Almatı qalasındağı jedel medicinalıq kömek körsetu klinikalıq auruhanasına koronavirus anıqtalıp kelgen nauqastar tirkeu kezeginde twr. 14 şilde 2021 jıl. Foto: QT / Kültegin Aspanwlı

Qazaqstanda indet qarqını üdep, kün sayın auruşañdıq körsetkişi rekordtıq mände jañarıp jatır. Koronavirus pen osı tektes pnevmoniyağa şaldıqqandar sanı tağı 5441 adamğa östi. Seysenbi küni 57 adam köz jwmdı.

Densaulıq saqtau ministrliginiñ resmi mälimetinşe, elde 14 şildede koronavirus (KVI+) jwqqan 5314 adam, al 13-i koronavirus pnevmoniyasına (KVI-) şaldıqqan 127 adam tirkeldi. Qazir elde 48 mıñğa tarta adam (KVI+ boyınşa 46 306, KVI- boyınşa 1522) auırıp jatır.

#COVID PTR testi arqılı koronavirus jwqqanı rastalğan nauqastar qatarı bir täulikte tağı bir mıñğa arttı. Olardıñ basım böligi ädettegidey astana (1576),  Almatı qalası (850) jäne Qarağandı oblısında (603) tirkeldi. Bwdan özge Şımkent (416), Atırau (299), BQO (234),  Aqtöbe (204), Mañğıstau (189),  Aqmola (160), Pavlodar (156) oblıstarında dert üdep twr. Ötken täulikte 2756 adam ayığıp şığıp, üyine jiberilgen. Osı seysenbide jiını 47 adam qaytıs bolğan.

#COVID_pnevmoniyası 13 şildede aqparatı bir täulikke keşigip beriletin koronavirus pnevmoniyasına şaldıqqan 127 nauqas esepke alındı. Vedomstvo dereginşe, sırqattar Atırau oblısı (19), astana (19), Jambıl (15), Aqmola (12), Mañğıstau (11), Almatı (10) oblıstarında köptep anıqtalğan. Sonımen qosa, 82 adam ayığıp şıqqan, tağı 10 adam köz jwmğan.

#Jalpı  DenMin deregine qarağanda, emdelip jatqan 47 828 nauqastıñ 15 mıñnan astamı auruhanada, 32,5 mıñı ambulatorlıq baqılauda. Ahualı naşar 919 nauqastıñ jağdayı naşar, ondağı 212 adamnıñ häli öte auır. Bwdan özge 126 sırqat ökpeni jasandı jeldetu apparatımen tınıstap jatır.

Ötken küngi derek boyınşa, virustıñ taralu qateri jağınan elimizdegi «qızıl aymaq» aumağı tolığıp, 13 öñirge jetti. Olar:   astana, Almatı, Şımkent qalaları men Aqmola, Atırau, Aqtöbe,  BQO, Qarağandı, Mañğıstau, Qostanay, Qızılorda, SQO, Pavlodar oblıstarı. Al Almatı jäne Jambıl öñirleri «sarı aymaqta» twr. Qazaqstan twstas qızıl reñge boyaldı.

DenMin habarınşa, 1 şildede PTR skriningi negizinde 414 sınama jürgizilgen. Säykesinşe, barlıq ülginiñ 48,3%-ınan Qazaqstannıñ tügel aymağınan ündistandıq «Del'ta» ştamı anıqtalğan. Ükimet mälimetinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Bıltır 13 naurızdan beri COVID-19 infekciyasın jwqtırğandar qatarı 472 mıñnan, 1 tamızdan bılayğı koronavirus pnevmoniyası 58 mıñnan asqan. DDSW derekqorı men Wlttıq statistikada Qazaqstanda auırğandar sanı 530 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 10 697 adam (KVI+ / U07.1 – 4816, KVI- / U07.2 – 3514, ilespe aurulardan – 2367) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 44-orında twr.

Ükimettiñ soñğı deregine qarağanda, Qazaqstanda 2 mln 597 mıñ adam koronavirusqa qarsı vakcinanı tolıq alğan.

"The Qazaq Times"