Almatı qalasındağı Ortalıq klinikalıq auruhananıñ jansaqtau böliminde koronavirustıñ asqınğan türimen auırıp jatqan nauqastar. 15 şilde 2021 jıl. Foto: QT / Kültegin Aspanwlı

Jaz ortasında sırqattar sanı kürt ösken Qazaqstanda koronavirustıñ törtinşi tolqını rekordıq mändi kün sayın jañarıp jatır. Koronavirus pen osı tektes pnevmoniyağa şaldıqqandar sanı tağı 5770 adamğa köbeydi. Särsenbi küni 54 adam köz jwmdı.

Densaulıq saqtau ministrliginiñ resmi mälimetinşe, elde 15 şildede koronavirus (KVI+) jwqqan 5648 adam, al 14-i koronavirus pnevmoniyasına (KVI-) şaldıqqan 122 adam tirkeldi. Qazir elde 50 mıñnan asa adam (KVI+ boyınşa 48 894, KVI- boyınşa 1563) auırıp jatır.

#COVID PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi ädettegidey astana (1549),  Almatı qalası (885) jäne Qarağandı oblısında (746) tirkeldi. Bwdan özge Şımkent (421), Atırau (329), BQO (259),  Aqtöbe (215), Mañğıstau (208), Pavlodar (178), Aqmola (175) oblıstarında dert üdep twr. Ötken täulikte 3012 adam ayığıp şığıp, üyine jiberilgen. Osı särsenbide jiını 48 adam qaytıs bolğan.

#COVID_pnevmoniyası 13 şildede aqparatı bir täulikke keşigip beriletin koronavirus pnevmoniyasına şaldıqqan 122 nauqas esepke alındı. Vedomstvo dereginşe, sırqattar astana (27), Jambıl (13), Şımkent (12), Almatı jäne Atırau (ärqaysında on birden) oblıstarı, Almatı qalasında (10) köptep anıqtalğan. Sonımen qosa, 75 adam ayığıp şıqqan, tağı 6 adam köz jwmğan.

#Jalpı  DenMin deregine qarağanda, emdelip jatqan 50 457 nauqastıñ 16 mıñnan astamı auruhanada, 34 mıñı ambulatorlıq baqılauda. Ahualı naşar 934 nauqastıñ jağdayı naşar, ondağı 225 adamnıñ häli öte auır. Bwdan özge 117 sırqat ökpeni jasandı jeldetu apparatımen tınıstap jatır.

Ötken küngi derek boyınşa, virustıñ taralu qateri jağınan 10 oblıs pen 3 megapolis «qızıl aymaqta». Olar: astana, Almatı, Şımkent qalaları men Aqmola, Atırau, Aqtöbe,  BQO, Qarağandı, Mañğıstau, Qostanay, Qızılorda, SQO, Pavlodar oblıstarı. Al Almatı jäne Jambıl öñirleri «sarı aymaqta» twr. Qazaqstan twstas qızıl reñge boyaldı.

DenMin habarınşa, 1 şildede PTR skriningi negizinde 414 sınama jürgizilgen. Säykesinşe, barlıq ülginiñ 48,3%-ınan Qazaqstannıñ tügel aymağınan ündistandıq «Del'ta» ştamı anıqtalğan. Ükimet mälimetinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Bıltır 13 naurızdan beri COVID-19 infekciyasın jwqtırğandar qatarı 477 mıñnan, 1 tamızdan bılayğı koronavirus pnevmoniyası 58 mıñnan asqan. DDSW derekqorı men Wlttıq statistikada Qazaqstanda auırğandar sanı 536 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 10 751 adam (KVI+ / U07.1 – 4864, KVI- / U07.2 – 3520, ilespe aurulardan – 2367) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 44-orında twr.

Ükimettiñ soñğı deregine qarağanda, Qazaqstanda 2 mln 661 mıñ adam koronavirusqa qarsı vakcinanı tolıq alğan.

"The Qazaq Times"