Алматы қаласындағы Орталық клиникалық аурухананың жансақтау бөлімінде коронавирустың асқынған түрімен ауырып жатқан науқастар. 15 шілде 2021 жыл. Фото: QT / Күлтегін Аспанұлы

Жаз ортасында сырқаттар саны күрт өскен Қазақстанда коронавирустың төртінші толқыны рекордық мәнді күн сайын жаңарып жатыр. Коронавирус пен осы тектес пневмонияға шалдыққандар саны тағы 5770 адамға көбейді. Сәрсенбі күні 54 адам көз жұмды.

Денсаулық сақтау министрлігінің ресми мәліметінше, елде 15 шілдеде коронавирус (КВИ+) жұққан 5648 адам, ал 14-і коронавирус пневмониясына (КВИ-) шалдыққан 122 адам тіркелді. Қазір елде 50 мыңнан аса адам (КВИ+ бойынша 48 894, КВИ- бойынша 1563) ауырып жатыр.

#COVID ПТР тесті арқылы коронавирус жұққаны расталған науқастар қатары тағы артты. Олардың басым бөлігі әдеттегідей астана (1549),  Алматы қаласы (885) және Қарағанды облысында (746) тіркелді. Бұдан өзге Шымкент (421), Атырау (329), БҚО (259),  Ақтөбе (215), Маңғыстау (208), Павлодар (178), Ақмола (175) облыстарында дерт үдеп тұр. Өткен тәулікте 3012 адам айығып шығып, үйіне жіберілген. Осы сәрсенбіде жиыны 48 адам қайтыс болған.

#COVID_пневмониясы 13 шілдеде ақпараты бір тәулікке кешігіп берілетін коронавирус пневмониясына шалдыққан 122 науқас есепке алынды. Ведомство дерегінше, сырқаттар астана (27), Жамбыл (13), Шымкент (12), Алматы және Атырау (әрқайсында он бірден) облыстары, Алматы қаласында (10) көптеп анықталған. Сонымен қоса, 75 адам айығып шыққан, тағы 6 адам көз жұмған.

#Жалпы  ДенМин дерегіне қарағанда, емделіп жатқан 50 457 науқастың 16 мыңнан астамы ауруханада, 34 мыңы амбулаторлық бақылауда. Ахуалы нашар 934 науқастың жағдайы нашар, ондағы 225 адамның хәлі өте ауыр. Бұдан өзге 117 сырқат өкпені жасанды желдету аппаратымен тыныстап жатыр.

Өткен күнгі дерек бойынша, вирустың таралу қатері жағынан 10 облыс пен 3 мегаполис «қызыл аймақта». Олар: астана, Алматы, Шымкент қалалары мен Ақмола, Атырау, Ақтөбе,  БҚО, Қарағанды, Маңғыстау, Қостанай, Қызылорда, СҚО, Павлодар облыстары. Ал Алматы және Жамбыл өңірлері «сары аймақта» тұр. Қазақстан тұстас қызыл реңге боялды.

ДенМин хабарынша, 1 шілдеде ПТР скринингі негізінде 414 сынама жүргізілген. Сәйкесінше, барлық үлгінің 48,3%-ынан Қазақстанның түгел аймағынан үндістандық «Дельта» штамы анықталған. Үкімет мәліметінше, биыл көктем-жазда геномдық зерттеу нәтижесінде елдің басым бөлігінен вирустың бразилиялық, британдық, оңтүстікафрикалық және үндістандық штамдары анықталған.

Былтыр 13 наурыздан бері COVID-19 инфекциясын жұқтырғандар қатары 477 мыңнан, 1 тамыздан былайғы коронавирус пневмониясы 58 мыңнан асқан. ДДСҰ дерекқоры мен Ұлттық статистикада Қазақстанда ауырғандар саны 536 мыңнан асқан. Дегенмен Үкімет коронавирус пен оның пневмониясын екі бөлек есептейді.

Пандемия басталғалы жалпы вирус жұққандардан 10 751 адам (КВИ+ / U07.1 – 4864, КВИ- / U07.2 – 3520, ілеспе аурулардан – 2367) қайтыс болған. Алайда Қазақстан билігі бойынан коронавирус табылса да, басқа аурулардың себебінен қайтыс болды делінгендерді жалпы статистикаға енгізбейді. Бұған қарсы сарапшылардың сөзіне қарағанда, коронавирустың жанама әсерінен қайтқандардың жартысынан астамының себебі қан айналымы жүйесінің аурулары болғандықтан, оған инфекция дерт қоздырушы фактор ретінде өлімге әкеп соқтырған.

Қазақстан вирус таралуы бойынша әлемде Worldometers дерекқоры, Джонс Хопкинс университеті және ДДСҰ тізіміндегі 221 ел мен аймақтың арасында 44-орында тұр.

Үкіметтің соңғы дерегіне қарағанда, Қазақстанда 2 млн 661 мың адам коронавирусқа қарсы вакцинаны толық алған.

"The Qazaq Times"