Almatı qalasındağı Ortalıq klinikalıq auruhanasınıñ jansaqtau böliminde koronavirustıñ asqınğan türinen emdelip jatqandar. 15 şilde 2021 jıl. Foto: QT / Kültegin Aspanwlı

Qazaqstanda koronavirus pen oğan wqsas pnevmoniyağa şaldıqqandar sanı 600 mıñnan astı, osılayşa düniejüzinde nauqastar sanı boyınşa 42-orınğa jıljıdı. Osı şilde ayınıñ özinde tirkelgen sırqattar qatarı 120 mıñğa juıqtadı. Eki aptadan beri toqtausız ösip jatqan auruşañdıq 5 mıñnıñ üstinde twr. Düysenbidegi epidahual dinamikası, 6,8 mıñ keys – şilde ayındağı altınşı rekordtı jañarttı. Jeksenbiniñ özinde 110 adam qaytıs bolğan.

Densaulıq saqtau ministrliginiñ resmi mälimetinşe, elde 26 şildede koronavirus (KVI+) jwqqan 6797 adam, al 25-i koronavirus pnevmoniyasına (KVI-) şaldıqqan 23 adam tirkeldi. Qazir elde 87 mıñ adam (KVI+ boyınşa 85 mıñ, KVI- boyınşa 1931) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi ädettegidey astana (1537),  Almatı qalası (1207) jäne Qarağandı oblısında (796) tirkeldi. Bwdan özge Atırau (480), Şımkent (382), ŞQO (333), Almatı (260), Mañğıstau (254), Qostanay (209), Pavlodar (207), Aqmola (195), Türkistan (180), Aqtöbe (175) oblıstarında dert üdep twr. Ötken täulikte 2625 adam ayığıp üyine şığarılğan. Jeksenbide jiını 86 adam qaytıs bolğan.

#COVID_pnevmoniyası 25 şilde, demalıs küni aqparatı bir täulikke keşigip beriletin koronavirus pnevmoniyasına şaldıqqan 23 nauqas esepke alındı. Senbi-jeksenbi künderi medicinalıq wyımdardıñ därigerler qwramınıñ negizgi böligi demalatındıqtan, resmi esep uaqıtılı jürgizilmeydi jäne bwl künderi nauqastar da jügine bermeydi. Vedomstvo dereginşe, jeksenbide sırqattar Atırau (7), astana, Şımkent qalaları men Jambıl, Pavlodar, Mañğıstau, Almatı oblıstarında (ärqaysında ekeuden) anıqtalğan. Sonımen qosa, 75 adam ayığıp şıqqan, tağı 24 adam köz jwmğan.

#Jalpı  DenMin deregine qarağanda, emdelip jatqan 87 mıñnan asa nauqastıñ 24 mıñı auruhanada, 62 mıñı ambulatorlıq baqılauda. 1461 nauqastıñ jağdayı naşar, ondağı 306 adamnıñ häli öte auır. Bwdan özge 182 sırqat ökpeni jasandı jeldetu apparatımen tınıstap jatır.

Virustıñ taralu qateri jağınan respublikanıñ barlıq öñiri sarğayıp-qızara tüsti. «Qızıl aymaqqa» engen öñirler: astana, Almatı, Şımkent qalaları men Almatı, Aqmola, Atırau, Aqtöbe,  BQO, Qarağandı, Mañğıstau, Qostanay, Qızılorda, SQO, Pavlodar, ŞQO, Jambıl oblıstarı. Al Türkistan öñiri jalğız «sarı aymaqta» twr. Qazaqstan twstas qızıl reñge boyaldı.

DenMin habarınşa, 1 şildede PTR skriningi negizinde 414 sınama jürgizilgen. Säykesinşe, barlıq ülginiñ 48,3%-ınan Qazaqstannıñ tügel aymağınan ündistandıq «Del'ta» ştamı anıqtalğan. Ükimet mälimetinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Bıltır 13 naurızdan beri COVID-19 infekciyasın jwqtırğandar qatarı 542 mıñğa, 1 tamızdan bılayğı koronavirus pnevmoniyası 59 mıñğa jetti. DDSW derekqorı men Wlttıq statistikada Qazaqstanda auırğandar sanı 602 mıñnan astı. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 11,5 mıñnan asa adam (KVI+ / U07.1 – 5538, KVI- / U07.2 – 3649, ilespe aurulardan – 2367) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 42-orında twr.

Ükimettiñ soñğı deregine qarağanda, Qazaqstanda 3 mln 356 mıñ adam koronavirusqa qarsı vakcinanı tolıq alğan.

"The Qazaq Times"