe aurulardan – 2367) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 42-orında twr.

Ükimettiñ soñğı deregine qarağanda, Qazaqstanda 3,7 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 5,3 mln şamasında.

"The Qazaq Times"